Kašin

Kašin (ven.: Кашин) om Venäman lidn, lidnankund i mineralveziden lebutaho Tverin agjan päivnouzmas. Se om Kašinan rajonan administrativine keskuz.

Kašin
Кашин

Lidnanznam	Flag
Valdkund	Venäma
Eläjiden lugu (2017)	14 475 ristitud
Pämez'	Vladimir Aban'kov (kül'mku 2 015—)
Telefonkod	+7-48 234-xx-xxx
Avtokod	69
Aigvö	UTC+3 (MSK+0)

Istorii

Eländpunkt mainitase ezmäižen kerdan vl 1238 Nikonan aigkirjas kuti muretud mongoloil lidn. Vozil 1319−1426 lidnuz oli Kašinan ruhtinazkundan pälidnaks. Lidn šingotihe vauktan sauvondmujun tehmižel, seižui vezitel Volgan i Nevan basseinoiden keskes. Vl 1775 Kašin sai makundan lidnan statusad. Ižandusen päsarakod oma turizm, sömtegimišt (likörine tegim, konditerine edheotand i lihaceh), mugažo elektroladimišton tegim om olmas.

Geografijan andmused

Lidn sijadase Kašinkanjogen randoil (Volgan hura ližajogi), 125 m ü.m.t. keskmäižel korktusel. Matkad Tverihesai om 116 km suvipäivlaskmha orhal vai 146 km avtotedme. Lähembaine lidn om Kaläzin 30 km suvipäivnouzmha raudtedme vai avtol. Ühtennimine raudtestancii om saudud vl 1898 sarakon lopstancijaks «Bologoje — Ribinsk»-jonospäi, om ühtenzoittud Moskvanke vl 1918, seižub «Kaläzin — Ves'jegonsk»-raudtejonol.

Kašin om lidnankundan üks'jäine eländpunkt.

Eläjad

Vn 2010 Venäman rahvahanlugemižen mödhe eläjiden lugu oli 16 171 ristitud, rajonan kaks' koumandest. Kaikiš suremb ristitišt oli 21 200 eläjad vl 1992. Ortodoksižen hristanuskondan nell' päjumalanpertid da 12 jumalanpertid om lidnas, mugažo om äi pühäpertiden jändusid.

Rahvahad (enamba 0,4% vl 2010, ozutadud rahvahudenke): venälaižed — 96,3%, ukrainalaižed — 0,9%, toižed rahvahad — 2,8%.

Irdkosketused

• Lidnan da Kašinan rajonan tobmuden aluzkundoiden oficialine sait (kashin.info). (ven.)