Boksitogorskan rajon

Boksitogorskan rajon (ven.: Бокситогорский район) om municipaline ühtnik Venäman Leningradan agjas.

Boksitogorskan rajon
Бокситогорский район

Znam	Flag
Valdkund	Venäma
Administrativine keskuz	Boksitogorsk
Eläjiden lugu (2016)	50,756 ristitud
Pind	7,201,74 km²

Administrativine keskuz om Boksitogorsk-lidn. Siš da lähižes Pikalövo-lidnas eläb rajonan ristitišton seičeme kümnendest.

Istorii

Rajonan aluz om pandud vn 1952 heinkun 25. päiväl Leningradan agjaha. Rajon om olmas nügüdläižiš röunoiš vspäi 1965.

Geografijan andmused

Boksitogorskan rajon om Leningradan agjan suvipäivnouzmaine taho. Pind — 7 201 nellikkilometrad (koumanz' sija agjas). Kavag'mecad oma enambuses: pedajikod — päivnouzmas, kuššed mecad — päivlaskmas.

Om röunoid videnke Venäman rajonanke i ümbrikonke:

• päivnouzmas Vologdan agjan Babajevon ümbrikonke;
• suvipäivnouzmas Vologdan agjan Čagodoščan ümbrikonke;
• suves Uz'lidnan agjan Hvoinajan rajonanke;
• suvipäivlaskmas Uz'lidnan agjan Lübitinon rajonanke;
• päivlaskmas da pohjoižes Leningradan agjan Tihvinan rajonanke.

Znamasižed joged oma Čagodošč da Kolp' päivnouzmas, ned mülüdas Volgan (Kaspijan meren) basseinha; Tihvink da Voložb mülüdas Atlantižen valdmeren basseinha rajonan päivlaskmas.

Londuseližed varad oma turbaz, boksitad, sauvondmaterialad (mouckivi, letked, saved), dolomit, mec, reskvezi. Londuseližen Vepsän mec-puišton pala om rajonan pohjoižpäivnouzmas.

Vn 2019 semendkuspäi rajonan territorii jagase seičemeks municipaližeks ühtnikaks: koume lidnankundad da nell' küläkundad.

Tobmuz

Käskusenandai tobmuz om Ezitajiden Nevondkund (ven.: Совет депутатов) 18 ühtnijanke. Kaik rahvaz valičeb heid videks vodeks. Järgvaličendad sihe oliba vn 2014 sügüz'kun 14. päiväl. Valerii Tihonov radab sen ezimehen da rajonan pämehen vn 2011 semendkun 26. päiväspäi. Ezitajiden Nevondkund valičeb rajonan administracijan pämest.

Vn 2006 vilukun 1. päiväspäi Sergei Muhin om valitud i radab rajonan administracijan pämehen, se om hänen koumanz' strok jäl'geten. Rajonan ezmäine varapämez' da kaks' rajonan varapämest oma hänele abhu. Kaik kuz' komitetad, koume palakundad da laudkund alištudas rajonan administracijale.

Eläjad

Vn 2010 Venäman rahvahanlugemižen mödhe rajonan eläjiden lugu oli 53 842 ristitud.

Kaik om 261 eländpunktad rajonas, sidä kesken kaks' lidnad, üks' lidnanvuitte žilo, 21 žilod, nell' raudtestancijan žilod, 231 küläd, kaks' sijašt da kaks' futorad.

Toižed sured eländpunktad oma Pikalövo-lidn (20,5 tuh. rist. vl 2016), lidnanvuitte Jefimovskii-žilo (3,6 tuh. rist. vl 2016) i Bor-külä (1,7 tuh. rist. vl 2014).

Rahvahad (enamba 0,4 % vn 2010 Venäman rahvahanlugemižen mödhe): venälaižed — 86,9 %, ukrainalaižed — 1,0 %, vaugedvenälaižed — 0,5 %, toižed rahvahad — 1,6 %, rahvahuden ozutandata — 10,0 %.

Erased igähižed rahvahad: vepsläižed — 0,20 % (108 rist.), karjalaižed — 0,08 % (45 rist.).

Vepsläižed elädas rajonan pohjoižpäivnouzmas. Tihvinan karjalaižiden — ortodoksižiden vanhuskolaižiden küläd sijadasoiš rajonan suvipäivnouzmas.

Ižanduz

Rajonan ižandusen päsarakod oma alüminijan i himine tegimištod, gazanveimtransport, mecan ümbriradmine, cementan pästand, maižanduz.

Irdkosketused

• Boksitogorskan rajonan oficialine sait (adm.boksitogorsk.ru). (ven.)