Severokuril'sk

lidn Venämas

Severokuril'sk (ven.: Се́веро-Кури́льск, japon.: セベロクリリスク Seberokuririsku, edel 1946. vot — Kasivabar, japon.: 柏原 Kasivabara) om Venäman lidn Sahalinan agjan Paramušir-saren pohjoižes. Se om Severokuril'skan lidnümbrikon administrativine keskuz (edel 2006. vot — rajonan) da üks'jäine elänzoittud eländpunkt.

Severokuril'sk
Северо-Курильск
 Lidnanznam
 Flag
Valdkund Venäma
Eläjiden lugu (2023) 2,439 ristitud
Pind 155 km²
Severokuril'sk Северо-Курильск
Pämez' Aleksandr Ovsännikov
(kezaku 2021—)
Telefonkod +7−42 453-xx-xxx
Avtokod 65
Aigvö UTC+11 (MSK+8)


Lidnan geografine sijaduz saril

Istorii vajehta

Vspäi 1711 Venäman imperijan merimatkadajad tedoižiba Kurilan sarid Petropavlovskaspäi Kamčatkal. Vll 1875−1945 oli Japonijan oficialižeks palaks. Japonijalaižed paniba Kasivabar-žilon alust ainalaižiden Ottomai-külän sijha. Sirtihe ainalaižid Šikotan-sar'he. Nimitihe žilod «Ivaki»-tedoiduzlaivan kapitanan kanzannimen mödhe. Suren sodan aigan AÜV:oiden aviacii bombardirui meriportad da sodalendimportad žilos vspäi 1943. Se sai lidnan statusad vl 1946, nimitihe Kurilan sariden mödhe. Vn 1952 5. päiväl kül'mkud luja (kümne metrad kortte) cunami pani lidnad mantazole, i se om udessündutadud uzil korktusil.

Severokuril'sk šingotase kalantegimišton radol sijaližel torhudel.

Geografijan andmused vajehta

Lidn sijadase Kurilan kahtenden sal'men randal (ven.: Второй Курильский пролив), 30 m ü.m.t. keskmäižel korktusel, Tünen valdmeren Ohotskan meren päivnouzmaižel randal. Matkad Suvisahalinskhasai om 1060 km suvipäivlaskmha orhal, no voib sadas kalalaivištol vai punolendimel vaiše Petropavlovskan Kamčatkal kal't (Kamčatkan rand) 312 km pohjoižpäivnouzmha orhal, se om lähembaine lidn.

Klimat om subarktine meren märg. Voden keskmäine lämuz om +2,8 C°, heinkun-sügüz'kun +10..+12 C°, vilukun-uhokun — −4..−5 C°. Ekstremumad oma −21 C° i +26,4 C°. Paneb sadegid 1844 mm vodes, enamba redukus-kül'mkus (230..248 mm kus), vähemba uhokus-kezakus (107..128 mm kus). Voib panda tuhkad lähižes Ebeko-vulkanaspäi seičemes kilometras.

Baikovo-sodažilo jäb kaikenaigaižeta ristitištota 20. voz'sadan lopuspäi, mülüb lidnümbrikho Severokuril'skan ližaks. Lidnümbrikon pind — 3501,23 km².

Eläjad vajehta

Vn 2010 Venäman rahvahanlugemižen mödhe lidnan eläjiden lugu oli 2 536 ristitud. Kaik 2 587 eläjad oli lidnas vl 2017. Kaikiš suremb lidnan ristitišt oli 7 733 eläjad vl 1959 i 5 180 eläjad vl 1989.

Ortodoksižen hristanuskondan ph. Innokentii Moskvalaižen puine jumalanpert'[1] om letud vll 2003−2005.

Lähembaižed professionaližen opendusen aluzkundad ratas Petropavlovskas Kamčatkal.

Municipaližen ühtnikan pämez' om sen Administracijan pämez'. Edeline lidnümbrikon pämez' om Aleksandr Serebräkov (keväz'ku 2014 — kezaku 2021).

Galerei vajehta

Homaičendad vajehta

  1. Severokuril'skan pühäpertid sobory.ru-saital. (ven.)

Irdkosketused vajehta



Sahalinan agjan lidnad
Aleksandrovsk Sahalinal | Aniv | Dolinsk | Holmsk | Korsakov | Kuril'sk | Makarov | Nevel'sk | Oh | Poronaisk | Severokuril'sk | Suvisahalinsk | Tomari | Uglegorsk