Uglegorsk (Sahalinan agj)

Uglegorsk (ven.: Углего́рск, japon.: ウグレゴルスク Uguregorusku) om Venäman lidn Sahalinan agjan Sahalin-saren päivlaskmas. Se om Uglegorskan lidnümbrikon administrativine keskuz (edel 2017. vot — rajonan).

Uglegorsk
Углегорск

Lidnanznam
Valdkund	Venäma
Eläjiden lugu (2023)	7,686 ristitud
Pämez'	Födor Filin (viluku 2023—)
Telefonkod	+7−42 432-xx-xxx
Avtokod	65
Aigvö	UTC+11 (MSK+8)

Sil sanal voib olda toižid znamoičendoid; miše nähta niid, tulgat tänna.

Istorii

Eländpunktan aluz om pandud 20. voz'sadan augotišes. Vozil 1905−1945 oli Japonijan palaks, nimitihe Esutoro-šičö (japon.: 恵須取支庁). Saudud japonijalaižil cellülozbumagaine kombinat radoi sijaližel torhudel 1990-nzihe vozihesai. Anttihe lidnan statusad vl 1946.

Uglegorsk-lidn šingotase kivihilen i buran hilen samižel ümbrištos tomha verhiže maihe — «Päivnouzmaine kaivuzkompanii» da toižed, i sömtegimištol (leibtegim, oludtegim, kalanümbriradmine), meriport radab.

Geografijan andmused

Lidn sijadase Tünen valdmeren Tataran sal'men päivnouzmaižel randal, 15 m ü.m.t. keskmäižel korktusel. Matkad Suvisahalinskhasai om 240 km suvhe orhal vai 290 km avtotel. Lähembaižed lidnad oma Poronaisk 77 km pohjoižpäivnouzmha orhal vai 220 km avtotedme i Makarov 73 km suvipäivnouzmha orhal vai 270 km avtol.

Lühüd Tuhlänk-jogi om lidnan pohjoižröunaks, nimitihe Masurao-kanalaks japonižen sauvomižen jäl'ghe, lankteb Tataran sal'mhe. Uglegork-jogi (ven.: Углегорка) ümbärdab lidnan päivnouzmpoles i pohjoižespäi kahtes kilometras, lankteb merhe mugažo.

Eläjad

Vn 2010 Venäman rahvahanlugemižen mödhe lidnan eläjiden lugu oli 10 381 ristitud, lidnümbrikon nell' seičemendest. Kaik 9 070 eläjad oli lidnas vl 2017. Kaikiš suremb lidnan ristitišt oli 18 800 eläjad vl 1935 i 19 100 eläjad vl 1992.

Ortodoksižen hristanuskondan kaks' pühäpertid oma avaitud lidnas: Jumalanmaman Vladimiran jumalaižen (om saudud vl 2014) i ph. Joann-edelkävujan sündundan. Sintoizman kahten pühäpertin jändused oma kaičenus.

Lähembaine professionaližen opendusen aluzkund om Sahalinan kaivuztehnikum, sijadase lidnanvuiččes Šahtörsk-žilos kümnes kilometras pohjoižhe, mugažo regionaline lendimport.

Municipaližen ühtnikan pämez' om sen Administracijan pämez'. Edeližed lidnümbrikon pämehed oma Dmitrii Cukanov (tal'vku 2021 — viluku 2023) i Sergei Doroščuk (sulaku 2016 — tal'vku 2021).

Galerei

• 
  Lidnümbrikon tobmuden sauvuz keskuztorgul (2022)
• 
  Jumalanmaman Vladimiran jumalaižen pühäpert', vn 2016 nägu
• 
  Enččen cellülozbumagaižen kombinatan sauvused vl 2010 vai sen aigemba
• 
  Lidnan stadion (2019)
• 
  Kul'turkeskuz (2022)
• 
  Lidnan meriport vl 2008

Irdkosketused

• Lidnan da lidnümbrikon tobmuden aluzkundoiden oficialine sait (uglegorsk.sakhalin.gov.ru). (ven.)
• Lidn da lidnümbrik Sahalinan agjan ohjastusen oficialižel sakhalin.gov.ru-saital. (ven.)
• Lidnan informacine sait (uglegorsk.ru). (ven.)