Oh (lidn)

Oh (ven.: Оха́) om Venäman lidn Sahalinan agjan Sahalin-saren pohjoižes. Se om agjan nellänz' lidn eläjiden lugun mödhe, Ohan lidnümbrikon administrativine keskuz.

Oh
Оха

Lidnanznam	Flag
Valdkund	Venäma
Eläjiden lugu (2020)	20,016 ristitud
Pind	20,98 km²
Pämez'	Jevgenii Mihlik (sügüz'ku 2022—)
Telefonkod	+7−42 437-xx-xxx
Avtokod	65
Aigvö	UTC+11 (MSK+8)

Istorii

Vl 1880 pen' Ohe-žilo (ven.: Охэ) oli olmas kivivoin pindlöudmižsijanno. Ectihe enamba kivivoid, no satusetomašti, i tacihe žilod. Vl 1910 «Zotovan jäl'gnikad da kompanii» löuzi ezmäšt surt kivivoid, no se jäi kävutandata. Vll 1920−1925 Japonii okkupirui Sahalinad, i vl 1921 saihe ezmäšt kivivoid surel mülündal. Nügüdläižen eländpunktan aluz om pandud vl 1925, nimitihe jogen mödhe. Om lidnan statusanke vspäi 1938.

Vl 1942 saudihe «Oh — Komsomol'sk Amural»-kivivoinveimen. Vn 1995 (28. semendku, 7,2-ballaine) Neftegorskan manrehkaiduz mureni Ohan-ki sauvusid paloin. Vspäi 2005 ühtištuihe Ohan rajonad lidnanke, kätihe lidnümbrikoks. Om severz'-se vahtkundan žiloid lidnas ümbri.

Oh-lidn šingotase mehanižel i raudbetonan tegimil, kivivoin i londuseližen gazan samižen Ohotskan meren šel'faspäi äiluguižil projektoil, mugažo Ohan lämuzelektrokeskuz radab.

Geografijan andmused

Lidn sijadase Ohotskan meren Urkt-lahten-järven randal, 30 m ü.m.t. keskmäižel korktusel. Matkad Suvisahalinskhasai om 740 km suvhe orhal vai 850 km avtotedme. Lähembaine raudtestancii sijadase Nogliki-žilos, 230 km suvhe avtotel. Lähembaine lidn om Nikolajevsk Amural (Habarovskan rand) 156 km päivlaskmha orhal. Vll 1999−2006 demontiruihe raudted Noglikišpäi.

Klimat om ven meren, om tazostadud Edahaižen Pohjoižen rajonha vilun Päivnouzmaižsahalinan merijoksmusen tagut. Voden keskmäine lämuz om −0,2 C°, heinkun-elokun +16,1..+16,7 C°, vilukun-uhokun −17,2..−17,9 C°.

Kaik kümne žilod mülüdas lidnümbrikho Ohan ližaks. Ühthemänho 26 eländpunktad om likvidiruidud NSTÜ:n olendan jäl'ghe. Lidnümbrikon pind — 14 815,87 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 23 008 ristitud, lidnümbrikon — 25 855 ristitud. Kaikiš suremb lidnan ristitišt oli 37 000 eläjad vl 1992. Vl 2018 kaik 20 715 ristitud elihe lidnas i 22 612 ristitud kaikes lidnümbrikos.

Ortodoksižen hristanuskondan ph. Sergii Radonežalaižen kivine jumalanpert' om saudud vll 1995−2001.

Sahalinan industrialine tehnikum i Sahalinan valdkundaližen universitetan filial oma lidnan professionaližen opendusen aluzkundoikš.

Lidnümbrikon pämez' om sen Administracijan pämez'. Edeližed Administracijan pämehed oma Jelena Kasjanova (sulaku 2021 — sügüz'ku 2022), Natal'ja Ričkova (kezaku 2020 — sulaku 2021), Sergei Gusev (keväz'ku 2017 — kezaku 2020). Lidnümbrikon Suiman ezimez' om Andrei Silenginskii vn 2018 redukuspäi.

Galerei

• 
  Lidnümbrikon administracijan sauvuz (2018)
• 
  Ph. Sergii Radonežalaižen jumalanpert' (huralpäi) i muštnik Neftegorskan pölištunuzile eläjile (oiktalpäi), vn 2018 nägu
• 
  Kivivoinčibun model' irdal
• 
  Keskškol nomer viž vl 2018
• 
  Lebusija lidnan röunal (2013)

Irdkosketused

• Lidnan da lidnümbrikon tobmuden oficialine sait (adm-okha.ru). (ven.)
• Lidn da lidnümbrik Sahalinan agjan ohjastusen oficialižel sakhalin.gov.ru-saital. (ven.)