Semikarakorsk

Semikarakorsk (ven.: Семикарако́рск) om Venäman lidn da lidnankund Rostovan agjan keskuzpalas. Se om Semikarakorskan rajonan administrativine keskuz.

Semikarakorsk
Семикаракорск

Lidnanznam
Valdkund	Venäma
Eläjiden lugu (2021)	21,719 ristitud
Pind	20 km²
Pämez'	Valentina Naumenko (reduku 2016—)
Telefonkod	+7−86 356-xx-xxx
Avtokod	61, 161
Aigvö	UTC+3 (MSK+0)

Istorii

Hazarine lidnuz oli olmas Sal-jogen lanktendanno Donha 7.-9. voz'sadal, sen jändused-lidnut (ven.: Городище) oma kaičenus. Eländpunkt mainitase ezmäižen kerdan vl 1594 kuti kozakoiden Semikarakori-lidnut (ven.: городок Семикаракоры), nimituz om türkan augotižlibundanke. Mainitase toižen kerdan stanican Frol Minaev-atamanan ozutandoiš Sur'oigenuziden käskuzaluzkundas (Moskv) vl 1672, se voz' lugese alusenpanendan oficialižeks.

Stanic vajehti sijadust severt-se kerdad, ka oli alištunu Donan sur'vezile üks'kaik jogo kevädel. Sirtihe stanicad amuižes lidnusespäi hurarandadme, sid' Donan oiktale randale da tagaz. Eländpunkt om olmas nügüdläižel sijal vspäi 1895, maižandusen sarakod i torguind änikoičiba siš. Vl 1911 Don vajehti vagod stanicanno, edeline vago om Vanh Don-järveks (ven.: озеро Старый Дон) da lidnan pohjoižröunaks. Toižen mail'man sodan aigan stanic oli okkupiruidud nacistoil (keza 1942 — 4.01.1943). Stanic sai lidnan statusad vn 1972 25. päiväl semendkud.

Semikarakorsk šingotase keramikan tehmižel, sömtegimištol (leibänkombinat, konservtegim, saguden tegim, kolbasceh, konditerine ceh), korpusmeblin pästandal, maižanduztehnikan kohendusel i plodunkazvatandtarhal.

Geografijan andmused

Lidn sijadase rajonan lodehes, Donan hural randal i sen huran Sal-ližajogen (ven.: Сал) oiktal randpolel, 10 m ü.m.t. keskmäižel korktusel.

Matkad Rostovhasai Donal om 86 km päivlaskmha-suvipäivlaskmha orhal vai 117 km avtotel. Lähembaine lidn om Konstantinovsk 23 km päivnouzmha-pohjoižpäivnouzmha orhal vai 35 km avtotedme. «Rostov — Volgodonsk»-avtotekeskust ümbärdab lidnad suvespäi. Om ehtatimid Donas päliči.

Tobmuz

Semikarakorsk om lidnankundan üks'jäižeks eländpunktaks. Lidnankundan pind — 109 km², sidä kesken mec 1,5 km², maižanduzma 57 km².

Lidnankundan tobmuden pämez' om sen Deputatoiden nevondkundan ezimez'. Edeline nevondkundan ezimez' om Ivan Jesin, radoi edel vn 2016 redukud. Lidnan Administracijan pämez' om Aleksandr Černenko vn 2009 keväz'kuspäi.

Eläjad

Vl 1939 stanican ristitišt oli 5 900 eläjad. Vn 2010 Venäman rahvahanlugemižen mödhe lidnan eläjiden lugu oli 23 884 ristitud, rajonan nell' ühesandest. Kaik 22 118 eläjad oli lidnas vl 2017. Kaikiš suremb lidnan ristitišt oli 23..24 tuhad eläjid vll 1992−2013 (24 200 rist. vll 1998 i 2001).

Rahvahad (2010): venälaižed — 92,9 %, ukrainalaižed — 2,2 %, armenijalaižed — 1,3 %, toižed rahvahad — 3,6 %.

Ortodoksižen hristanuskondan nell' pühäpertid oma kaičenus i saudud lidnas: kaks' jumalanpertid da kaks' časounäd.

Opendusen aluzkundad oma kümne päivkodid, koume keskškolad, lapsiden čomamahtoiden škol, lapsiden da alaigäčuiden sportškol. Semikarakorskan agrotehnologine tehnikum om lidnan professionaližen opendusen aluzkundaks.

Galerei

• 
  Jumalanmaman Donan jumalaižen časoun', vn 2019 nägu
• 
  Keramikan edheotandan tulend vl 2019
• 
  Sijaline torguz («jarmank», 2019)
• 
  Lidnan avtobusstancii vl 2018

Irdkosketused

• Lidnan tobmuden aluzkundoiden sait (semikarakorsk-adm.ru) (ven.)
• Lidnan istorijan i keramikan tehmižen muzei (семикаракорская-керамика.рф). (ven.)