Port-o-Prens

Port-o-Prens (franc.: Port-au-Prince «„Princ“-laivan port», hait.: Pòtoprens) om Haitin pälidn da kaikiš suremb lidn. Se om valdkundan tegimišton keskuz. Kaik valdkundan üläopendusen aluzkundad sijadasoiš täs.

Port-o-Prens
Port-au-Prince (franc.)
Pòtoprens (hait.)

Valdkund	Haiti
Eläjiden lugu (2015)	987,310 ristitud
Pind	36,04 km²
Pämez'	Ral'f Juri Hevri (viluku 2010—)
Telefonkod	+509
Aigvö	UTC−5

Istorii

Eländpunktan aluz om pandud vl 1749, oli kolonijan pälidnaks vspäi 1770.

Lidn eli läbi lujas manrehkaiduses vn 2010 12. päiväl vilukud (7 magnitudanke), enamba 200 tuh. eläjid pölištuiba, Port-o-Prens ezilidnoidenke oliba pandud mantazole läz täuzin.

Geografijan andmused

Lidn sijadase Kariban meren Gonav-lahten ühtennimižen merikaran sättujal laivištole randal, 98 m keskmäižel korktusel valdmeren pindan päl. Kommertine keskuz om mererandal, eländfartalad ülenudas vastmägehe amfiteatral. Lidn alištub meritorokoile, sur'vezile i reduvaluile. Elokaz Petionvill'-ezilidn om saudud suvipäivnouzmas kukhiden pautkil.

Klimat om tropine passatine. Päivän lämuz om +25..+28 C° vodes läbi. Paneb sadegid 1350 mm vodes, oleskeleb vihmsezonoid sulakus-kezakus i sügüz'kus-kül'mkus.

Eläjad da transport

Vl 2009 lidnan eläjiden lugu oli 897 859 ristitud, ezilidnoidenke 2,3 mln ristituid. Vl 2015 2,6 mln eläjid oli 158,5 km² pindal, valdkundan nelländez. Eläjiden ühesa kümnendest oma afrikalaižed, 9% — mulatad.

Kebnavtod konor'anke i «tap-tap»-taksid oma kundaližeks transportaks lidnas. Meriport radab, saharan da kofen eksport. Rahvahidenkeskeine civiline Tussen-Luvertüran nimel nimitadud lendimport (PAP) sijadase Port-o-Prensan pohjoižes, tehtas reisid Kariban meren maihe, Majamihe, Monrealihe i Parižha.