Sent Džons

Sent Džons (angl.: St. John's) om Antiguan da Barbudan pälidn i kaikiš suremb lidn. Se om Sent Džon-tulendan administrativine keskuz mugažo.

Sent Džons
St. John's

Valdkund	Antigua da Barbud
Eläjiden lugu (2013)	21,926 ristitud
Pind	10 km²
Telefonkod	+1−268
Aigvö	UTC−4

Istorii

Eländpunktan aluz om pandud anglijalaižil vl 1632. Šingotihe saharrogon ümbriradmižel 18. voz'sadan keskespäi. Lidn oli alištunu manrehkaidusile vll 1690 i 1843, eli läbi vn 1769 lämoipalos, vn 1847 torok mureni lidnad.

Sent Džons om ripmatoman valdkundan pälidnaks vn 1981 kül'mkuspäi. Vn 1995 Luis-torok mureni lidnan turistišt infrastrukturad. Lidn šingotase turizmal i torguindal, investicijoiden bankingal, roman edheotandal.

Geografijan andmused

Lidn sijadase valdkundan suvižen Antigua-saren pohjoižes-lodehes. Meriport i letkesižed kül'bendrandad oma Sent Džonsas.

Klimat om tropižen savannan. Kun keskmäine lämuz om +25..+28 C° vodes läbi. Ekstremumad oma +15 C° i +34 C°. Paneb sadegid 1049 mm vodes, enamba sügüz'kus-kül'mkus (131..142 mm kus), vähemba uhokus-keväz'kus (45..46 mm kus).

Eläjad

Vn 2011 rahvahanlugemižen mödhe lidnan eläjiden lugu oli 22 219 ristitud, valdkundan nelländez.

Rahvahidenkeskeine civiline lendimport V.K. Bördan nimed (ANU / TAPA, läz 1 mln passažiroid vl 2018) om kahesas kilometras pohjoižpäivnouzmha lidnaspäi. Tehtas reisid AÜV:oiden i Kanadan järedoihe lidnoihe, Londonha, Kariban regionan saridme. Punolendimport radab lidnas.

Vest-Indijan universitetan fakul'tetad anttas üläopendust. Sent-Džonsan valdkundaline kolledž pästab tedajid menedžmentan sferas, tropižes maižanduses, vilugoitimiden i elektromašiništon ladijoid. Kaks' mediciništ školad ratas lidnas.