Meleuz

Meleuz (ven.: Мелеуз, bašk.: Мәләүез, tot.: Мәләвез) om Venäman lidn da lidnankund Baškortostanan Tazovaldkundan suves. Se om Meleuzan rajonan administrativine keskuz da pala.

Meleuz
Мелеуз (ven.)
Мәләүез (bašk.)

Valdkund	Venäma
Eläjiden lugu (2018-01-01)	58 004 ristitud
Pind	35,84 km²
Pämez'	Fanil' Iskužin (2 006—)
Telefonkod	+7-34 764-xx-xxx
Avtokod	02, 102
Aigvö	UTC+5 (MSK+2)

Istorii

Eländpunktan aluz om pandud torguindkülähä Orenburgan traktal 18. voz'sadan kahtendes poles, nimitihe jogen mödhe. Saudihe kuivatud maidon tegint da kätihe radnikžiloks vl 1939. Radnikžilo sai lidnan statusad vl 1958. Šingotaškanzihe teravas vspäi 1973 järedan himižen tegimen sauvondan tagut.

Meleuzan ižandusen päsarakod oma himine (mineraližiden heretusiden tegim), sauvondmaterialiden (raudbeton, pumaterialad, lämuzizoläcii) i sömtegimišt (maidkonservad, sahar, surmiden pakuitez), mugažo gazan da kivivoin kompanijoiden objektoiden sauvondedheotand.

Geografijan andmused

Lidn sijadase Vaugedjogen hural randal tobjimalaz, 170 m ü.m.t. keskmäižel korktusel. Pened Meleuz- i Karan-joged lanktas Vaugedjogehe huralpäi. Matkad Ufahasai om 195 km pohjoižhe orhal vai 210 km avtotedme. Lähembaine lidn om Kumertau 18 km suvhe. Meleuz-raudtestancii om olmas «Uf — Orenburg»-jonol vspäi 1951.

Meleuz om lidnankundan üks'jäine eländpunkt.

Eläjad

Vn 2010 kaiken Venäman rahvahanlugemižen mödhe eläjiden lugu oli 61 390 ristitud, rajonan seičeme kümnendest. Kaikiš suremb ristitišt oli 60..62 tuhad eläjid vozil 1996−2014 (62 949 rist. vl 2002).

Rahvahad (enamba 1% vl 2010, ozutadud rahvahudenke): venälaižed — 47,9%, baškiralaižed — 29,1%, totarlaižed — 15,8%, čuvašalaižed — 3,8%, ukrainalaižed — 1,3%, toižed rahvahad — 2,1%.

Irdkosketused

• Lidnan tobmuden aluzkundoiden oficialine sait (meleuzadm.ru). (ven.)
• Lidnankundan lehtpol' Meleuzan rajonan oficialižel saital (meleuz.bashkortostan.ru). (ven.)