Neftekamsk

Neftekamsk (ven.: Нефтека́мск, nitmar.: Нефтекамск, bašk. i tot.: Нефтекама) om Venäman lidn da lidnümbrik Baškortostanan Tazovaldkundan lodehes. Se om tazovaldkundan nellänz' surtte lidn.

Neftekamsk
Нефтекамск (ven.)
Нефтекама (bašk.)

Lidnanznam	Flag
Valdkund	Venäma
Eläjiden lugu (2021)	131,942 ristitud
Pämez'	El'dar Validov (uhoku 2022—)
Telefonkod	+7−34 783-xx-xxx
Avtokod	02, 102
Aigvö	UTC+5 (MSK+2)

Istorii

Eländpunktan aluz om pandud vl 1957 kuti geologiden žilo samha kivivoid Arlanan löudmižsijaspäi. Radnikžilo sai lidnan statusad vl 1963. Aigan mändes ižanduz šingotaškanzihe erazvuiččikš, saudihe järedad Karmanovon GRES:ad (1968, andab tazovaldkundan elektrusen kaht videndest), ratud nahkoiden tegint (VAZ:an täht, vspäi 1970, «Iskož»), avtotegint (1977, kumaidaiavtod KAMAZ:an alusel i «NefAZ»-markan avtobusad).

Neftekamskan tehmišton toižed sarakod oma mašinansauvomine (burauduzinstrument, «Metrotest» — laboratoriimašiništ i ladimed), sauvondmaterialiden pästand (keramižen savičun tegim, Amzin meckombinat) i sömtegimišt.

Geografijan andmused

Lidn sijadase Kamanjogen hural randpolel (Volgan bassein), 100 m ü.m.t. keskmäižel korktusel.

Matkad jogehesai om kuz' kilometrad lodeheze lidnaspäi, Ufahasai om 185 km suvipäivnouzmha orhal vai 215 km avtotedme. Lähembaižed lidnad oma Kambark (Udmurtii) 20 km pohjoižhe i Agidel' 30 km suvipäivlaskmha orhal.

Tobmuz

Amz'-, Energetik-, Taškinovo-žilod da nell' küläd mülüdas lidnümbrikho Neftekamskan ližaks. Lidnümbrikon pind — 147,25 km².

Lidnümbrikon pämez' om sen nevondkundan ezimez'. Lidnan Administracijan edeližed pämehed oma Rašit Davletov (sulaku 2014 — keväz'ku 2019), Ratmir Mavliev (keväz'ku 2019 — uhoku 2022).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 121 733 ristitud, lidnümbrikon — 133 535 ristitud. Kaik 126 805 eläjad oli lidnas i 138 314 eläjad kaikes lidnümbrikos vl 2017. Kaikiš suremb lidnan i lidnümbrikon ristitišt om nügüd' (2021).

Rahvahad (enamba 1 % vl 2010, ozutadud rahvahudenke): totarlaižed — 31,5 %, venälaižed — 29,7 %, baškiralaižed — 25,8 %, marilaižed — 9,9 %, toižed rahvahad — 3,1 %.

Lapsiden opendusen aluzkundad oma 42 päivkodid, 17 keskškolad, gimnazii, baškiran gimnazii, licei, norišton pert'kulu, lapsiden da norišton sädamižen šingotesen keskuz. Professionaližen opendusen aluzkundad oma Neftekamskan kolledžad (kivivoin, pedagogine, mašinansauvomižen, äiprofil'ne), Baškortostanan üläopendusen aluzkundoiden severz'-se filialoid.

Transport

Avtobusad da taksid oma kundaližeks transportaks lidnas. Neftekamsk-jügustancii (vspäi 1964) da Neftekamsk-passažirstancii oma raudtesarakol Agidel'-lidnhasai «Kazan' — Jekaterinburg»-keskustan Anz'-stancijaspäi.

Neftekamsk-lendimport (NEF / UWUF / НФК) sijadase kudes kilometras pohjoižpäivnouzmha lidnan keskusespäi, vspäi 2011 ei ole kaikenaigaižid reisid.

Galerei

• 
  «Arsenal»-bobuštuzkeskuz (2008)
• 
  Milicijan sauvused (2009)
• 
  Islaman pühäpert' Energetik-žilos, vn 2014 nägu
• 
  Phh. Pedroin da Pauloin kafedraline päjumalanpert', vn 2013 nägu (om saudud vll 1825−1845)
• 
  Karmanovon GRES vl 2008
• 
  «Metrotest»-kompanijan sauvuz vl 2019
• 
  Baškirijan valdkundaline universitet, Neftekamskan filial (2019)
• 
  Lidnan kul'turkeskuz (2013)
• 
  Neftekamskan filarmonijan sauvuz (2007)
• 
  Neftekamsk-lendimport vl 2015

Irdkosketused

• Lidnümbrikon Nevondkundan oficialine sait (sovetneftekamsk.ru). (ven.)
• Lidnan administracijan oficialine sait (neftcity.ru). (ven.) (bašk.)