Tuimazi

Tuimazi (ven.: Туймазы́, bašk. i tot.: Туймазы) om Venäman lidn da lidnankund Baškortostanan Tazovaldkundan päivlaskmas. Se om Tuimazin rajonan administrativine keskuz.

Tuimazi
Туймазы (ven. i bašk.)

Lidnanznam	Flag
Valdkund	Venäma
Eläjiden lugu (2020)	68,246 ristitud
Pind	42,4 km²
Pämez'	Eduard Rahmatullin (2012−2013, keväz'ku 2016—)
Telefonkod	+7−34 782-xx-xxx
Avtokod	02, 102
Aigvö	UTC+5 (MSK+2)

Istorii

Eländpunktan aluz om pandud vl 1912 raudtežiloks sauvomha da holitamha «Simbirsk — Uf»-raudted. Se sai lidnan statusad vl 1960.

Nevondkundaližes aigaspäi lidn om tegimišton järed keskuz: himine sarak (sijaližen kivivoingazan ümbriradmine substancijoihe), mašiništonsauvomine (kivivoin samižen i energetikan täht, betonmašiništ), sauvondmaterialiden pästand (torved, raudbetontegesed, savič, vahtbeton), pakuitesen tehmine (kartonkombinat i koume plastikpakuitesen edheotandad), meblin koume fabrikad, sömtegimišt (lihakombinat, konditerine fabrik).

Geografijan andmused

Lidn sijadase Usen'-jogen hural randal tobjimalaz (bašk.: Өҫән, Ik-jogen oigedpol'ne bassein), 120 m ü.m.t. keskmäižel korktusel. Matkad Tatarstanan röunhasai om seičeme kilometrad lodeheze, Ufahasai — 145 km päivnouzmha orhal vai 175 km «Ural»-trassadme (M5). Lähembaine lidn om Oktäbr'skii kümnes kilometras suvipäivlaskmha.

Klimat om ven kontinentaline. Heinkun lämuz +20,9 C°, vilukun da uhokun — −11 C°, voden keskmäine lämuz +4,3 C°. Ekstremumad oma −27 C° i +32 C°. Paneb sadegid 467 mm vodes, oleleb niid vähemba kül'mkus-sulakus (23..34 mm kus).

Tuimazi om lidnankundan üks'jäižeks eländpunktaks.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 66 836 ristitud, rajonan ristitišton pol'. Kaikiš suremb lidnan ristitišt oli 68 587 eläjad vl 2019.

Rahvahad (enamba 1 % vl 2010, ozutadud rahvahudenke): totarlaižed — 46,8 %, venälaižed — 25,2 %, baškiralaižed — 22,0 %, marilaižed — 2,1 %, čuvašalaižed — 1,7 %, toižed rahvahad — 2,2 %.

Tuimazin pedagogine, medicinine, industrialine i valdkundaline juridine kolledžad oma lidnan professionaližen opendusen aluzkundoikš.

Galerei

• 
  «Sputnik»-kinokompleks (2019, Kaimdai)
• 
  «Al'-Fatiha»-mečet', vn 2014 nägu
• 
  Tuimazin valdkundaline tataran dramteatr (2019)
• 
  Universaline «Tuimazi-arena»-sportkompleks (2019)
• 
  Tuimazi-raudtestancijan ted vl 2016

Irdkosketused

• Tuimazi-lidnan tobmuden aluzkundoiden oficialine sait (gp-tmz.ru). (ven.)
• Lidnan istorijan lehtpol' Tuimazin rajonan oficialižel tuimazy.bashkortostan.ru-saital. (ven.)