Dürtüli

Dürtüli (ven.: Дюртюли́, bašk.: Дүртөйлө, tot.: Дүртөйле) om Venäman lidn da lidnankund Baškortostanan Tazovaldkundan lodehes. Se om Dürtülin rajonan administrativine keskuz.

Dürtüli
Дюртюли (ven.)
Дүртөйлө (bašk.)

Lidnanznam
Valdkund	Venäma
Eläjiden lugu (2020)	31,021 ristitud
Pind	25 km²
Pämez'	Il'mir Gareev (kül'mku 2016—)
Telefonkod	+7−34 787-xx-xxx
Avtokod	02, 102
Aigvö	UTC+5 (MSK+2)

Istorii

Eländpunkt mainitase vspäi 1786, nimi kändase «nell'pertine külä» baškiran kelespäi. 1957-ndel vodel ottaškanzihe kävutamižhe kivivoin lähišt Mančar-löudmižsijad. Kätihe Dürtülid lidnanvuiččeks žiloks vl 1964, se šingotaškanzi kivivoin samižen holitižkeskuseks. Žilo sai lidnan statusad vl 1989.

Kivivoin edheotand radab Dürtüliš tähäsai. Sauvondmaterialiden pästandan edheotandad (raudbetontegesed, savič) da sömtegimišt (maidproduktoiden kombinat i lihakombinat) oma olmas lidnas mugažo.

Geografijan andmused

Lidn sijadase Vaugedjogen hural randal, 101 m ü.m.t. keskmäižel korktusel. Matkad Ufahasai om 108 km suvipäivnouzmha orhal vai 122 km «Volg»-avtotedme (M7, «Jarčalli — Uf»-pala). «Volg»-trass mäneb vides kilometras suvipäivlaskmha lidnaspäi. Lähembaine lidn om Birsk 45 km päivnouzmha avtotedme.

Pen' Argamak-külä (bašk.: Арғымаҡ, 385 rist. vl 2017) mülüb lidnankundha Dürtülin ližaks.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 31 274 ristitud, lidnankundan — 31 725 ristitud, rajonan ristitišton pol'. Vspäi 1996 eläjiden lugu om läz kaikenaigaine, 30..31 tuhad (31 665 rist. vl 2008).

Rahvahad (enamba 1%, vl 2010, ozutadud rahvahudenke): totarlaižed — 64,1%, baškiralaižed — 23,2%, venälaižed — 9,6%, marilaižed — 1,6%, toižed rahvahad — 1,5%.

Islaman «Miras»-pämečet' om avaitud lidnas. Ortodoksižen hristanuskondan ph. Suren Vasilijan jumalanpert' om letud lidnas vll 2004−2019.

Dürtülin äiprofil'ne kolledž om professionaližen opendusen aluzkundaks.

Irdkosketused

• Lidnan tobmuden aluzkundoiden oficialine sait (djurtjuli.ru). (ven.)
• Lidnan i Dürtülin rajonan oficialine sait (durtuli.bashkortostan.ru). (ven.)