Blagoveščensk (Baškortostan)

Blagoveščensk (ven.: Благовещенск, bašk. i tot.: Благовещен) om Venäman lidn da lidnankund Baškortostanan Tazovaldkundan keskuzpalan pohjoižes, Ufan pohjoine ezilidn. Se om Blagoveščenskan rajonan administrativine keskuz, mülüb sihe vspäi 2005.

Blagoveščensk
Благовещенск (ven.)
Благовещен (bašk.)

Lidnanznam	Flag
Valdkund	Venäma
Eläjiden lugu (2020)	34,771 ristitud
Pind	65 km²
Pämez'	Sergei Zavgorodnii (tal'vku 2019—)
Telefonkod	+7−34 766-xx-xxx
Avtokod	02, 102
Aigvö	UTC+5 (MSK+2)

Sil sanal voib olda toižid znamoičendoid; miše nähta niid, tulgat tänna.

Istorii

Eländpunktan aluz om pandud kuti Blagoveščenskii zavod-külä (pagin. ven.: Благзавод) vas'kentegimenno vodel 1756. Kätihe radnikžiloks vl 1931. Žilo sai lidnan statusad nügüdläiženke nimenke vl 1941.

Blagoveščensk šingotase sauvondmaterialiden pästandal (armatur, raudbeton, lämuzizoläcii, asfal't), poliefiran kompleksal, pakuitesen pästandal (gofriruidud karton, plastikmülüd), Ufanverižel LEK:al (ven.: Приуфимская ТЭЦ), laivankohendusen tegimel, «Tehnostandart»-edheotandal (boltad kingitimidenke).

Geografijan andmused

Lidn sijadase Vaugedjogen oiktal randal (Kaman hurapol'ne bassein), 120 metrad keskmäižel korktusel valdmeren pindan päl. Matkad Ufan keskushesai om 42 km suvhe orhal, tazovaldkundan pälidnan röunhasai om vähemb mi 10 km.

Blagoveščensk om lidnankundan üks'jäine eländpunkt.

Eläjad

Vn 2010 kaiken Venäman rahvahanlugemižen mödhe eläjiden lugu oli 34 239 ristitud, rajonan ristitišton seičeme kümnendest. Kaikiš suremb ristitišt oli 35 037 eläjad vl 2016.

Rahvahad (enamba 1% vl 2010, ozutadud rahvahudenke): venälaižed — 62,8%, totarlaižed — 15,5%, baškiralaižed — 14,0%, marilaižed — 4,8%, toižed rahvahad — 2,9%.

Islaman «Tan Čulpan»-mečet' om olmas lidnas, mugažo «Nur-Muhammet»-pämečetin kund om registriruidud. Ortodoksižen hristanuskondan koume jumalanpertid oma letud lidnas, niiden kesken Jumalanmaman Blagoveššenjan vanh puine i uz' kivine (2014−2016) pühäpertid.

Blagoveščenskan äiprofil'ne profkolledž i Baškiran arhitekturan, sauvondan da kommunaližen ižandusen kolledž (Blagoveščenskan filial) oma professionaližen opendusen aluzkundoikš.

Edeline lidnan Administracijan pämez' om Rustam Badikšanov (ven.: Рустам Бадыкшанов, reduku 2012 — reduku 2019).

Galerei

• 
  Blagoveščenskan rajonan tobmuden sauvuz (2018)
• 
  Lidnan kul'turkeskuz (2018)
• 
  Blagoveščenskan armaturantegim vl 2010 (istorine vas'kentegim)
• 
  Poliefiran kompleks vl 2022
• 
  Tegimen Daškovad-pidajiden usadib vl 2012

Irdkosketused

• Lidnan tobmuden aluzkundoiden sait (adminblagov.ru). (ven.)
• Blagoveščenskan rajonan tobmuden sait (blagoveshensk.bashkortostan.ru). (ven.)