Baimak

Baimak (ven.: Байма́к, bašk.: Баймаҡ) om Venäman lidn da lidnankund Baškortostanan Tazovaldkundan suvipäivnouzmas. Se om Baimakan rajonan administrativižeks keskuseks, mülüb rajonha vspäi 1994.

Baimak
Баймак (ven.)
Баймаҡ (bašk.)

Valdkund	Venäma
Eläjiden lugu (2021)	17,833 ristitud
Pämez'	Oksana Ponomaröva (uhoku 2021—)
Telefonkod	+7−34 751-xx-xxx
Avtokod	02, 102
Aigvö	UTC+5 (MSK+2)

Istorii

Eländpunktan aluz om pandud vl 1748 kuti Tanalikovo-Baimak-külä, sen ümbrišt oli vas'ken kaivuzbazaks lähižen kahten vas'kentegimen täht. 19. voz'sadan keskes löutihe kuldad külänno, ristitud tuliba elämhä toižiš regionišpäi. Vl 1928 külä kändihe radnikžiloks. Žilo sai lidnan statusad nügüdläiženke nimenke vl 1938.

Baimakan tegimišton päsarakod oma mašiništonsauvomine (valamiž-mehanine tegim), sauvond, sömtegimišt.

Geografijan andmused

Baimakan rajonan sijaduz tazovaldkundas vn 2010 kartal

Lidn sijadase Tanalik-jogen üläjoksmusen randal (bašk.: Таналыҡ 225 km pitte, ven.: Таналы́к, Uralan oiged ližajogi) da Suvižen Uralan Irendik-mägisel'gan pautkil, 500 m ü.m.t. keskmäižel korktusel.

Matkad Ufhasai om 285 km lodeheze orhal vai 430 km avtotedme. Lähembaine lidn om Sibai 34 km pohjoižpäivnouzmha avtotedme.

Tobmuz

Lidnankundan sijaduz rajonas (2015)

Baimak om lidnankundan üks'jäižeks eländpunktaks. Lidnankundan pind om 138,78 km².

Edeline lidnan nevondkundan ezimez' om Gennadii Davidov (keväz'ku 2012 — viluku 2021).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 17 710 ristitud, rajonan eläjiden koumandez, vn 2021 — 17 833 ristitud. Kaik 17 529 eläjad oli lidnas vl 2017. Kaikiš suremb lidnan ristitišt oli 20..21 tuhad eläjid vozil 1944−1947. Vspäi 1989 kaik 16..18 tuhad ristituid elädas lidnas.

Rahvahad (enamba 1 % vl 2010): baškiralaižed — 71,6 %, venälaižed — 21,3 %, totarlaižed — 5,1 %, toižed rahvahad — 2,0 %.

Islaman pühäpert' om avaitud lidnas. Ortodoksižen hristanuskondan nell' pühäpertid oma väges lidnas: Jumalanmaman tulendan Pühäpertihe jumalanpert' i koume časounäd (niišpäi kaks' kaumžomal).

Lapsiden opendusen aluzkundad oma severz'-se päivkodid, aluzškol (nomer 5), koume keskškolad (nomer 1, 2, 3), licei nomer 4, licei-internat, čomamahtoiden škol. Professionaližen opendusen aluzkundad: Uralantagaine agrotegimištoline kolledž (baziruiše Baimakas), Ufan poltusiž-energetižen kolledžan filial.

Transport

Avtobusad, maršruttaksid da taksid oma kundaližeks transportaks lidnas.

Galerei

• 
  Islaman pühäpert' Baimak-lidnas, vn 2016 nägu
• 
  Jumalanmaman tulendan Pühäpertihe jumalanpert', vn 2013 nägu
• 
  Fizkul'turine «Bogatir'»-tervehtamižkompleks (2014, Vägimez')

Irdkosketused

• Lidnan tobmuden aluzkundoiden oficialine sait (gpbaimak.ru). (ven.)