Belöv

Belöv (ven.: Белёв) om Venäman lidn da lidnankund Tulan agjan päivlaskmas. Se om Belövan rajonan administrativine keskuz. Om «sodavahvuden lidn»-arvnimenke vn 2015 tal'vkuspäi.

Belöv
Белёв

Lidnanznam	Flag
Valdkund	Venäma
Eläjiden lugu (2018)	13,180 ristitud
Pind	8,58 km²
Pämez'	Vladimir Koristov (reduku 2014—. Владимир Корыстов)
Telefonkod	+7−48 742-xx-xxx
Avtokod	71
Aigvö	UTC+3 (MSK+0)

Istorii

Eländpunkt mainitase ezmäižen kerdan aigkirjas vl 1147. Oli alištunu Suren Litvanman ruhtinazkundale 14.-15. voz'sadoil. Lidn oli Belövan ruhtinazkundan keskuseks (1390-nded voded — 1558), sid' oli alištunu Moskvan tobmudele. Belövan lidnuz oli tarbhaine 16.-17. voz'sadoil. Sai makundan lidnan oficiališt statusad vl 1777. Toižen mail'man sodan aigan lidn oli okkupiruidud nacistoil, päzutihe vn 1941 31. päiväl. tal'vkud, no Belövan rajonan okkupacii jätkustui vn 1943 heinkuhusai.

Belöv šingotase mašinansauvomižel (kaluišt i mašiništ raudtetransportan täht), sömtegimištol (leibtegim, koditerine edheotand, šoidukahan jablokpastilan tehmižen äiluguižed edheotandad), omblendfabrikoil, kružavan pästandal. Nevondkundaližen aigan savičtegim, terazkonstrukcijoiden tegim, mebel'fabrik i puruvedimdepo oliba olmas.

Geografijan andmused

Lidn sijadase rajonan keskuzpalan päivlaskmas, Okan hural randal (ven.: Ока, Volgan oigedpol'ne bassein), 165 m ü.m.t. keskmäižel korktusel. Matkad Kalugan agjhasai om 10 km päivlaskmha orhal. Matkad Tulhasai om 107 km pohjoižpäivnouzmha orhal, 125 km avtotel vai 190 km raudtel. Lähembaižed lidnad oma Bolhov (Orelan agj) 42 km suvhe orhal vai 50 km avtotedme, Kozel'sk (passažirraudtestancii, Kalugan agj) 34 km lodeheze orhal, 41 km avtotedme vai 39 km raudtedme, i Čekalin 35 km pohjoižhe orhal, 40 km avtotedme vai 71 km raudtedme. Belöv-raudtestancii radab lidnan lodehes vspäi 1899, se om vaiše juguiden täht vspäi 2016.

Belöv om lidnankundan üks'jäine eländpunkt. Lidnankundan pind — 11,46 km².

Eläjad

Vl 1897 lidnan ristitišt oli 9 600 eläjad, vl 1939 — 17 602 eläjad. Vn 2010 Venäman rahvahanlugemižen mödhe lidnan eläjiden lugu oli 13 918 ristitud, rajonan kaks' koumandest. Kaikiš suremb lidnan ristitišt oli 17..18 tuhad eläjid vll 1939−2000 (päiči sodas, 18 345 rist. vl 1989). Ortodoksižen hristanuskondan Spasan Toižetamižen mez'jumalankodi (vspäi 1525), Ristan Zdviženjan naižjumalankodi (zavottihe läz 1625. vot), ph. Stroican päjumalanpert' i kahesa jumalanpertid oma olmas lidnas.

Professionaližen opendusen aluzkundad oma kaks' filialad: Tulan proftehnologijoiden da servisan kolledžan filial i Tulan agjan medicinižen kolledžan filial.

Galerei

• 
  Ristan Zdviženjan naižjumalankodi
• 
  Dorofejev-torgovanan istorine pert'
• 
  Raudtestancijan sauvuz
  (vn 2016 nägu)

Irdkosketused

• Lidnan da rajonan tobmuden aluzkundoiden sait (belev.tularegion.ru). (ven.)