Bolhov

Bolhov (ven.: Бо́лхов) om Venäman lidn da lidnankund Orelan agjan pohjoižes. Se om Bolhovan rajonan (vspäi 1928) administrativine keskuz da pala.

Bolhov
Болхов

Lidnanznam
Valdkund	Venäma
Eläjiden lugu (2023)	9,359 ristitud
Pind	13,98 km²
Pämez'	Natal'ja Tolpigina (reduku 2024—, velgusentäutai)
Telefonkod	+7−48 640-xx-xxx
Avtokod	57
Aigvö	UTC+3 (MSK+0)

Istorii

Eländpunkt mainitase ezmäižen kerdan kuti polttud vl 1196 lidnuz. Oli Bolhovan ruhtinazkundan keskuseks (13. voz'sadan kahtenz' pol' — 15. voz'sada), sid' alištui Moskvan tobmudele. Mainitase kuti lidnuz Venäman suviröunal vl 1556. Bolhov sai makundan lidnan statusad vl 1778. Toižen mail'man sodan aigan lidn oli okkupiruidud nacistoil, päzutihe sidä vn 1943 29. päiväl heinkud.

Bolhov šingotase pol'veimiden ladimiden tegimel i sömtegimištol (saguden tegim, leibänkombinat, fruktploduiden da maploduiden edheotand).

Geografijan andmused

Lidnan sijaduz rajonas i agjas (2006)

Lidn sijadase rajonan keskuzpalas, Nugr'-jogen randal (ven.: Нугрь 100 km pitte, Okan üläjoksmusen hura ližajogi), 180 m ü.m.t. keskmäižel korktusel.

Matkad Orelhasai om 53 km suvhe orhal vai 59 km avtotel. Toine lähembaine lidn om Mcensk 43 km päivnouzmha-suvipäivnouzmha orhal vai 50 km avtotedme.

Kaik 51 irdad, 27 kujod i kaks' torgud oma nimitadud lidnas.

Tobmuz

Bolhov om lidnankundan üks'jäižeks eländpunktaks. Lidnankundan pind — 13,98 km².

Lidnankundan tobmuden pämez' om sen Administracijan pämez'. Edeližed lidnan Administracijan pämehed oma Vladimir Avilov (reduku 2021 — heinku 2024), Boris Skvorcov (reduku 2016 — reduku 2021). Lidnan Rahvahandeputatoiden nevondkundan ezimez' om Artöm Alenin vn 2022 elokuspäi.

Eläjad

Vl 1897 lidnan ristitišt oli 21 446 eläjad, vl 1939 — 12 681 eläjad. Vn 2010 Venäman rahvahanlugemižen mödhe lidnan eläjiden lugu oli 11 421 ristitud, rajonan kaks' koumandestvl 2021 — 9 495 ristitud. Kaik 11 154 eläjad oli lidnas vl 2017. Kaikiš suremb lidnan ristitišt oli 25 100 eläjad vl 1913 i 13 500 eläjad vl 1998.

Rahvahad (2010): venälaižed — 97,2 %, toižed rahvahad — 2,8 %.

Rahvahad (enamba 0,4 % vl 2021): venälaižed — 93,4 %, ukrainalaižed — 0,5 %, armenijalaižed — 0,4 %, azerbaidžanlaižed — 0,4 %, toižed rahvahad — 2,5 %, rahvahuden ozutandata — 2,8 %.

Ortodoksižen hristanuskondan üks'toštkümne pühäpertid oma kaičenus i saudud lidnas: Optinan naižjumalankodi, kaks' päjumalanpertid i kahesa jumalanpertid.

Lapsiden opendusen aluzkundad oma nell' päivkodid (nomer 1,2,4 i Lučik «sädegut»), aluzškol (nomer 2), lidnan gimnazii, keskškol (nomer 3), lapsiden sädamižen pert', čomamahtoiden škol, lapsiden da norišton sportškol (kikboksing, motokross, biatlon, futbol). Professionaližen opendusen aluzkundad oma Bolhovan pedagogine kolledž i Orelan agrobiznesan da servisan tehnikum — Bolhovan filial.

Galerei

• 
  Znam lidnan röunal (2017)
• 
  Optinan naižjumalankodin sein lidnas, vn 2017 nägu
• 
  Spasan Toižetamižen päjumalanpert', vn 2010 nägu (om saudud vll 1841−1851)
• 
  Tehnikuman sauvuz (2012)
• 
  Bolhovan kodirandantedištandmuzei vl 2012

Irdkosketused

• Lidnankundan tobmuden sait (bolhov-adm.ru). (ven.)