Lipki (lidn)

Lipki (ven.: Ли́пки) om Venäman lidn da lidnankund Tulan agjan keskuzpalas. Mülüb Kirejevskan rajonha, sen kahtenz'-koumanz' surtte lidn.

Lipki
Липки

Valdkund	Venäma
Eläjiden lugu (2018)	8,541 ristitud
Pind	10 km²
Pämez'	Natal'ja Strukova (kezaku 2017—)
Telefonkod	+7−48 754-xx-xxx
Avtokod	71
Aigvö	UTC+3 (MSK+0)

Istorii

Ende Lipki-külä oli lidnan sijas 17. voz'sadaspäi. Buran hilen samine zavodiše külänno 1940-nzil vozil.

Nügüdläižen eländpunktan aluz om pandud kaivuzžiloiden ühtištusel vl 1951 kuti Lipkovskii-radnikžilo (ven.: рабочий посёлок Липковский). Se sai lidnan statusad nügüd'aigaiženke nimitusenke vl 1955. Hilen samine jätkustui vhesai 1991.

Lipki šingotase savičtegimel, lämoipalonvastaižen produkcijan pästandal i leibtegimel. Nevondkundaližel aigal maidtegim radoi mugažo.

Geografijan andmused

Lidn sijadase rajonan päivlaskmaiženno röunanno, Upanjogen oiktal randpolel (ven.: Упа́ 343 km pitte, Okan oiged ližajogi), 2..3 kilometras jogespäi i sen Ščokinon vezivaradimespäi (5,7 km²), 240 m ü.m.t. keskmäižel korktusel. Matkad Tulhasai om 29 km pohjoižhe orhal vai 41 km avtotel, Kirejevsk-rajonkeskushesai — 15 km päivnouzmha orhal vai 21 km avtotedme. Toižed lähembaižed lidnad oma Sovetsk 5 km päivlaskmha orhal vai 10 km avtotedme, i Bolohovo 18 km pohjoižhe-pohjoižpäivnouzmha orhal vai 25 km avtotedme. «Sovetsk — Lipki — Kirejevsk»-raudtekeskust om muretud, ted oma heittud, raudtestancii om sauptud. Lähembaine passažirraudtestancii radab Ščokino-lidnas 19 km päivlaskmha-lodeheze avtotedme.

Komsomol'skii-žilo (642 rist. vl 2017) oli lidnan palaks edel 2009. vot, se mülüb lidnankundha Lipkin ližaks.

Eläjad

Vl 1959 lidnan ristitišt oli 19 435 eläjad (kaikiš suremb), vl 1989 — 10 355 eläjad. Vn 2010 Venäman rahvahanlugemižen mödhe lidnan eläjiden lugu oli 8 719 ristitud, lidnankundan — 9 384 ristitud, rajonan kahesandez. Kaik 9 114 ristitud elihe lidnankundas vl 2018. Seičemenden päivän adventistoiden loičendpert' radab lidnas.

Rahvahad (2010): venälaižed — 94,0%, totarlaižed — 1,2%, saksalaižed — 1,2%, ukrainalaižed — 1,2%, toižed rahvahad — 2,4%.

Professionaližen opendusen aluzkund om Bolohovon mašinansauvomižen tehnikuman Lipkin filial (edel 2016. vot — erine politehnine tehnikum).

Irdkosketused

• Lidnankundan lehtpoled rajonan tobmuden aluzkundoiden kireevsk.tularegion.ru-saital. (ven.)