Bolohovo

Bolohovo (ven.: Бо́лохово) om Venäman lidn da lidnankund Tulan agjan keskuzpalas. Mülüb Kirejevskan rajonha, sen kahtenz'-koumanz' surtte lidn.

Bolohovo
Болохово

Lidnanznam	Flag
Valdkund	Venäma
Eläjiden lugu (2021)	9,339 ristitud
Pind	6,28 km²
Pämez'	Lüdmila Astahova (reduku 2023—)
Telefonkod	+7−48 754-xx-xxx
Avtokod	71
Aigvö	UTC+3 (MSK+0)

Istorii

Eländpunkt mainitase 16. voz'sadaspäi nügüdläiženke nimitusenke. Oli Bolohovon rajonan administrativižeks keskuseks vll 1932−1963. Radnikžilo sai lidnan statusad vn 1943 5. päiväl uhokud.

Bolohovo šingotase passažirelektrojonusiden südäimen tehmižel, metalližkonstrukcijoiden tegimel, vilugoitmižmašiništon i sauvondmujuiden pästandal, leibtegimel.

Geografijan andmused

Lidn sijadase rajonan lodehliženno röunanno, Vjovk-jogen oiktal randal (ven.: Вьёвка seičeme kilometrad pitte, Okan oigedpol'ne bassein) läz Šivoron'-joged, 210 m ü.m.t. keskmäižel korktusel.

Matkad Tulhasai om 19 km lodeheze orhal vai 24 km avtotel, Kirejevsk-rajonkeskushesai — 18 km suvhe-suvipäivnouzmha orhal vai 25 km avtotedme. Toine lähembaine lidn om Lipki 18 km suvhe-suvipäivlaskmha orhal vai 25 km avtotedme. Kuz'kilometrine raudtesarak tuleb lidnan tegimennoks «Tul — Novomoskovsk»-keskustaspäi.

Tobmuz

Bolohovo om lidnankundan üks'jäižeks eländpunktaks. Lidnankundan pind — 6,28 km².

Lidnankundan tobmuden pämez' om sen Deputatoiden suiman (kümne ühtnijad) ezimez'. Edeline lidnan pämez' om Jelena Nefödova (uhoku 2016 — reduku 2023). Lidnan Administracijan pämez' om Marina Čuikina vn 2023 redukuspäi. Edeline Administracijan pämez' om Aleksandr Karpuhin, radoi vn 2006 sügüz'kuspäi.

Eläjad

Vl 1939 radnikžilon ristitišt oli 12 710 eläjad, vl 1959 lidnan — 8 295 eläjad. Vn 2010 Venäman rahvahanlugemižen mödhe lidnan eläjiden lugu oli 9 622 ristitud, rajonan kahesandez, vn 2021 — 9 339 ristitud. Kaik 9 093 eläjad oli lidnas vl 2017. Kaikiš suremb lidnan ristitišt oli 12 710 eläjad vl 1939 i 11..12 tuhad eläjid vll 1979−2001 (12 tuh. rist. vl 1992).

Ortodoksižen hristanuskondan Jumalanmaman «Grähkhižiden kädendai»-jumalaižen pühäpert' om saudud lidnas vll 2009−2012.

Lapsiden opendusen aluzkundad oma päivkodi, openduzkeskuz nomer 1, openduzkeskuz nomer 2 (ende keskškol nomer 1), aluzškol nomer 2, muzikškol. Bolohovon mašinansauvomižen tehnikum om lidnan professionaližen opendusen aluzkundaks.

Galerei

• 
  Lidnan puišton tulend (2022)
• 
  Kul'turkeskuz, vn 2022 nägu
• 
  Fizkul'turine tervehtamižkompleks (2019)

Irdkosketused

• Lidnankundan lehtpoled rajonan tobmuden aluzkundoiden kireevsk.tularegion.ru-saital. (ven.)