Zelenogorsk (Krasnojarskan rand)

Zelenogorsk (ven.: Зеленого́рск) om Venäman sauptud lidn da lidnümbrik Krasnojarskan randan suvipalan päivnouzmas.

Zelenogorsk
Зеленогорск

Lidnanznam	Flag
Valdkund	Venäma
Eläjiden lugu (2021)	54,279 ristitud
Pind	162 km²
Pämez'	Vadim Terentjev (tal'vku 2023—)
Telefonkod	+7−39 169-xx-xxx
Avtokod	24, 84, 88, 124
Aigvö	UTC+7 (MSK+4)

Sil sanal voib olda toižid znamoičendoid; miše nähta niid, tulgat tänna.

Istorii

Ezmässai Ust'-Barg-žilo (ven.: посёлок Усть-Барга) mainitase vl 1920, nimitihe sijaližen penen jogen mödhe. Nügüdläižen eländpunktan aluz om pandud vl 1956 kuti Zaozörnii-13, sid' Krasnojarsk-45 uranan küllästamižfabrikan («elektrohimine tegim») da Krasnojarskan GRES-2 sauvomižen ühtes. Vspäi 1988 pästtas uranad AES:oiden täht vaiše.

Zelenogorsk šingotase metalltegesiden i plastikprofilän edheotandoil, leibtegimel i mebel'fabrikal mugažo. «Sibvolokno»-tegim om okaidud.

Geografijan andmused

Lidn sijadase Kan-jogen alajoksmusen hural randal (ven.: Кан 629 km pitte, Jenisein hura ližajogi), 170 m ü.m.t. keskmäižel korktusel. Om ümbärtud Ribnojen rajonan territorijal.

Matkad Krasnojarskhasai om 110 km päivlaskmha orhal vai 150 km avtotedme. Lähembaine lidn i Transsiban raudtestancii om Zaozörnii kaks'kümne kilometrad suvhe avtotedme.

Tobmuz

Zelenogorsk om lidnümbrikon üks'jäižeks eländpunktaks. Lidnan pertišton pind — 22 km².

Edeližed lidnümbrikon pämehed oma Mihail Speranskii (tal'vku 2018—), Pavel Korčaškin (sügüz'ku 2014 — tal'vku 2018).

Eläjad

Vn 2010 Venäman rahvahanlugemižen mödhe lidnan eläjiden lugu oli 66 056 ristitud, vn 2021 — 54 279 ristitud. Kaik 62 466 eläjad oli lidnas vl 2017. Kaikiš suremb lidnan ristitišt oli enamba 69 tuhad eläjid vll 2001−2006 (69 500 rist. vl 2001).

Ortodoksižen hristanuskondan ph. Serafim Sarovalaižen jumalanpert' om saudud lidnas vll 1996−2003.

Lapsiden opendusen aluzkundad oma severz'-se päivkodid, kümne keskškolad (nomer 161, 163, 164 (gimnazii), 167, 169, 172, 173 (specializiruidud), 174 (licei), 175, 176), škol-internat VIII toižendan, muzikškol, čomamahtoine škol, nell' sportškolad. Krasnojarskan elektromehanine tehnikum (MIFI-universitetan filial) i Zelenogorskan tegimištoližtehnologijoiden da servisan tehnikum oma lidnan professionaližen opendusen aluzkundoikš.

Galerei

• 
  Muštnik lidnan alusenpanijoile, vn 2007 nägu
• 
  Krasnojarskan GRES-2 vl 2007
• 
  «Krasnii Jar»-torguindkeskuz (2015, Rusked pengr)
• 
  Federaližen medikbiologižen agentusen klinine läžundkodi nomer 42 (2015)
• 
  Randird vn 2014 sulakus

Irdkosketused

• Zelenogorsk-SATÜ:n sijaližen ičeohjandusen aluzkundoiden sait (zeladmin.ru). (ven.)