Lesosibirsk

Lesosibirsk
Лесосибирск
Lidnanznam;	Flag;
Valdkund	Venäma
Eläjiden lugu (2021)	55,730 ristitud
Pämez'	Andrei Hohräkov; (kezaku 2010—)
Telefonkod	+7−39 145-xx-xxx
Avtokod	24, 84, 88, 124
Aigvö	UTC+7 (MSK+4)

Lesosibirsk (ven.: Лесосиби́рск) om Venäman lidn da lidnümbrik Krasnojarskan randan päivlaskmas.

Istorii

Ezmäine eländpunkt mainitase vl 1640 kuti Maklakov Lug-külä (ven.: деревня Маклаков Луг). 20. voz'sadan augotišel norvegine Jonas Lid-edheotai sauvoi mecan ümbriradajad kombinatad läz Maklakovod. Nevondkundaližen aigan saudihe kaks' mecanümbriradajad kombinatad da mecan varhapanendan järedad bazad samha materialoid angarižes pedajaspäi. Ühtištadihe Maklakovo- i Novomaklakovo-žiloid da anttihe lidnan statusad vn 1975 21. päiväl uhokud nügüdläiženke nimenke. Vl 1989 mülütihe Novojeniseisk-žilod lidnha.

Mectegimišton täuz' cikl om Lesosibirskas: mecan varhapanend i sauvondmaterialiden pästand (pilindmaterialad, fibroplitad), mechimijan kombinat, meblin tehmine. Vspäi 2011 uz' mecanpilindkompleks om sauvomas moderniziruimha vn 1978 mecanümbriradajad kombinatad.

Geografijan andmused

Lidn sijadase pidust' Jenisein hurad randad kaks'toštkümnekilometrižel keskustal, 30 kilometras sen ühthejoksmusespäi Angaranjogenke mödvedhe, 80 m ü.m.t. valdmeren pindan päl.

Matkad Krasnojarskhasai om 245 km suvhe vai 295 km avtotedme. Lähembaine lidn om Jeniseisk 30 km lodeheze orhal, 40 km avtotedme vai Jenisei-jogedme. Lesosibirsk-I-, I-kormaduzstancii i II-raudtestancijad oma Ačinskan sarakon lopuikš 260 km pitte.

Klimat om kontinentaline. Voden keskmäine lämuz om −0,7 C°, kezakun-elokun +15,2..+18,7 C°, tal'vkun-uhokun −17,2..−20,5 C°. Ekstremumad oma −58,8 C° (viluku) i +35,4 C° (kezaku, heinku). Kezaaigan minimum om −3,9 C° (kezaku), tal'vaigan maksimum om +7,1 C° (uhoku). Ei voi panda halad kezaaigan heinkus vaiše (minimum om +1,2 C°). Paneb sadegid 479 mm vodes, enamba kezakus-elokus (55..59 mm kus), vähemba uhokus-keväz'kus (19..20 mm kus).

Tobmuz

Lidnanvuitte Strelk-žilo (4 792 rist. vl 2017) da pen' Ust'-Angarsk-žilo (52 rist. vl 2016) mülüdas lidnümbrikho Lesosibirskan ližaks. Lidnümbrikon pind — 270,83 km².

Lidnümbrikon tobmuden pämez' om sen Administracijan pämez'. Lidnan Deputatoiden nevondkundan ezimez' om Sergei Čerkašin vn 2020 redukuspäi. Edeližed nevondkundan ezimehed oma Zinur Gimal'tdinov (keväz'ku 2016 — sügüz'ku 2020), Boris Zolin (radoi vn 2016 keväz'kuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 61 139 ristitud, lidnümbrikon — 66 240 ristitud, vn 2021 — 55 730 ristitud. Vl 2017 kaik 59 642 ristitud elihe lidnas i 64 477 ristitud kaikes lidnümbrikos. Kaikiš suremb lidnan ristitišt oli 68..69 tuhad eläjid vozil 1989−2001 (69 900 rist. vl 1992).

Ortodoksižen hristanuskondan nell' pühäpertid^[1] oma saudud lidnas: Ristan Zdviženjan päjumalanpert' (1995−2002, Sibirin kaikiš surembišpäi), ph. Ondrii Ezikuctud päjumalanpert' (om saudud vll 2007−2012), puine ph. Ioann Kronštadtalaižen (vspäi 1992) i ph. Lukan časoun'. Vižkümnenden päivän uskojiden loičendpert' om avaitud. Islaman «Iman»-pühäpert' radab vspäi 1997.

Lapsiden opendusen aluzkundad oma kaks'kümne kaks' päivkodid, aluzškol (nomer 5), kuz' keskškolad (nomer 1, 2, 4, 6, 8, 9), gimnazii, licei, privatine ortodoksižen hristanuskondan gimnazii ph. Joann Kronštandalaižen nimed, korrekcine škol, Lesosibirskan kadetkorpus, čomamahtoiden škol (nomer 1), kaks' muzikškolad (nomer 2 i 3), kaks' čomamahtošt školad (Lesosibirskan i Novojeniseiskan), kaks' sportškolad (nomer 1 i üks'borcuindoiden toižendoiš). Professionaližen opendusen aluzkundad: tehnologine^[2] i medicinine^[3] tehnikumad, üläopendusen aluzkundoiden koume filialad.

Galerei

Ristan Zdviženjan päjumalanpert', vn 2012 nägu
Ph. Ondrii Ezikuctud päjumalanpert', vn 2011 nägu
Mec vuigonkan jäl'ghe Novojeniseiskan mechimižel kompleksal vl 2006
Lesosibirskan pedagogine institut — Sibirin federaližen universitetan filial (2012. voz' vai sen aigemba)
Lesosibirsk-päraudtestancijan sauvuz vl 2008

Homaičendad

Irdkosketused

Lidnümbrikon tobmuden aluzkundoiden sait (lesosibirsk-r04.gosweb.gosuslugi.ru). (ven.)

Lesosibirsk Vikiaitas

	Krasnojarskan randan lidnad
	Ačinsk \| Artömovsk \| Bogotol \| Borodino \| Divnogorsk \| Dudink \| Igark \| Ilanskii \| Jeniseisk \| Kansk \| Kodinsk \| Krasnojarsk \| Lesosibirsk \| Minusinsk \| Nazarovo \| Noril'sk \| Sosnovoborsk \| Šaripovo \| Zaozörnii \| Zelenogorsk \| Železnogorsk \| Ujar \| Užur

[1] Lesosibirskan pühäpertid sobory.ru-saital. (ven.)

[2] Lesosibirskan tehnologižen tehnikuman sait (pu-48.ru). (ven.)

[3] Lesosibirskan medicinižen tehnikuman sait (lesmt.ru). (ven.)

[1]

[2]

[3]

Lidnanznam	Flag
Valdkund	Venäma
Eläjiden lugu (2021)	55,730 ristitud

Pämez'	Andrei Hohräkov (kezaku 2010—)
Telefonkod	+7−39 145-xx-xxx
Avtokod	24, 84, 88, 124
Aigvö	UTC+7 (MSK+4)