Zaozörnii

Zaozörnii (ven.: Заозёрный) om Venäman lidn da lidnankund Krasnojarskan randan suvipäivnouzmas. Se om Ribnojen rajonan administrativine keskuz, mülüb sihe vspäi 2008.

Zaozörnii
Заозёрный

Lidnanznam	Flag
Valdkund	Venäma
Eläjiden lugu (2021)	9,954 ristitud
Pind	27,87 km²
Pämez'	Svetlana Buketa (kül'mku 2018—)
Telefonkod	+7−39 165-xx-xxx
Avtokod	24, 84, 88, 124
Aigvö	UTC+7 (MSK+4)

Istorii

Ende evenkalaižiden da Jenisein kirgizlaižiden žilo oli olmas lidnan sijas. Vl 1694 löutihe keitandsolan purtkid da saudihe tegint samha sidä.

Nügüdläižen eländpunktan aluz om pandud vn 1776 elokul kuti Troicko-Zaozörnai-slabad (ven.: слобода Троицко-Заозёрная) samha loštkivid pühäpertiden iknoiden täht, nimitihe Stroican Turuhanskan jumalankodin — külän uman pidajan mödhe. 19. voz'sadal külä oli tetab villän torguindkeskuseks. Zaozörnii-radnikžilo sai lidnan statusad vn 1948 13. päiväl redukud.

Zaozörnii šingotase raudtestancijal, Vizir-mebel'fabrikal, Krasnojarskan Rock Pillars-kompanijan omblendfabrikal (turistine ekipiruind), sömtegimištol (maidtegim).

Geografijan andmused

Lidn sijadase Barg-jogen randal (ven.: Барга 56 km pitte, Jenisein oigedpol'ne bassein), 210 m ü.m.t. keskmäižel korktusel.

Matkad Krasnojarskhasai om 120 km päivlaskmha. Lähembaižed lidnad — Borodino 15 km suvipäivnouzmha avtotedme i Zelenogorsk 20 km pohjoižhe avtotedme. Transsiban Zaozörnai-raudtestancii (ven.: Заозёрная) om saudud lidnan suves.

Tobmuz

Zaozörnii om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline lidnan pämez' om Jurii Miklin (sügüz'ku 2013 — kül'mku 2018). Lidnan Deputatoiden nevondkundan ezimez' om Natal'ja Gruškina vn 2023 redukuspäi. Edeline nevondkundan ezimez' om Nina Gorbačevskaja, radoi vn 2008 vilukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 10 681 ristitud. Kaik 10 286 eläjad oli lidnas vl 2017. Kaikiš suremb lidnan ristitišt oli 34 724 ristitud vl 1959, Borodinon erištundan jäl'ghe vn 1981 kezal (sil aigal 12 tuhad eläjid) — 15..16 tuhad ristitud vhesai 1996.

Ortodoksižen hristanuskondan Ioann-jumalantedomehen jumalanpert' om avaitud vl 2000.

Lapsiden openduz om kaks' školad i muzikškol. Krasnojarskan juridižen tehnikuman filial om lidnan professionaližen opendusen aluzkundaks.

Galerei

• 
  Lidnan administracijan sauvuz (2005)
• 
  Kivi-muštnik Ioann-jumalantedomehen jumalanpertin panendas mantazole, vn 2009 nägu
• 
  Elevator (Villänvaražom) vl 2015
• 
  Laukad Vagzalan torgul (2014)
• 
  Zaozörnai-päraudtestancijan sauvuz vl 2005

Irdkosketused

• Lidnankundan tobmuden aluzkundoiden sait (admzaoz.gosuslugi.ru) i sen versii edel vn 2023 sügüz'kud (admzaoz.ru). (ven.)
• Lidnan lehtpol' Krasnojarskan randan oficialižel portalal (krskstate.ru). (ven.)