Jeniseisk

Jeniseisk (ven.: Енисейск [jɪnʲɪˈsʲejsk]) om Venäman lidn da lidnümbrik Krasnojarskan randas. Se om Jeniseiskan rajonan administrativižeks keskuseks mugažo, ei ole rajonan palaks.

Jeniseisk
Енисейск

Lidnanznam	Flag
Valdkund	Venäma
Eläjiden lugu (2017)	17,999 ristitud
Pind	66,41 km²
Pämez'	Igor' Antipov (keväz'ku 2010—)
Telefonkod	+7−39 195-xx-xxx
Avtokod	24, 84, 88, 124
Aigvö	UTC+7 (MSK+4)

Istorii

Eländpunktan aluz om pandud vl 1619 kuti Tungusan lidnuz, sid' Jenisein lidnuz (ven.: Енисейский острог). Vl 1676 se sai lidnan statusad, kändihe Jenisein regionan keskuseks. Joukud läksiba ujuden otmaha kävutamižhe Päivnouzmaižen Sibirin rajonid arni Jeniseiskaspäi.

Vozil 1724−1796 lidn oli Jenisein provincijan keskuseks. Karvanjarmank oleli lidnas 18. voz'sadal elokuidme, i torguihe tavaroid Kitaišpäi da kalad vodes läbi. Vl 1765 kaik 1343 torgovanad oli kirjutadud Jeniseiskas. Möhemba lidnan znamoičend kadotihe, sikš miše saudud Sibirin te madme da Transsib vajehtiba jogiteid. Enamba 100 vanhid kivesižid pertid oma kaičendan al.

Geografijan andmused

Lidn sijadase Jenisei-jogen hural randal, mödvedhe Angar-jogensuspäi, 75 m keskmäižel korktusel valdmeren pindan päl. Matkad Krasnojarskhasai om 348 km suvhe. Klimat om terav kontinentaline. Lähembaine lidn om Lesosibirsk 47 km suvipäivnouzmha avtotedme vai Jenisein ülezjogedme.

Jeniseisk om lidnümbrikon üks'jäine eländpunkt.

Eläjad

Vn 2010 Venäman rahvahanlugemižen mödhe eläjiden lugu oli 18 766 ristitud. Kaikiš suremb ristitišt oli 22 845 eläjad vodel 1989. Ortodoksižen hristanuskondan Spasan Toižetamižen mez'jumalankodi om lidnas vspäi 1642, päjumalanpertin da koumen jumalankodin aluz om pandud 18. voz'sadal. Islaman pühäpert' om saudud lidnas.

Pedagogine kolledž i professionaline škol ratas lidnas.

Ižanduz da transport

Ei ole tegimišton järedoid edheotandoid Jeniseiskas. Jogistancii om saudud lidnan keskuses. Avtote ühtenzoitab lidnad Lesosibirskanke da Krasnojarskanke, Jenisein oiktadme randpoledme — Pohjoižjeniseiskanke. Civiline Jeniseisk-lendimport (EIE/ЕНС) sijadase 5 km lodeheze lidnan keskusespäi, om äkkiližid reisid rajonadme.

Irdkosketused

• Lidnan tobmuden aluzkundoiden oficialine sait (eniseysk.com). (ven.)