Serdobsk

Serdobsk (ven.: Сердо́бск) om Venäman lidn da lidnankund Penzan agjan suves. Se om Serdobskan rajonan administrativine keskuz.

Serdobsk
Сердобск

Lidnanznam	Flag
Valdkund	Venäma
Eläjiden lugu (2021)	30,220 ristitud
Pind	28,42 km²
Pämez'	Jekaterina Räbuhina (reduku 2022—, Екатерина Рябухина)
Telefonkod	+7−84 167-xx-xxx
Avtokod	58
Aigvö	UTC+3 (MSK+0)

Istorii

Eländpunktan aluz om pandud Serdob-jogen molembil randoil vl 1698 kuti Serdobskai (Arhangel'skai)-slabad (ven.: Сердобская (Архангельская) слобода) varjoičemha ümbrišton mecad laivoiden täht Petr I-carin käskön mödhe. Se sai makundan lidnan statusad nügüdläiženke nimitusenke Jekaterina II-imperatornaižen käskön mödhe vn 1780 kül'mkun 7. päiväspäi. Lidn oli tetab diniden kazvatandal, ned kuvadasoiš Serdobskan simvolikš. Kaik 51 tegimišton edheotandad radoi lidnas edel Suren sodan zavodindad.

Serdobsk šingotase mašinansauvomižen tegimel (avtopalad «VAZ»-tegimen täht), sömtegimištol (maidvoitegim, sömkombinat, konditerine edheotand) i mebel'kombinatal.

Geografijan andmused

Lidn sijadase rajonan keskuzpalas, Serdob-jogen oiktal randal (ven.: Сердо́ба 160 km pitte, Hopran üläjoksmusen hura ližajogi), 180 m ü.m.t. keskmäižel korktusel. Om toižid eländpunktoid jogen vastrandal.

Matkad Penzhasai om 98 km pohjoižpäivnouzmha-pohjoižhe orhal, 113 km avtotel vai raudtel. Lähembaine lidn om Rtiščevo (Saratovan agj) 37 km suvipäivlaskmha orhal, 48 km avtotedme vai raudtedme.

«Penz — Balašov»-avtote ümbärdab lidnad pohjoižespäi. Serdobsk-raudtestancii radab vspäi 1894 lidnan päivlaskmas, «Penz — Balašov»-raudtekeskustal.

Tobmuz

Serdobsk om lidnankundan üks'jäižeks eländpunktaks. Lidnankundan pind — 28,42 nellikkilometrad.

Lidnankundan pämez' om Ezitajiden suiman ezimez'. Edeline suiman ezimez' om Anatolii Kaišev (Анатолий Кайшев, reduku 2017 — sügüz'ku 2022). Lidnankundan Administracijan pämez' om Marina Jermakova vn 2023 keväz'kuspäi. Edeližed Administracijan pämehed oma Sergei Varlamov (uhoku 2020 — uhoku 2023), Vitalii Makarov (kül'mku 2017 — uhoku 2020).

Eläjad

Vl 1939 lidnan ristitišt oli 12 807 eläjad, vl 1959 — 26 119 eläjad. Vn 2010 Venäman rahvahanlugemižen mödhe lidnan eläjiden lugu oli 35 393 ristitud, rajonan kaks' koumandest, vn 2021 — 30 220 ristitud. Vl 2017 lidnan ristitišt oli 32 554 eläjad. Kaikiš suremb lidnan ristitišt oli 40..44 tuhad eläjid vll 1980−2001 (44 900 rist. vl 1992).

Rahvahad (2010): venälaižed — 96,9 %, toižed rahvahad — 3,1 %.

Ortodoksižen hristanuskondan kaks' pühäpertid oma avaitud lidnas: ph. Mikoi-arhangelan kafedraline päjumalanpert' (uz', om saudud vll 1895−1905) i ph. Vladimiran jumalanpert' (2015).

Lapsiden opendusen aluzkundad oma ühesa päivkodid (nomer 3, 5, 12..17, 19), viž keskškolad (nomer 1, 4, 6, 9, 10), licei (nomer 2), lidnan lapsiden sädamižen keskuz, rajonan čomamahtoiden škol, lidnan lapsiden da norišton sportškol. Professionaližen opendusen aluzkundad oma Serdobskan äiprofil'ne tehnikum (Serdobskan maižanduztehnikum om mülütadud sihe vl 2012), Penzan agjan medicinižen kolledžan filial i Penzan valdkundaližen universitetan filial.

Galerei

• 
  Serdobskan rajonan tobmuden pert' (2008)
• 
  Ph. Mikoi-arhangelan kafedraline päjumalanpert', vn 2008 nägu
• 
  Mašinansauvomižen tegim vl 2008
• 
  Čomamahtoiden pert' (2009)
• 
  Serdobsk-päraudtestancijan sauvuz vl 2015

Irdkosketused

• Lidnan da rajonan tobmuden aluzkundoiden sait (gorod-serdobsk.ru). (ven.)