Komsomol'sk Amural

Komsomol'sk Amural (ven.: Комсомо́льск-на-Аму́ре) om Venäman lidn da lidnümbrik Habarovskan randan suves. Se om Komsomol'skan rajonan administrativižeks keskuseks mugažo, randan kahtenz' surtte i Venäman Edahaižen Päivnouzmpolen nellänz' surtte lidn (Vladivostokan, Habarovskan da Jakutskan jäl'ghe).

Komsomol'sk Amural
Комсомольск-на-Амуре

Lidnanznam	Flag
Valdkund	Venäma
Eläjiden lugu (2024)	235,488 ristitud
Pind	325,1 km²
Pämez'	Dmitrii Zaplutaev (sügüz'ku 2024—)
Telefonkod	+7−4217-xxx-xxx
Avtokod	27
Aigvö	UTC+10 (MSK+7)

Istorii

Eländpunktan aluz om pandud vl 1932 lidnan statusanke, Permskoje-žilon (sen aluz oli pandud vl 1860) da nanalaižiden Dzömgi-seižutesen sijas.

Komsomol'skan Amural ižandusen päsarakod oma lendimiden sauvomine, laivansauvomine, raudan metallurgii, kivivoin ümbriradmine (kivivoin- da gazanveimed Sahalinaspäi).

Geografijan andmused

Lidn sijadase Amur-jogen hural randal, 47 m ü.m.t. keskmäižel korktusel. Taigmec da turbazsod ümbärtas lidnad. Voib olda manrehkaidusud seičemehesai magnitudal, vižballaižed oleldas kerdan koumes-nelläs vodes.

Matkad Habarovskhasai om 404 km suvipäivlaskmha avtotedme, Amuran jogensuhusai — 569 km jogiportaspäi. Lähembaine lidn om Amursk 50 km suvhe.

Klimat om kontinentaline mussonižen pirdoidenke, tal'v om vilu kuiv (Edahaižen Pohjoižen rajonha tazostadud), keza om läm' neps, kazvatadas arbuzid i vinmarjoid. Voden keskmäine lämuz om +0,4 C°, kezakun-elokun +17,4..+20,8 C°, tal'vkun-uhokun −19,5..−23,6 C°. Ekstremumad oma −45,5 C° (viluku) i +35,0 C° (heinku). Kezaaigan minimum om +1,5 C° (kezaku), tal'vaigan maksimum om +1,2 C° (uhoku). Ei voi panda halad kezakus-elokus, ei voi olda sulasäd tal'vkus (maksimum om −0,2 C°). Paneb sadegid 547 mm vodes, enamba heinkus-elokus (95..107 mm kus), vähemba kül'mkus-sulakus (11..27 mm kus). Kun keskmäine relätivine nepsuz vajehtase 65..72 % röunoiš keväz'kus-kezakus i redukus, 78..81 % toižiš kuiš.

Tobmuz

Komsomol'skan Amural lidnümbrikod:      Keskuzümbrik      Leninan ümbrik (Dzömgi)

Komsomol'sk Amural om lidnümbrikon üks'jäižeks eländpunktaks.

Lidnan tobmuden pämez' om sen Administracijan pämez'. Edeližed lidnan pämehed oma Aleksandr Žornik (sügüz'ku 2019 — sügüz'ku 2024), Andrei Klimov (sügüz'ku 2014 — heinku 2019). Lidnan Duman ezimez' om Vladimir Ginzburg vn 2019 redukuspäi. Edeline Duman ezimez' om Svetlana Baženova, radoi vn 2019 redukuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 263 906 ristitud. Kaik 249 810 eläjad oli lidnas vl 2017. Kaikiš suremb lidnan ristitišt oli 319 tuhad eläjid vll 1990−1992.

Rahvahad (enamba 0,3 % vl 2010): venälaižed — 87,2 %, ukrainalaižed — 1,7 %, totarlaižed — 0,7 %, vaugedvenälaižed — 0,4 %, nanalaižed — 0,4 %, azerbaidžanlaižed — 0,3 %, korejalaižed — 0,3 %, toižed rahvahad — 1,7 %, rahvahuden ozutandata — 7,3 %.

Ortodoksižen hristanuskondan kuz' pühäpertid oma saudud lidnas: Illä-endustajan kafedraline päjumalanpert' (letihe vll 2002−2007), Jumalanmaman Kazanin jumalaižen kafedraline päjumalanpert' (om sätud vll 2000−2001), nell' jumalanpertid.

Transport

Avtobusad, tramvaid da taksid oma kundaližeks transportaks. Vspäi 1975 raudte- da avtotesild ühtenzoitab Amuran randoid. Ühtennimine raudtestancii om järedaks raudtesol'meks Baikalan-Amuran magistralil.

Regionaline soda- da civiline Hurb-lendimport (ven.: Хурба́, KXK / UHKK / КСЛ, 8,7 tuh. passažiroid vl 2019) sijadase 22 kilometras avtotedme suvipäivlaskmha lidnan keskusespäi. Tehtas reisid Vladivostokha, Suvisahalinskha, Blagoveššenskha, Krasnojarskha i randadme. Toižed lendimportad oma Dzömgi jüguzlendimiden da VIP-personiden täht i Pobed («Vägestuz») kebnan aviacijan täht.

Galerei

• 
  Lidnan administracijan sauvuz (2013)
• 
  Illä-endustajan kafedraline päjumalanpert', vn 2014 nägu
• 
  Amuran laivansauvomižen tegim, nägu Amur-jogespäi vl 2015
• 
  Komsomol'skan Amural valdkundaline universitet, ühtenz' korpus (2011)
• 
  Komsomol'skan Amural dramteatr (2014)
• 
  Lidnan kodirandantedištandmuzei (2016)
• 
  Norišton pert' (2013)
• 
  Jogistancii vl 2009
• 
  Komsomol'sk Amural-päraudtestancijan sauvuz da torg senno vl 2014
• 
  Hurb-lendimportan sauvuz vl 2016

Irdkosketused

• Komsomol'sk Amural-lidnan tobmuden aluzkundoiden oficialine sait (kmscity.ru). (ven.)