Kambark

Kambark (ven. i udm.: Камбарка) om Venäman lidn da lidnankund Udmurtijan Tazovaldkundan suvipäivnouzmas. Se om Kambarkan rajonan administrativine keskuz.

Kambark
Камбарка (ven. i udm.)

Valdkund	Venäma
Eläjiden lugu (2017)	10,477 ristitud
Pind	26,473 km²
Pämez'	Marat Suleimanov (2015—)
Telefonkod	+7−34 153-xx-xxx
Avtokod	18
Aigvö	UTC+4 (MSK+1)

Istorii

Eländpunktan aluz om pandud kuti žilo kaugedraudan valamižtegimenno, sauvoihe tegint vozil 1761—1767 (nüg. mašiništonsauvomižen tegim). Om nimitadud Kambark-jogen mödhe, jogen nimituz sündui baškiralaižiden Kanbar-rodun nimespäi. Vl 1936 kätihe Kambarkad radnikžiloks, vspäi 1937 mülüb Udmurtijha. Vl 1945 radnikžilo sai lidnan statusad.

Geografijan andmused

Lidn sijadase 9 kilometras Kamanjogespäi, sen hural randpolel, Kambarkan uiton randoil (om olmas vspäi 1767), 75 m keskmäižel korktusel valdmeren pindan päl. Matkad Iževskhasai om 116 km lodeheze.

Kambark om lidnankundan üks'jäine eländpunkt.

Eläjad da ižanduz

Vn 2010 kaiken Venäman rahvahanlugemižen mödhe eläjiden lugu oli 11 021 ristitud, rajonan ristitišton koume videndest. Kaikiš suremb ristitišt oli vl 1970 — 14 121 eläjad. Mašiništonsauvomižen kolledž om specialižen opendusen aluzkundaks.

Ižandusen päsarakod oma transportmašinoiden sauvomine (läm'vedimed, raudteiden kohenduzmašinad), metallkonstrukcijoiden tehmine, mecan ümbriradmine, pompiden da metalližiden peitkonoriden pästand, himine sarak (reagent kivivoin samižen täht). Avtotesild om läz lidnad Kam-joges päliči vspäi 2016, se om maksline. Kambark-raudtestancii om olmas vspäi 1919, Kazan' — Jekaterinburg raudte läbitab lidnad.

Irdkosketused

• Municipaližen «Kambarskoje»-ühtnikan tobmuden aluzkundoiden oficialine sait (gorod-kambarka.ru). (ven.)