Kingiseppan rajon

Kingiseppan rajon (ven.: Кингисеппский район) om municipaline ühtnik Leningradan agjas.

Kingiseppan rajon
Кингисеппский район

Znam	Flag
Valdkund	Venäma
Administrativine keskuz	Kingisepp
Eläjiden lugu (2016)	79,099 ristitud
Pind	2907,14 km²

Administrativine keskuz om Kingisepp-lidn (vspäi 2006 mülüb rajonha), sijadase rajonan suves. Rajonan ristitišton koume videndest eläb siš.

Istorii

Rajonan aluz om pandud vl 1927 elokun 1. päiväl Leningradan agjan Leningradan ümbrikho ühten aigan niiden sädandanke. Vl 1930 heinkun 23. päiväl heitihe ümbrikod, i siš aigaspäi rajon mülüb Leningradan agjaha kuti administrativine ühtnik. Vn 1931 vulikul Kingiseppan rajonad ühtištuihe enččen Kotliden rajonanke.

Toižen mail'man voinan aigan vozil 1941−1944 rajonan territorii oli okkupiruidud. Vspäi 1945 Narv-jogen oiged randpol' Ivangorod-lidnanke (Estinman NST:an enzne pala) mülüb rajonha. Vozil 1976−2006 Kingisepp oli alištunu agjan tobmudele oikti. Vozil 1992−2006 Ivangorod oli lidnaks agjan alištusenke. Rajon om olmas nügüdläižiš röunoiš vspäi 2006.

Geografijan andmused

Kingiseppan rajon om Leningradan agjan päivlaskmaine taho. Pind — 2 907 nellikkilometrad (agjan 11nz' surtte 17:späi). Mecad ottas territorijan koume videndest (1 748 km²), lehtezmecad oma enambuses, habikod da koivikod tobjimalaz. Rajonan territorijan kahesandez om kattud soil.

Om röunoid 3 Leningradan agjan rajonanke da Estinmanke:

• pohjoižpäivnouzmas Lomonosovan rajonanke;
• päivnouzmas Volosovon rajonanke;
• suves Slancin rajonanke;
• päivlaskmas Estinmanke.

Suomen laht lainištab rajonan lodehližed da pohjoižed randad. Znamasižed joged oma Luganjogi da Narv, lanktas Suomen lahthe. Znamasine vezišt om ratud Narvan vezivaradim (191,4 km²), mülüb rajonha vaiše paloin. 11 pen't järved om rajonas. Joged da järved mülüdas Baltijan meren (Atlantižen valdmeren) basseinha.

Londuseližed varad oma turbaz, sauvondmaterialad (mouckivi, apakkivi, gravii, letked, saved), fosforitad, dolomit, abrazivmaterial, mec, kala, reskvezi.

Vspäi 2006 rajonan territorii alajagase 11 municipaližhe ühtnikha: 2 lidnkundha da 9 küläkundha.

Tobmuz

Käskusenandai tobmuz om Ezitajiden Nevondkund (ven. Совет депутатов) 22 ühtnijanke. Kaik rahvaz valičeb heid videks vodeks. Järgvaličendad sihe oliba vl 2014 sügüz'kun 14. päiväl. Aleksandr Sergejev radab sen ezimehen da rajonan pämehen vs 2014 sügüz'kun 24. päiväspäi, hän-žo radab Kingisepp-lidnkundan pämehen. Ezitajiden Nevondkund valičeb rajonan administracijan pämest.

Vl 2014 redukun 24. päiväl Viktor Gešele om valitud ezitajil i om pandud rajonan administracijan pämeheks, radab vs 2010 vilukun 1. päiväspäi kahtenden strokun jäl'geten. Ezmäine varapämez, koume muite varapämest da abunik oma hänele abhu. Nell' komitetad, 9 palakundad, juridine radnikoičend da 2 laudkundad alištudas rajonan administracijan pämehištole.

Eläjad

Vn 2010 Venäman rahvahanlugemižen mödhe eläjiden lugu oli 78 183 ristitud (seičemenz' sija agjas).

Kaik om 190 eländpunktad rajonas, sidä kesken 2 lidnad, 11 žilod, 9 raudtestancijan žilod, 166 küläd da 2 futorad.

Toižed sured eländpunktad oma Ivangorod-lidn (10,5 tuh. rist. vl 2016), Ust'-Lug-žilo (2,4 tuh. rist. vl 2010), Kingiseppskii-žilo (2,1 tuh. rist. vl 2010) da Kotel'skii-žilo (1,9 tuh. rist. vl 2010).

Rahvahad (vn 2010 Venäman rahvahanlugemižen mödhe, enamba 0,4%): venälaižed — 84,9%, ukrainalaižed — 2,0%, vaugedvenälaižed — 1,3%, totarlaižed — 0,6%, armenijalaižed — 0,4%, toižed rahvahad — 2,7%; rahvahuden ozutandata — 8,1% (heišpäi vaiše 5,4% mahttas pagišta venäkelel).

Erased igähižed rahvahad: suomalaižed — 167 rist. (0,21%), ižoralaižed — 151 rist. (0,19%), estilaižed — 129 rist. (0,16%), karjalaižed — 60 rist. (0,08%), vodilaižed — 24 rist. (0,03%), vepsläižed — 11 rist. (0,01%).

Ižanduz

Rajonan ižandusen päsarakod oma himine sarak (mineraližheretusiden, koaguläntan pästand), sauvondmaterialoiden pästand, sömtegimišt da maižanduz, stökoltegesiden tehmine (butulkad), omblendedheotandad, torguind da logistik.

Irdkosketused

• Kingiseppan rajonan oficialine sait. (ven.)