Volosovon rajon

Volosovon rajon (ven.: Во́лосовский райо́н) om Venäman municipaline ühtnik Leningradan agjas.

Volosovon rajon
Волосовский район

Znam (text)	Flag (text)
Valdkund	Venäma
Administrativine keskuz	Volosovo
Eläjiden lugu (2024)	50,257 ristitud
Pind	2,680,53 km²

Administrativine keskuz om Volosovo-lidn, sijadase rajonan pohjoižpäivnouzmas.

Istorii

Rajonan aluz om pandud vn 1927 elokun 1. päiväl Leningradan agjan Leningradan ümbrikho ühten aigan niiden sädandanke. Vn 1930 heinkun 23. päiväl heittihe ümbrikod, i siš aigaspäi rajon mülüb Leningradan agjaha kuti administrativine ühtnik. Vl 1931 ühtištadihe enččen Moloskovicin rajonan territorijad Volosovon rajonanke. Vozil 1931−1939 koume estišt rahvahališt küläkundad oli sätud rajonas.

Toižen mail'man sodan aigan vozil 1941 (heinku) — 1944 (uhoku) rajonan territorii oli okkupiruidud nacistižen Germanijan sodavägil, se oli 20 päivän hätkeližemb mi Piteran blokad. Vozil 1963−1965 rajonan territorii oli mülünu Kingiseppan rajonha. Vn 1999 sulakun 20. päiväl lindanvuitte Volosovo-žilo kändihe lidnaks. Rajon om olmas nügüdläižiš röunoiš vspäi 2006.

Geografijan andmused

Volosovon rajon om Leningradan agjan suvipäivlaskmaine taho. Pind — 2 680 nellikkilometrad (14nz' sija agjas 18:späi). Mec katab rajonan territorijan koumed videndest.

Om röunoid Venäman Leningradan agjan videnke rajonanke:

• päivnouzmas Gatčinan rajonanke;
• suves Lugan rajonanke;
• suvipäivlaskmas Slancin rajonanke;
• päivlaskmas Kingiseppan rajonanke;
• pohjoižes Lomonosovan rajonanke.

Ižoran ülüz otab rajonan tobjad palad. Znamasine jogi om Lug sen oiktoidenke ližajogidenke (Vrud i Oredež). Om penid järvid rajonadme. Kaik joged da järved mülüdas Baltijan meren (Atlantižen valdmeren) basseinha.

Londuseližed varad oma turbaz, sauvondmaterialad (šebin', saved, letked, mouckivi), mec, reskvezi.

Tobmuz

Rajonan municipalitetad vl 2014

Vspäi 2006 rajonan territorii jagoihe 16 municipaližeks ühtnikaks: üks' lidnankund i 15 küläkundad. Vn 2019 semendkuspäi kaik seičeme municipalitetad om rajonas: üks' lidnankund i kuz' küläkundad.

Käskusenandai tobmuz om Deputatoiden nevondkund (ven.: Совет депутатов) 32 ühtnijanke. Kaik rahvaz valičeb heid videks vodeks. Järgvaličendad sihe oliba vn 2014 sügüz'kun 14. päiväl (koumanz' kucund). Viktor Savenkov radab sen ezimehen da rajonan pämehen vn 2014 sügüz'kun 29. päiväspäi. Deputatoiden nevondkund valičeb rajonan administracijan pämest.

Vn 2006 vilukun 1. päiväspäi Vasilii Rižkov radab rajonan administracijan pämeheks koumanden strokun jäl'geten. Koume varapämest oma hänele abhu. Kaik nell' komitetad, viž palakundad, kahesa sektorad, laudkund da inspekcii alištudas rajonan administracijan pämehištole.

Eläjad

Vn 2010 Venäman rahvahanlugemižen mödhe rajonan eläjiden lugu oli 49 443 ristitud (15nz' sija agjas 18:späi), vn 2021 — 50 376 ristitud. Kaikiš suremb rajonan ristitišt oli 50 519 eläjad vl 1939 i enamba 51 tuh. elajid vll 2014−2020 (51 923 rist. vl 2017).

Kaik om 202 eländpunktad rajonas, sidä kesken üks' lidn, 21 žilod, üks' žilo raudtestancijanno da 179 küläd.

Toižed znamasižed eländpunktad oma Begunici-külä (3,7 tuh. rist. vl 2010), Sur' Vrud-külä (2,3 tuh. rist. vl 2010), Izvar-külä (2,2 tuh. rist. vl 2010), Kikerino-žilo (2,1 tuh. rist. vl 2013) da Sel'co-žilo (2,1 tuh. rist. vl 2010).

Rahvahad (enamba 0,4 % vn 2010 Venäman rahvahanlugemižen mödhe): venälaižed — 88,8 %, ukrainalaižed — 1,8 %, vaugedvenälaižed — 1,2 %, armenijalaižed — 0,9 %, azerbaidžanlaižed — 0,7 %, uzbekalaižed — 0,6 %, suomalaižed — 0,5 %, tadžikalaižed — 0,5 %, totarlaižed — 0,5 %, toižed rahvahad — 2,7 %, rahvahuden ozutandata — 1,8 % (jäl'gmäižiden keskes 8,4 % mahttas pagišta venäkelel).

Erased-se igähižed rahvahad: estilaižed — 111 rist. (0,22 %), karjalaižed — 24 rist. (0,05 %), saamalaižed — 2 rist. (vähemb mi 0,01 %), vepsläižed — 2 rist. (vähemb mi 0,01 %), ižoralaižed — 1 rist. (vähemb mi 0,01 %).

Ižanduz

Rajonan ižandusen päsarakod oma mecan varhapanend da ümbriradmine, sauvond da sauvondmaterialoiden tehmine (apakod puspäi, laudad da lahkod, kuivad sauvondsegoitused, gazbeton), sömtegimišt, maižanduz (maid, kartohkan kazvatuz), turizm.

Irdkosketused

• Volosovon rajonan oficialine sait (волосовскийрайон.рф). (ven.)