Slancin rajon
Slancin rajon (ven.: Сла́нцевский райо́н) om Venäman municipaline ühtnik Leningradan agjas.
Znam (text).png)
|
Flag (text).png)
|
| Valdkund | Venäma |
| Administrativine keskuz | Slanci |
| Eläjiden lugu (2024) | 44,406 ristitud |
| Pind | 2191,09 km² |
.svg)
| |
Administrativine keskuz om Slanci-lidn. Se mülüb rajonha vspäi 2006, sijadase rajonan päivlaskmas. Rajonan ristitišton koume nelländest eläb siš.
Istorii
vajehtaRajonan aluz om pandud vn 1941 keväz'kun 11. päiväl Leningradan agjaha Kingiseppan da Gdovan rajoniden paloišpäi, panihe Slanci-radnikžilod sen keskuseks.
Toižen mail'man sodan aigan vozil 1941 (heinku) — 1944 (uhoku) rajonan territorii oli okkupiruidud nacistižen Germanijan sodavägil. Vl 1945 ühtištadihe rajonanke Narv-jogen oiktan randpolen palad (Estinman NST:an enzne pala) kahteks küläkundaks. Vozil 1958−2006 Slanci-lidn oli alištunu agjan tobmudele. Vl 1963 rajonan territorii läksi Kingiseppan rajonha i Lugan rajonha. Vl 1965 Slancin rajonan udessündutamižes pördutihe vaiše küläkundoid Kingiseppan rajonaspäi. Rajon om olmas nügüdläižiš röunoiš vspäi 2006.
Geografijan andmused
vajehtaSlancin rajon om Leningradan agjan suvipäivlaskmaine taho. Pind — 2 191 nellikkilometrad (agjan 16nz' surtte 17:späi). Mecad ottas territorijan koume nelländest (1 638 km²)[1].
Om röunoid Venäman videnke rajonanke da Estinmanke:
- pohjoižpäivnouzmas Leningradan agjan Volosovon rajonanke;
- päivnouzmas Leningradan agjan Lugan rajonanke;
- suves Pskovan agjan Plüssan rajonanke;
- suvipäivlaskmas Pskovan agjan Gdovan rajonanke;
- päivlaskmas Estinmanke;
- pohjoižes Leningradan agjan Kingiseppan rajonanke.
Znamasižed joged oma Luganjogi da Narv (lanktas Suomen lahthe), rajon sijadase niiden keskes. Kaikiš suremb vezišt om ratud Narvan vezivaradim (191,4 km²), sen suvipala mülüb rajonha, znamasine Plüssanjogi lankteb sihe. Joged da järved mülüdas Baltijan meren (Atlantižen valdmeren) basseinha.
Londuseližed varad oma palab šoidkivi, turbaz, sauvondmaterialad (mouckivi, letked, saved), mergel', dolomit, fosforitad, mec, reskvezi[2].
Tobmuz
vajehta
Vspäi 2006 rajonan territorii jagase seičemeks municipaližeks ühtnikaks: üks' lidnankund i kuz' küläkundad.
Käskusenandai tobmuz om Deputatoiden nevondkund (ven.: Совет депутатов) 21 ühtnijanke. Kaik rahvaz valičeb heid videks vodeks. Järgvaličendad sihe oliba vn 2014 sügüz'kun 14. päiväl (koumanz' kucund). Marina Čistova radab sen ezimehen da rajonan pämehen vn 2014 sügüz'kun 30. päiväspäi. Deputatoiden nevondkund valičeb rajonan administracijan pämest.
Vn 2014 redukun 31. päiväl Igor' Födorov om valitud ezitajil i om pandud rajonan administracijan pämeheks, radab kontraktan mödhe ezmäižen strokun. Nell' varapämest oma hänele abhu. Kaik üks'toštkümne komitetad, nell' palakundad, koume sektorad, radnikoičend, aburadnikoičendoiden ohjastuz da laudkund alištudas rajonan administracijan pämehištole.
Eläjad
vajehtaVn 2010 Venäman rahvahanlugemižen mödhe rajonan eläjiden lugu oli 43 523 ristitud (ezijäl'gmäine, 16nz' sija agjas), vn 2021 — 45 902 ristitud. Kaik 43 229 eläjad oli rajonas vl 2017. Kaikiš suremb rajonan ristitišt oli 45 400 eläjad vl 2006 i 45 902 eläjad vl 2021.
Kaik om 156 eländpunktad rajonas, sidä kesken üks' lidn, nell' žilod, üks' raudtestancijan žilo, 148 küläd, üks' futor da üks' sijaine.
Toižed znamasižed eländpunktad oma Viskatk-külä (1,6 tuh. rist. vl 2010) da Gostici-külä (1,2 tuh. rist. vl 2010).
Rahvahad (enamba 0,4 % vn 2010 Venäman rahvahanlugemižen mödhe): venälaižed — 82,0 %, ukrainalaižed — 1,2 %, vaugedvenälaižed — 1,2 %, toižed rahvahad — 2,7 %; rahvahuden ozutandata — 12,9 % (heišpäi vaiše 2,7 % mahttas pagišta venäkelel).
Erased-se igähižed rahvahad: estilaižed — 87 rist. (0,20 %), karjalaižed — 18 rist. (0,04 %), suomalaižed — 17 rist. (0,04 %), vepsläižed — 2 rist. (vähemb mi 0,01 %), ižoralaižed — 1 rist. (vähemb mi 0,01 %)[3].
Ižanduz
vajehtaRajonan ižandusen päsarakod oma[4]:
- sauvondmaterialoiden tehmine (cement, gazbeton, raudbetonkonstrukcijad);
- sauvond;
- mouckiven da palaban šoidkiven samine;
- himine tegimišt (poltuz laivoiden täht, räzintegesed, kengäd-«slancad», fenolkerthed);
- mecan varhapanend;
- sömtegimišt;
- maižanduz (lehmänmaid, lehmänliha, kartohk, torp).
Homaičendad
vajehta- ↑ Slancin rajonan investicine pasport (lenoblinvest.ru). — 29 lp. — Lp. 3. (ven.)
- ↑ Slancin rajonan investicine pasport (lenoblinvest.ru). — 29 lp. — Lp. 29. (ven.)
- ↑ Национальный состав и владение языками, гражданство населения Ленинградской области (Leningradan agjan rahvahaline mülükund, ristitišton kel'mahtod da rahvahanikuz.) / Стат. сборник. Часть 1. — СПб.: Петростат, 2013. — 266 lp. — Lp. 78. (ven.)
- ↑ Slancin rajonan investicine pasport (lenoblinvest.ru). — 29 lp. — Lpp. 12−21, 27−28. (ven.)
Irdkosketused
vajehta