Belomorsk

Belomorsk (ven.: Беломо́рск, karj.: Šuomua — «sokaz rand», suom.: Sorokka) om Venäman lidn da raudtesol'm Karjalan Tazovaldkundan päivnouzmas. Se om Belomorskan rajonan administrativine keskuz da üks'jäine lidn.

Belomorsk
Беломорск (ven.)
Šuomua (karj.)
Sorokka (suom.)

Lidnanznam	Flag
Valdkund	Venäma
Eläjiden lugu (2020)	9,199 ristitud
Pind	13 km²
Pämez'	Irina Filippova (sügüz'ku 2018—)
Telefonkod	+7−81 437-xx-xxx
Avtokod	10
Aigvö	UTC+3 (MSK+0)

Istorii

Eländpunkt mainitase ezmäižen kerdan vl 1419 kuti külä Vig-jogensun Sorok-vezisonen randoil (ven.: Сорока, sündui karjalan «saari»- i «joki»-sanoišpäi). Vl 1429 tetaban Solohkan jumalankodin German da Savvatii alusenpanijad oigenziba Solohkile arni neciš küläspäi. Vspäi 1551 Sorockai-külä (ven. деревня Сороцкая) oli alištunu Solohkan jumalankodile.

Vozil 1869−1912 koume mectegint purulikutimil oli saudud Sorok-külän laptoiš.

Vozil 1931−1941 Belbaltlag sijazihe lidnas da sen ümbrištos, sen ühthine ristitišt saihe 100 tuhazesai aigoidme. Lagerin türmatud sauvoihe Vaugedmeren-Baltijanmeren vezited, Segežan mechimkombinatad, varhapanihe mecad Pudožalesai.

Vl 1938 sügüz'kun 11. päiväl Sorok-külä, mecančapajiden, veziradnikoiden žilod i Sorokskai-žilo raudtestancijanno oliba ühtenzoittud lidnha uden Belomorsk-nimenke.

Toižen mail'man voinan aigan vozil 1941−1944 Belomorsk oli Karjalaiž-Suomen NST:n pordaigaližeks pälidnaks.

Belomorskan ižandusen päsarakod oma mecan ümbriradmine, kalan püdo da kazvatand, sauvondkiven i šebnän samine, gidroenergetik (Belomorskan GES). Mugažo meriport (vspäi 1934) i leibtegim oma lidnas.

Geografijan andmused

Lidn sijadase rajonan keskuses, seižub Vauktan meren suvipäivlaskmaižel randal, Vig-jogensun randoil, Šižn'-vezisonen da Vaugedmeren-Baltijanmeren veziten hural randpolel, 10 m ü.m.t. keskmäižel korktusel. Matkad Petroskoihesai om 304 km orhal suvhe, 372 km avtotedme. Lähembaine lidn om Kem', 49 km pohjoižhe.

Kaik 11 eländpunktad mülüdas Belomorskan lidnankundha (om sätud vl 2004, pind 258 km²): kuz' žilod, nell' küläd da üks' žilo raudtesarakonno. Niiden ühthine ristitišt om 865 eläjad vl 2016, heišpäi 643 ristitud elihe Zolotec-žilos (vl 2013).

Tobmuz

Järgenduseližed valičendad lidnankundan Nevondkundha (ven.: Совет поселения) oliba vn 2013 sügüz'kun 8. päiväl (koumanz' kucund). Kaik rahvaz valičeb sen 15 ezitajid videks vodeks. Nevondkundan ezitai radab lidnankundan pämeheks. Edeline lidnankundan pämez' om Vera Jelisejeva (2013 — sügüz'ku 2018).

Ičeze Administracijad lidnas ei ole vn 2014 kezakuspäi, Belomorskan rajonan administracii tegeb lidnankundan velgusidme.

Eläjad

Vl 1959 lidnan eläjiden lugu oli 14 783 ristitud. Sen jäl'ghe kaikiš suremb ristitišt oli 19 tuhad eläjid vl 1992. Vn 2010 kaiken Venäman rahvahanlugemižen mödhe lidnan eläjiden lugu oli 11 217 ristitud. Vl 2016 lidnan ristitišt oli 10 052 eläjad, lidnankundan — 10 917 eläjad. Rajonan ristitišton koume videndest eläb lidnas.

Ortodoksižen hristanuskondan kaks' jumalanpertid oma avaitud lidnas: phh. Zosima i Savvatii Solohkalaižiden (letihe vll 2004−2005), ph. Mikulai-čudonsädajan (om vanhas pertiš vspäi 1993).

Pohjoižen kolledžan (Segež) filial om lidnan profopendusen aluzkundaks.

Transport

Avtobusad oma kundaližeks transportaks lidnan südäimes.

Matkad «Kol»-avtotehesai (M18, vspäi 2018 Р21, mülüb E105-avtomaršrutha) om 36 km lidnaspäi päivlaskmpolehe avtotesarakodme.

Galerei

• 
  «Belomorskan petroglifad»-kodirandantedištandmuzei (2020)
• 
  Phh. Zosiman, Savvatijan i Germanan Solohkilaižiden jumalanpert' kos'kenno, vn 2020 nägu
• 
  Vaugedmeren-Baltijanmeren veziten šlüz nomer 19 lidnas vl 2018
• 
  «Rostelekom:an» sauvuz i počtamt (2020)
• 
  Belomorsk-raudtestancijan sauvuz vl 2006

Irdkosketused

• Belomorsk-lidnankund Belomorskan rajonan oficialižel belomorsk-mo.ru-saital. (ven.)
• Belomorskan rajonan oficialine sait (belomorsk-mo.ru). (ven.)