Kostamukš

Kostamukš (ven.: Костому́кша, ičen. karj. Koštamuš, suom.: Kostamus) om Venäman lidn da lidnümbrik Karjalan Tazovaldkundan lodehes. Se om Karjalan koumanz' lidn eläjiden lugun mödhe.

Kostamukš
Костомукша (ven.)
Koštamuš (ičen. karj.)
Kostamus (suom.)

Lidnanznam	Flag
Valdkund	Venäma
Eläjiden lugu (2022)	29,739 ristitud
Pind	15 km²
Pämez'	Anna Bendikova (reduku 2014—)
Telefonkod	+7−81 459-xx-xxx
Avtokod	10
Aigvö	UTC+3 (MSK+0)

Istorii

Nügüdläine eländpunkt om saudud enččiden Kontokki- i Kostamukš-küliden sijas kuti žilo sädamha sijaližen raudkivendon ümbriradajad kombinatad. Se sai oficiališt statusad (lidnanvuitte žilo) vn 1977 17. päiväl kül'mkud. Vspäi 1983 (25. sulaku) Kostamukš om lidnan statusanke. Lidnanpäiv praznuiše semendkun 1. päiväl. Vspäi 2007 Kostamukš ei mülü röunmaha, tulend lidnha om joudai.

Raudkivendon küllästamižkombinat zavodi tehmižen vozil 1982−1984. Se sijadase 13 km pohjoižpäivnouzmha lidnan fartaloišpäi. Kostamukš šingotase mugažo mecan ümbriradmižel, sömtegimištol (leibtegim, torpan kazvatuz), avtoelektropaloiden pästandal i turizmal.

Geografijan andmused

Lidn seižub Kontokkijärven (Kondokijärven) päivlaskmaižen i suvižen randpolil, 220 m ü.m.t. keskmäižel korktusel. Matkad Petroskoihesai om 365 km orhal suvipäivnouzmha, 491 km avtotedme. Matkad Suomenman röunhasai om 35 km päivlaskmha, röunal raudten da avtoten «Lüttä-Vartius»-kontrol'punkt om olmas.

Zarečnii-žilo (136 rist. vl 2013), Voknavolok-külä (401 rist. vl 2013) i nell' pen't küläd (6 rist. vl 2013) mülüdas lidnümbrikho Kostamukšan ližaks. Kostamukšan lidnümbrikon pind om 4 046 km² (13nz' sija tazovaldkundas rajoniden i lidnümbrikoiden keskes).

Eläjad

Vl 1979 lidnan ristitišt oli 4 366 eläjad, vl 1989 — 30 432 eläjad. Vn 2010 kaiken Venäman rahvahanlugemižen mödhe lidnan eläjiden lugu oli 28 436 ristitud, lidnümbrikon — 28 997 ristitud. Kaikiš suremb lidnan ristitišt oli 31 900 eläjad vl 2001. Vl 2018 kaik 29 381 ristitud elihe lidnas i 29 906 ristitud kaikes lidnümbrikos.

Ortodoksižen hristanuskondan koume pühäpertid oma olmas lidnümbrikos: Jumalanmaman Katken kafedraline päjumalanpert' (Kostamukš) Emäganpäivän časounänke i ph. Illä-endustajan jumalanpert' (Voknavolok).

Kostamukšan politehnine kolledž om professionaližen opendusen aluzkundaks.

Transport

Päraudtestancii om lidnan pohjoižel röunal.

Kostamukš-lendimport civiližiden südäireisiden täht (КСШ) sijadase vides kilometras päivlaskmha lidnaspäi, vspäi 2013 se ei ole rados.

Galerei

• 
  Jäskul'ptur «Severstal'»-kompanijan «Karel'skii okatiš»-edheotandan kontoranno (2008)
• 
  Vižkümnenden päivän hristanuskojiden jumalanpert', vn 2006 nägu
• 
  Raudkivendon pelletoiden tegim («Karel'skii okatiš», 2008)
• 
  «Družba»-kul'turkeskuz (2006)
• 
  Kostamukš-Passažiroiden-raudtestancii vl 2018

Irdkosketused

• Kostamukšan lidnümbrikon oficialine sait (kostomuksha-city.ru). (ven.)