Skopin

Skopin (ven.: Скопи́н) om Venäman lidn da lidnümbrik Räzanin agjan suvipäivlaskmas. Se om agjan koumanz' lidn eläjiden lugun mödhe, om Skopinan rajonan administrativižeks keskuseks mugažo, ei mülü sihe.

Skopin
Скопин

Lidnanznam	Flag
Valdkund	Venäma
Eläjiden lugu (2019-01-01)	26,005 ristitud
Pind	30 km²
Pämez'	Vladimir Stroganov (reduku 2018—)
Telefonkod	+7−49 156-xx-xxx
Avtokod	62
Aigvö	UTC+3 (MSK+0)

Istorii

Lidnan ümbrišt om elänzoittud neolitan aigaspäi. Suomalaiž-ugrilaižiden lidneihut tedoidase arheologoil, oli olmas läz lidnad 12. voz'sadal.

Nügüdläižen eländpunktan aluz om pandud kuti varmitadud lidnuz 16. voz'sadal. Nimituz libub kalahabuk-lindun venäkel'žes nimespäi (скопа) vai mehen Skopa-närituznimespäi «varakaz». Skopin mainitase Räzanin randan aigkirjoiš ezmäižen kerdan vl 1597 kuti amuižen Romanovad-bajariden heimon (dinastii möhemba) valdoičendsija. Nimitihe Skopinskai-slabadaks (ven.: Скопинская слобода) 17. voz'sadan lopus. Sai makundan lidnan oficiališt statusad vl 1778.

Raudtestancii radaškanzi «Väz'm — Räžsk»-keskustal vn 1870 tal'vkus. Toižen mail'man sodan aigan lidn oli okkupiruidud nacistoil vaiše ühteks päiväks, vn 1941 25. kül'mkud, no lidnan ižanduz oli muretud lujas bombardiruindan tagut. Nevondkundaližen aigan metallurgine kombinat radoi i travi londust, äi arsenan jändusid.

Skopin šingotase mašinansauvomižel (amortizatorad da toižed avtokomponentad, kaivuzmašiništon tegim), sömtegimištol (lihanümbriradai tegim, kül'menzoittud pol'fabrikatad), zell'tegimel, silikatoiden tegimel, čomamahtoližen keramikan fabrikal i turizmal. Motokrossan trass om olmas lidnas.

Geografijan andmused

Lidn sijadase rajonan päivnouzmas, Vörd-jogen hural randal (ven.: Вёрда 74 km pitte, Okan oigedpol'ne bassein), 150 m ü.m.t. keskmäižel korktusel. Matkad Räzanihesai om 91 km pohjoižhe orhal, 97 km avtotel vai 160 km raudtel. Lähembaižed lidnad oma Novomičurinsk 28 km pohjoižpäivnouzmha orhal, 37 km avtotedme vai 35 km raudtedme, i Korablino 33 km päivnouzmha-pohjoižpäivnouzmha orhal, 36 km avtotedme vai 65 km raudtedme. Skopin-raudtestancii radab lidnan päivnouzmas. «Kaspii»-mante mäneb 4 km päivnouzmha lidnaspäi, sarak tuleb lidnha trassaspäi.

Kaks' žilod i koume küläd mülüdas lidnümbrikho Skopinan ližaks. Lidnümbrikon pind — 30,9 km².

Eläjad

Vl 1897 lidnan ristitišt oli 13 247 eläjad, vl 1939 — 13 250 eläjad. Vn 2010 Venäman rahvahanlugemižen mödhe lidnan eläjiden lugu oli 30 376 ristitud, lidnümbrikon — 31 478 ristitud. Kaikiš suremb lidnan ristitišt oli 32 300 eläjad vl 2005. Kaik 27 039 ristitud elihe lidnümbrikos vl 2019.

Rahvahad (lidnalaižed, 2010): venälaižed — 97,4%, toižed rahvahad — 2,6%. Ortodoksižen hristanuskondan ph. Dimitrii Solunalaižen mez'jumalankodi, ph. Stroican (Pühän Hengen) mez'jumalankodi, Sündun Sretenjan päjumalanpert' i nell' jumalanpertid oma olmas lidnas.

Professionaližen opendusen aluzkundad oma Skopinan elektrotehnine kolledž i Räzanin medicinižen kolledžan filial.

Galerei

• 

  Kul'turkeskuz

• 

  Ph. Mikulai-čudonsädajan jumalanpert'
  (vn 2011 nägu)

• 

  Avtoagregatoiden tegim

• 

  Skopinan tehniž-ekonomine kolledž (2011), vn 2012 heinkuspäi elektrotehnine kolledž

• 

  Päraudtestancii vl 2016

Irdkosketused

• Lidnümbrikon tobmuden aluzkundoiden sait (skopingorod.ryazangov.ru). (ven.)
• Lidnan turizman ohjastusen sait (okt-skopin.org). (ven.)