Ribnoje (lidn, Räzanin agj)

Ribnoje (ven.: Ры́бное) om Venäman lidn da lidnankund Räzanin agjan lodehes. Se om Räzanin lodehline kaimdailidn, Ribnojen rajonan administrativine keskuz.

Ribnoje
Рыбное

Lidnanznam	Flag
Valdkund	Venäma
Eläjiden lugu (2023)	21,200 ristitud
Pind	14,46 km²
Pämez'	Dmitrii Galkin (tal'vku 2022—, velgusentäutai)
Telefonkod	+7−49 137-xx-xxx
Avtokod	62
Aigvö	UTC+3 (MSK+0)

Istorii

Eländpunkt mainitase aigkirjoiš ezmäižen kerdan vl 1597 kuti Ribino-žilo (ven.: село Рыбино), möhemba nimitaškanzihe nügüdläižikš. Nimituz om sidodud kalanpüdandha Vož-jogel. Raudte läbiti žilod vl 1864 i ühtenzoiti Moskvad Räzaninke. Kätihe radnikžiloks vl 1947. Žilo sai lidnan statusad vl 1961, mülütihe lähižid žiloid.

Ribnoje šingotase medicinižen meblin tegimel, varmdoiden kingitamiždetaliden pästandal, betonantegimel, sömtegimištol (maidtegim, leibtegim), raudten edheotandoil. Kaks' federališt tedoinstitutad ratas lidnas: mezjäižvodindan i hebovodindan.

Geografijan andmused

Ribnojen rajonan sijaduz agjas vn 2010 kartal

Lidn sijadase rajonan keskuzpalan päivnouzmas, Vož-jogen oiktal randal (ven.: Во́жа 103 km pitte, Okan oiged ližajogi), 105 m ü.m.t. keskmäižel korktusel.

Matkad Moskvan agjhasai om seičeme kilometrad päivlaskmha i kümne kilometrad lodeheze orhal. Matkad Räzanihesai om koume kilometrad suvipäivnouzmha orhal i raudtel vai viž kilometrad avtotel. Raudte jagab lidnad pohjoižpäivnouzmaižeks i suvipäivlaskmaižeks palaks.

Ribnoje-raudtestancii radab lidnan keskuzpalan lodehes, sen ližaks Räzan' -sortiruindstancii suvipäivnouzmas i koume raudteplatformad: Hodinino, Vedimdepo, Räzan'-sortiruindstancii (ende Eländpertid). «Ural»-avtote (M5-trass) om lidnan suvipäivlaskmaižeks i suvižeks röunaks.

Tobmuz

Ribnoje om lidnankundan üks'jäižeks eländpunktaks. Lidnankundan pind — 14,46 km².

Lidnan Deputatoiden nevondkundan ezimez' om Sergei Gubanov vn 2019 redukuspäi. Vladimir Ivaničkin radoi nevondkundan ezimehen edel vn 2019 redukud. Lidnankundan edeližed Administracijan pämehed oma Galina Mihailicina (semendku 2021 — kezaku 2022, velgusentäutai), Aleksei Polukarov (eloku 2019 — semendku 2021), Mihail Panfilov (semendku 2016 — kezaku 2019).

Eläjad

Vl 1897 žilon ristitišt oli 1 247 eläjad, vl 1939 — 3 025 eläjad. Vn 2010 Venäman rahvahanlugemižen mödhe lidnan eläjiden lugu oli 18 380 ristitud, rajonan pol', vn 2021 — 21 069 ristitud. Kaik 19 265 eläjad oli lidnas vl 2017. Kaikiš suremb lidnan ristitišt oli 18..20 tuhad eläjid vspäi 1989 i om nügüd'.

Rahvahad (2010): venälaižed — 94,6 %, toižed rahvahad — 5,4 %.

Ortodoksižen hristanuskondan koume jumalanpertid oma saudud lidnas: ph. Mikulai-čudonsädajan kivine (uz', 1999−2005), Jumalanmaman Kazanin jumalaižen puine (letihe vll 2006−2008), Jumalanmaman «Rigomanahin'»-jumalaižen kivine (saudihe vll 2018−2020) jumalanpertid.

Lapsiden opendusen aluzkundad oma päivkodid, keskškolad. Lähembaižed professionaližen opendusen aluzkundad ratas Räzaniš.

Galerei

• 
  Lidnan administracijan pert' (2010)
• 
  Ph. Mikulai-čudonsädajan jumalanpert', vn 2010 nägu
• 
  Mezjäižvodindan tedoinstitut vl 2014
• 
  Kodirandantedištandmuzei (2010)
• 
  Ribnoje-raudtestancii vl 2010

Irdkosketused

• Lidnan tobmuden aluzkundoiden sait (rybnoe-rzn.ru). (ven.)
• Lidnan informacine sait (rybnoe.net). (ven.)