Sasovo

Sasovo (ven.: Са́сово) om Venäman lidn da lidnümbrik Räzanin agjan päivnouzmas. Se om agjan nellänz' lidn eläjiden lugun mödhe, om Sasovon rajonan administrativižeks keskuseks mugažo, ei ole rajonan palaks.

Sasovo
Сасово

Lidnanznam	Flag
Valdkund	Venäma
Eläjiden lugu (2019-01-01)	24,523 ristitud
Pind	23,79 km²
Pämez'	Sergei Dzüba (keväz'ku 2008—)
Telefonkod	+7−49 133-xx-xxx
Avtokod	62
Aigvö	UTC+3 (MSK+0)

Istorii

Eländpunktan aluz om pandud 16. voz'sadan keskes. Mainitase ezmäižen kerdan Šackan makundan aigkirjas vl 1617. Nimituz libub hristianižen Sasonii-nimen Sas-lühendusespäi i türkižen sas / saz-sanaspäi «sokaz tahond», lidnan totaran nimi om Саз. Šingotihe kervačuiden da noroiden tehmižel laivoiden täht. Oli torgovanoiden lidnaks 19. voz'sadal. Raudte tuli žilho Räzanišpäi vl 1893. Sai lidnan statusad vn 1926 19. päiväl kezakud.

Sasovo šingotase mašinansauvomižel (takermpuiden tegim i maižanduzmašinoiden tegim), sömtegimištol (maidtegim, leibtegim, villän varažom), raudten edheotandoil, mugažo omblendfabrik i «Yandex»-kompanijan datakeskuz ratas lidnas.

Geografijan andmused

Lidn sijadase rajonan keskuzpalan päivlaskmas, Cnanjogen alajoksmusen hural randal päpaloin (ven.: Цна 451 km pitte, Okan oigedpol'ne bassein), 105 m ü.m.t. keskmäižel korktusel. Avialidnut lendimportanke oma saudud Cnan oiktal randal. Matkad Räzanihesai om 144 km päivlaskmha orhal, 200 km avtotel vai 174 km raudtel. Lähembaine lidn om Šack 39 km suvhe-suvipäivlaskmha orhal vai 42 km avtotedme. Raudte om lidnan suviröunaks, Sasovo-raudtestancii radab läz lidnan keskuzpalad. «Kasimov — Šack»-avtokeskust läbitab lidnad, ümbärte om sauvomas päivlaskmha lidnaspäi.

Sasovo om lidnümbrikon üks'jäine eländpunkt. Lidnümbrikon pind — 23,79 km².

Eläjad

Vl 1894 žilon ristitišt oli 6 500 eläjad, lidnan vl 1939 — 17 099 eläjad. Vn 2010 Venäman rahvahanlugemižen mödhe lidnan eläjiden lugu oli 28 118 ristitud. Kaikiš suremb lidnan ristitišt oli 34..35 tuhad eläjid vll 1989−1998 (35 875 rist. vl 1989).

Rahvahad (2010): venälaižed — 94,4%, totarlaižed — 2,0%, toižed rahvahad — 3,6%.

Ortodoksižen hristanuskondan kuz' pühäpertid oma olmas lidnas: Jumalanmaman Kazanin jumalaižen päjumalanpert' (om saudud vl 1826), koume jumalanpertid i kaks' časounäd.

Sasovon civiližen aviacijan lendandškol (aluz om pandud vl 1943) i Sasovon industrialine kolledž oma lidnan professionaližen opendusen aluzkundoikš.

Galerei

• 
  Znam lidnan röunal
• 
  Jumalanmaman Kazanin jumalaižen päjumalanpert'
  (vn 2018 nägu)
• 
  Avtomatjonoiden tegim
• 
  Aviacijan profškolan lendimport
• 
  Raudtestancii vl 2009

Irdkosketused

• Lidnümbrikon tobmuden aluzkundoiden sait (sasovogorod.ryazangov.ru). (ven.)