Korablino

Korablino (ven.: Кораблино́) om Venäman lidn Räzanin agjan suves. Se om Korablinon ümbrikon (edel vn 2024 kezakud — rajonan) administrativižeks keskuseks da palaks.

Korablino
Кораблино

Lidnanznam	Flag
Valdkund	Venäma
Eläjiden lugu (2023)	10,084 ristitud
Pind	15 km²
Pämez'	Jelena Komägina (reduku 2022—)
Telefonkod	+7−49 143-xx-xxx
Avtokod	62
Aigvö	UTC+3 (MSK+0)

Istorii

Eländpunkt mainitase ezmäižen kerdan vl 1594 Pehlecan stanan maksmižkirjas kuti Korabjinsk-žilo (ven.: село Корабьинск) i mec senno, varhapanihe ninid peniden venehiden täht, niiden venän nimituz oli короб («konor'»). Lidn sijadase amuižel tarabošsijal Donan i Okan basseinoiden keskes. Šingotihe sijaližen villän i tabakon oigenduzbazaks. Kätihe Korablinod rajonkeskuseks vn 1929 heinkus. Buran hilen samine oli Toižen mail'man sodan aigaspäi, i žilo sai radnikžilon statusad vn 1958 semendkus. Om lidnan statusanke vn 1965 sulakun 1. päiväspäi.

Korablino šingotase metalližiden modul'pertiden tegimel, sauvondan edheotandoil i sömtegimištol (maidtegim, leibproduktoiden tegim), mugažo medicinižen kaluišton edheotand radab lidnas. Nevondkundaližen aigan šuukkanghiden kombinat oli olmas lidnas.

Geografijan andmused

Lidn sijadase rajonan suves, 135 m ü.m.t. keskmäižel korktusel. Alöšn'-jogi zavodiše lidnan päivlaskmas (ven.: Алёшня, Pronän oiged ližajogi, Okan oigedpol'ne bassein). Pron'-jogen rand om kümnes kilometras pohjoižhe, sen oiktan Ranov-ližajogen rand (ven. Ранова 166 km pitte) — nelläs kilometras päivnouzmha lidnaspäi.

Matkad Räzanihesai om 81 km pohjoižhe orhal, 97 km avtotel vai 91 km raudtel. Lähembaižed lidnad oma Räžsk 24 km suvhe orhal, 31 km avtotedme vai 26 km raudtedme, i Novomičurinsk 23 km lodeheze orhal vai 27 km avtotedme. Korablino-raudtestancii radab lidnan päivlaskmas «Räzan' — Mičurinsk»-keskustal vspäi 1866.

Tobmuz

Lidnankund oli lidnan territorijal vll 2006−2024, Korablino oli lidnankundan üks'jäižeks eländpunktaks.

Lidnankundan tobmuden pämez' oli sen Deputatoiden nevondkundan ezimez'. Kaik rahvaz valiči nevondkundan 15 deputatad nelläks vodeks. Nevondkund om likvidacijan pordhal vn 2024 kül'mkuspäi, likvidator om Jelena Komägina. Edeline nevondkundan ezimez' oli Lüdmila Andrejeva (sügüz'ku 2017 — reduku 2022). Lidnan Administracijan pämez' oli Väčeslav Jermakov vn 2011 redukuspäi.

Eläjad

Vl 1939 žilon ristitišt oli 2 098 eläjad, vl 1959 — 5 265 eläjad. Vn 2010 Venäman rahvahanlugemižen mödhe lidnan eläjiden lugu oli 12 658 ristitud, rajonan pol', vn 2021 — 10 334 ristitud. Kaik 11 272 eläjad oli lidnas vl 2017. Kaikiš suremb lidnan ristitišt oli 15..16 tuhad eläjid vll 1989−2001 (16 100 rist. vll 1996−1998).

Rahvahad (2010): venälaižed — 98,2 %, toižed rahvahad — 1,8 %.

Ortodoksižen hristanuskondan kaks' jumalanpertid oma kaičenus i saudud lidnas: Jumalanmaman Katken kivine (letihe vll 1895−1905) i Jumalanmaman Kazanin jumalaižen puine (saudihe vll 2007−2008).

Lapsiden opendusen aluzkundad oma kaks' nimitadud päivkodid, koume keskškolad (nomer 1, 2 i I.V. Saričevan nimed), muzikškol, čomamahtoine škol, Rekord-sportškol. Räžskan kolledžan Korablinon palakund (edel vn 2022 heinkud Korablinon agrotehnologine tehnikum) om lidnan professionaližen opendusen aluzkundaks.

Galerei

• 
  Lidnan Administracijan pert' (2013)
• 
  Jumalanmaman Katken jumalanpert', vn 2017 nägu
• 
  Kul'turkeskuz (2013)
• 
  Korablino-raudtestancii vl 2014

Irdkosketused

• Lidnan tobmuden aluzkundoiden sait (gorod-korablino.ru). (ven.)