Ohansk

Ohansk (ven.: Оха́нск, perm. komi: Оханнӧй) om Venäman lidn Permin randan suvipäivlaskmas. Se om Ohanskan lidnümbrikon (edel vn 2019 vilukud — rajonan) administrativižeks keskuseks da palaks, sen üks'jäine lidn.

Ohansk
Оханск

Lidnanznam	Flag
Valdkund	Venäma
Eläjiden lugu (2023)	6,290 ristitud
Pind	17,6 km²
Telefonkod	+7−34 279-xx-xxx
Avtokod	59, 81, 159
Aigvö	UTC+5 (MSK+2)

Istorii

Eländpunktan aluz om pandud Stroganovad-torgovanoiden pätandan mödhe vl 1547 kuti kalanpüdajiden Ohan' -slabad. Sen nimi sündui sijaližes ven.: охань-sanaspäi «harvsil'maine verk püdamha kalad». Om lidnan statusanke vspäi 1781. Vl 1923 Ohanskan rajon oli sätud, i Ohansk kändihe sen keskusen.

Lidnan tegimišton edheotandad oma omblendfabrik (paidad, nahkkurtad, naižhalatad), leibänkombinat, mecanümbriradai edheotand. Ohansk om maižanduzrajonan keskuseks. Permin universitetan biostancii sijadase lidnas tedoidamha vezivaradimen biologijad.

Geografijan andmused

Lidn sijadase Kam-jogen Votkinskan vezivaradimen (vspäi 1964) oiktal randal, 110 m ü.m.t. keskmäižel korktusel, «Kazan' — Perm'»-avtotel.

Matkad Permihesai om 60 km pohjoižpäivnouzmha orhal, 72 km avtotedme vai 126 km Kam-jogel. Toižed lähembaižed lidnad oma Očor 44 km lodeheze orhal vai 68 km avtotedme i Nitv (lähembaine raudtestancii) 25 km pohjoižhe orhal vai 48 km avtol.

Tobmuz

Ohansk oli lidnankundan üks'jäižeks eländpunktaks.

Lidnankundan Dum om likvidiruidud vn 2019 heinkus, Tat'jana Bel'tügova radoi likvidacižen laudkundan ohjandajan. Enččen lidnankundan pämez' oli Anatolii Zavjalov vn 2013 sügüz'kuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 7 250 ristitud, koume seičemendest rajonan ristitištos, vn 2021 — 6 430 ristitud. Kaik 7 072 eläjad oli lidnas vl 2017. Kaikiš suremb lidnan ristitišt oli 8800..9000 eläjad vozil 1992−2001 (9 tuh. rist. vll 2000 i 2001).

Ortodoksižen hristanuskondan koume pühäpertid oma kaičenus i saudud lidnas: Jumalanmaman Emäganpäivän päjumalanpert' (letihe vll 1820−1830), ph. Aleksandr Nevalaižen jumalanpert' i časoun'.

Lapsiden opendusen aluzkundad oma koume päivkodid, keskškol, specialine korrekcine škol lapsiden täht tervhuden röunatud voimusidenke, openduz- da muzeiradmižen keskuz, čomamahtoiden škol, «Meteorit»-sportškol. Stroganovan kolledžan (Očor-lidn) Ohanskan filial om lidnan professionaližen opendusen aluzkundaks.

Galerei

• 
  Korrekcine škol (2015, ende naižgimnazii)
• 
  Jumalanmaman Emäganpäivän päjumalanpert', vn 2015 nägu
• 
  Sijaližen pressan pert' (2015, ende N. Vinokurov-torgovanan pert')
• 
  Stroganovan kolledžan Ohanskan filial (2018, ende makundan ohjandusen sauvuz)
• 
  Pavel Šardakov-pirdajan kuvagalerei (2018, realižen školan istorine sauvuz)
• 
  Nevondkundaline lidnanznam (1980)

Irdkosketused

• Lidnümbrikon oficialine sait (ohansk-adm.ru). (ven.)
• Ohanskan Kompleksine čomamahtoine kodirandantedištandmuzei P.F. Šardakovan nimed museum.ru-saital. (ven.)