Berezniki

Berezniki (ven.: Березники́ «koivištod», perm. komi: Кыдззакар) om Venäman lidn da lidnümbrik Permin randan pohjoižes. Se om randan kahtenz' lidn eläjiden lugun mödhe.

Berezniki
Березники

Lidnanznam	Flag
Valdkund	Venäma
Eläjiden lugu (2023)	135,533 ristitud
Pind	431,1 km²
Pämez'	Aleksei Kazačenko (uhoku 2023—)
Telefonkod	+7−3424-xxx-xxx
Avtokod	59, 81, 159
Aigvö	UTC+5 (MSK+2)

Lidnan trolleibusmaršrutoiden kart (2022)

Istorii

Vl 1572 tora oli enččel sarel sijaližiden heimoiden i venälaižiden sirdanikoiden keskes. Läz 1700. vot Kaman joksmuz vajehtihe, sar' kändihe Bereznik-sarikol.

Ezmäižed venäkel'žed eländpunktad mainitadas Kaisarovan aigkirjas vl 1623 i oliba vspäi 1570, saihe keitandsolad niiden ümbrištos: Abramovo, Burundukov počinok (Sömino), Lönv, Berezniki, Usol'je, Veretje, vspäi 1670 — Dedühin-mägilidn. Nügüd'aigaine eländpunkt zavodihe vl 1883 ezmäižen Venäman sodantegimen radnikžiloks.

Vl 1932 ühtištadihe ümbrišton radnikžiloid i külid lidnaks da nimitihe Berezniki-radnikžilon mödhe, nece om eländpunktan alusenpanendan oficialine voz'. Vspäi 1940 Usol'je-lidn om erigoittud Bereznikišpäi, vozil 1949−1954 Usol'je oli upotadud paloin sauvomha Kaman GES:ad, eläjiden tobj pala oli sirtud.

Geografijan andmused

Lidn sijadase Kaman vezivaradimen hural randal, 130 m ü.m.t. keskmäižel korktusel. Karstnägused harakterizuidas Bereznikid solan samižen tagut.

Matkad Permihesai om 180 km suvhe avtotedme, 208 km vetme vai 278 km raudtedme (Čusovoi-lidnan kal't). Lähembaižed lidnad oma Usol'je ühtes kilometras päivlaskmha Kaman vastrandal, Solikamsk pohjoižhe (20 km röunhasai) i Aleksandrovsk 65 km suvipäivnouzmha avtotedme.

Klimat om ven kontinentaline. Voden keskmäine lämuz om +0,9 C°, kezakun-elokun +13,8..+17,7 C°, tal'vkun-uhokun −13..−14 C°. Il'man vozne keskmäine relätivine nepsuz om 74,2 %.

Sadas lidnümbrikos kaliisolid, kivivoid, silikatišt letet.

Tobmuz

Berezniki om lidnümbrikon üks'jäižeks eländpunktaks. Lidnümbrikon pind om 431,1 km², se om ümbärtud Usol'jen rajonan territorijal. Lidnfartaliden pind om 66 nellikkilometrad.

Lidnan tobmuden pämez' (ven.: глава города Березники) om sen Administracijan pämez'. Edeližed lidnan pämehed oma Konstantin Svetlakov (kül'mku 2020 — eloku 2022), Sergei Djakov (2010 — kül'mku 2020). Eduard Smirnov radab lidnan Duman ezimehen vn 2016 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 156 466 ristitud, vn 2021 — 138 069 ristitud. Kaik 145 115 eläjad oli lidnas vl 2017. Kaikiš suremb lidnan ristitišt oli 201 213 eläjad vl 1989.

Ortodoksižen hristanuskondan kümne pühäpertid oma kaičenus i saudud lidnas: kuz' jumalanpertid (üks' om sauptud gruntan uhkundan tagut) i nell' časounäd. Islaman pämečetin ezmäine pala radab vn 2020 kül'mkuspäi.

Transport

Avtobusad, trolleibusad da taksid oma kundaližeks transportaks lidnas. Avtotesild ühtenzoitab lidnad Usol'je-lidnanke vspäi 1981. Vozil 1879−2014 Berezniki-raudtestancii oli olmas, sauptihe gruntan uhkundan tagut.

Tatanmaine civiline Berezniki-lendimport sijadase 16 kilometras pohjoižhe lidnan keskusespäi, vspäi 2001 vaiše specialine aviacii kävutab sidä.

Galerei

• 
  Lidnan administracijan sauvuz (2010)
• 
  Ioann-endustajan pän čapandan jumalanpert' (1757, om sauptud vl 2013 gruntan uhkundan tagut), vn 2015 nägu
• 
  «Uralkalii»-edheotandan kontor vl 2010
• 
  Tegimištzon i pühäpert' vl 2007
• 
  Galurgijan tedoinstitut (2013) i gruntan vitk uhkund
• 
  Kul'turkeskuz Leninan nimed (2012)
• 
  Keskuzline universaline lauk (2012)
• 
  Gruntan uhkund vagzalanno (2012)
• 
  Berezniki-päraudtestancijan sauvuz vl 2011

Irdkosketused

• Lidnan Duman oficialine sait (berduma.ru). (ven.)
• Lidnan administracijan oficialine sait (adm-brz.ru). (ven.)