Gremäčinsk

Gremäčinsk (ven.: Гремячинск, perm. komi: Гремячӧй кар) om Venäman lidn da lidnankund Permin randan päivnouzmas. Se om Gremäčinskan rajonan administrativine keskuz.

Gremäčinsk
Гремячинск

Lidnanznam	Flag
Valdkund	Venäma
Eläjiden lugu (2021)	7,971 ristitud
Pind	65 km²
Pämez'	Vladimir Hmelevskoi (sügüz'ku 2013—)
Telefonkod	+7−34 250-xx-xxx
Avtokod	59, 81, 159
Aigvö	UTC+5 (MSK+2)

Istorii

Eländpunktan aluz om pandud vl 1942 samha kivihil't kaivuziden da Baskai-žilon randtestancijanno (ven.: Баская) ühtištusel, kävutihe ottud plenha saksalaižiden saldatoiden töid. Lidnanvuitte žilo sai lidnan statusad vl 1949. Kivihilen samižen jäl'gmaižed kaivuded oma upotadud 1990-nzil vozil.

Gremäčinsk-lidn šingotase mecan ümbriradmižel kombinatal (koivuine faner, latofleks) da edheotandoil (pilindmaterialad), mugažo sömkombinat i leibkombinat ratas.

Geografijan andmused

Lidn sijadase Sur' Gremäčai-jogen randoil (ven.: Большая Гремячая, 17 km pitte, Kaman hurapol'ne bassein), 340 m ü.m.t. keskmäižel korktusel. Matkad Permihesai om 105 km suvipäivlaskmha orhal vai 170 km avtotedme. Lähembaižed lidnad oma Gornozavodsk 36 km suvipäivnouzmha orhal vai 57 km avtotedme, Čusovoi 32 km suvhe vai 47 km avtotedme i raudtedme, Gubah 35 km pohjoižhe vai 42 km avtol i raudtedme. Baskai-raudtestancii sijadase «Čusovoi — Solikamsk»-jonol lidnan lodehes.

Baseg-raudtesara i Zagotouk-žilo mülüdas lidnankundha Gremäčinskan ližaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 10 752 ristitud, lidnankundan — 10 768 ristitud. Kaikiš suremb lidnan ristitišt oli 38 014 eläjad vl 1959. Vl 1989 kaik 20 977 ristitud elihe lidnas. Ristitišt poleneb Kizelan kivihil'basseinan kaivuziden likvidacijan tagut.

Ortodoksižen hristanuskondan Jumalanmaman Kazanin jumalaižen pühäpert' om olmas lidnas.

Čusovoin industrialižen tehnikuman filial om professionaližen opendusen aluzkundaks.

Irdkosketused

• Lidnan da lidnümbrikon tobmuden aluzkundoiden sait (gremokrug.ru). (ven.)