Nižnevartovsk (ven.: Нижнева́ртовск, tot.: Түбән Варта, ukr.: Нижньовартовськ) om Venäman lidn da lidnümbrik Hantin da Mansin avtonomižen ümbrikon päivnouzmas. Se om ümbrikon kahtenz' lidn eläjiden lugun mödhe, mugažo om Nižnevartovskan rajonan administrativižeks keskuseks (ei mülü sihe).

Nižnevartovsk
Нижневартовск
 Lidnanznam
 Flag
Valdkund Venäma
Eläjiden lugu (2020) 277,668 ristitud
Pind 270,59 km²
Nižnevartovsk Нижневартовск
Pämez' Dmitrii Koščenko
(semendku 2021—)
Telefonkod +7−3466-xxx-xxx
Avtokod 86, 186
Aigvö UTC+5 (MSK+2)

Istorii vajehta

Eländpunktan aluz om pandud vl 1909 kuti Nižnevartovskai-valdmad varatoitmaha torgovanoiden jogipurulaivoid haugoil da Vartovskoje-žilo (ven.: село Вартовское) läz sidä. Vodele 1965 avaitihe kivivoin järedoid löudmižsijid, sidä kesken Samotlor-järvenno (30 km pohjoižpäivnouzmha lidnaspäi), i udesnimitihe žilod Nižnevartovskii (ven.: посёлок Нижневартовский). Žilo da kivivoin samižen edheotand sauvoškanzihe hotkas, hot' tegihe äjid radoid komsomolan sauvondal mašinoita. Nižnevartovsk sai lidnan statusad vn 1972 9. päiväl keväz'kud, i sen-žo voden redukus ezmäine avialinii Moskvhasai ühtenzoiti lidnad mirunke. Vll 1975−1976 saudihe raudted Surgutaspäi, i vl 1980 ajaškanzihe passažirjonusid Sverdlovskhasai.

Nižnevartovsk šingotase kivivoin da sen gazan samižel («Rosneft'»-kompanijan «Samotlorneftegaz» i «RN-Nižnevartovsk»-alajagused), gazan ümbriradmižen kompleksal («SiburTümen'Gaz»-kompanii), kivivoinümbriradmižel, sauvondmaterialiden tegimil i sömtegimištol (kaks' lihaedheotandad, maidtegim, oludtegim, nell' leibänedheotandad, kalanümbriradai tegim).

Geografijan andmused vajehta

Lidn sijadase Ob'-jogen oiktal randal, 45 m keskmäižel korktusel valdmeren pindan päl. Kaik lidn da sen ümbrištod oma saudud sol, seištas pudotesil da vajil. Matkad Hanti-Mansiiskhasai om 408 km päivlaskmha orhal vai 511 km avtotedme. Lähembaižed lidnad oma Streževoi (Tomskan agj) 52 km suvipäivnouzmha orhal vai 63 km avtol i Megion 20 km lodeheze orhal, 25 km avtotedme vai raudtel.

Nižnevartovsk om lidnümbrikon üks'jäine eländpunkt.

Eläjad vajehta

Vn 2010 kaiken Venäman rahvahanlugemižen mödhe eläjiden lugu oli 251 694 ristitud. Kaikiš suremb lidnan ristitišt om nügüd'. Kaik 274 575 eläjad oli lidnas vl 2017.

Rahvahad (enamba 1 % vl 2010): venälaižed — 61,6 %, totarlaižed — 9,1 %, ukrainalaižed — 5,8 %, baškiralaižed — 3,1 %, azerbaidžanlaižed — 1,8 %, vaugedvenälaižed — 1,0 %, toižed rahvahad — 8,6 %, rahvahuden ozutandata — 9,0 %.

Nižnevartovskan valdkundaline universitet[1] (viž tuhad üläopenikoid seičemel fakul'tetal vl 2015), kivivoin institut[2] (Jugran valdkundaližen universitetan filial, ende tehnikum), edheotaikundan tehnikum i nell' kolledžad oma lidnan professionaližen opendusen aluzkundoikš, mugažo om verhiden lidnoiden filialid. Kaik kuz' sportkompleksad ratas lidnas.

Edeline lidnan pämez' om Vasilii Tihonov (reduku 2016 — semendku 2021).

Transport vajehta

Avtobusad da taksid oma kundaližeks transportaks lidnas da sen ümbrištos. Navigacijan aigan voib sadas Hanti-Mansiiskhasai jogiportan kal't, no se radab vemha ujuden jüguid tobjimalaz. Päraudtestancijan sauvuz om loptüd vl 2002 lidnan päivnouzmas.

Rahvahidenkeskeine civiline Nižnevartovsk-lendimport[3] (NJC / НЖВ / USNN, 750 tuh. passažiroid vl 2019) sijadase nelläs kilometras lodeheze lidnan keskusespäi. Tehtas reisid järedoihe lidnoihe Venämadme: Moskv, Tümen', Kazan', Novosibirsk, Irkutsk da erased toižed.

Galerei vajehta

Homaičendad vajehta

  1. Nižnevartovskan valdkundaližen universitetan sait (nvsu.ru). (ven.) (angl.)
  2. Kivivoin institutan sait (Nižnevartovsk, nnt.ugrasu.ru). (ven.)
  3. Nižnevartovsk-lendimportan kompanijan sait (nvavia.ru). (ven.)

Irdkosketused vajehta



Hantin da Mansin avtonomižen ümbrikon lidnad
Belojarskii | Hanti-Mansiisk | Jugorsk | Kogalim | Langepas | Läntor | Megion | Neftejugansk | Nižnevartovsk | Nägan' | Pit' Jah | Pokači | Radužnii | Sovetskii | Surgut | Urai