Sovetskii (Hantin da Mansin avtonomine ümbrik)

Sovetskii (ven.: Сове́тский, tot.: Советский) om Venäman lidn da lidnankund Hantin da Mansin avtonomižen ümbrikon päivlaskmas. Se om Sovetskijan rajonan administrativine keskuz.

Sovetskii
Советский

Lidnanznam	Flag
Valdkund	Venäma
Eläjiden lugu (2021)	29,452 ristitud
Pind	50 km²
Pämez'	Aleksandr Kulagin (sügüz'ku 2020—)
Telefonkod	+7−34 675-xx-xxx
Avtokod	86, 186
Aigvö	UTC+5 (MSK+2)

Istorii

Eländpunktan aluz om pandud vl 1962 kuti ižanduz varhapanemha mecad (mecpromhoz) da Sovetskii-žilo senno. Kätihe žilod lidnanvuiččeks vn 1963 21. päiväl vilukud 1500 eläjanke, i lugetas necidä alusenpanendan oficialižeks dataks. Vn 1963 elokus ezmäine jonuz tuli žilho raudtedme Ivdelišpäi, nügüd' Üläkondan-stancii (ven.: Верхнекондинская) om olmas lidnan keskuses «Ivdel' — Priobje»-raudtekeskustal. Vll 1984−1987 regionaližen lendimportan (OVS / СОЙ) lendahtamižsarg om saudud. Vn 1996 23. päiväl tal'vkud žilo sai lidnan statusad.

Sovetskii šingotase mecan varhapanendal da sen ümbriradmižel sauvondmaterialikš (komplektad sauvomha pertid, kleidüd puižed lehtesed da plitud), meblin tehmižel, mugažo raudbetonkonstrukcijoiden tegim radab.

Geografijan andmused

Lidn sijadase Obin hurapol'žes basseinas, 112 m keskmäižel korktusel valdmeren pindan päl. Matkad Hanti-Mansiiskhasai om 295 km päivnouzmha orhal vai 365 km avtotedme. Lähembaine lidn om Jugorsk 10 km päivlaskmha orhal, raudtel vai avtotedme.

Klimat om ven kontinentaline. Se voib vajehtuda teravas päivesen aigan, sügüzel i kevädel eriližešti. Lidnan tahond om Edahaižen Pohjoižen rajonha tazostadud. Tal'vkun-uhokun keskmäine lämuz om −13..−15 C°, kezakun-uhokun +18..+22 C°. Ekstremumad oma −48 C° i +38 C°.

Sovetskii om lidnankundan üks'jäine eländpunkt. Lidnankundan pind — 388,90 km².

Eläjad

Vn 2010 kaiken Venäman rahvahanlugemižen mödhe eläjiden lugu oli 26 495 ristitud, rajonan koume videndest. Kaikiš suremb lidnan ristitišt oli 29 624 eläjad vl 2019.

Rahvahad (enamba 1,3% vl 2010, ozutadud rahvahudenke): venälaižed — 78,7%, totarlaižed — 7,8%, ukrainalaižed — 3,2%, azerbaidžanlaižed — 1,6%, baškiralaižed — 1,3%, toižed rahvahad — 7,4%.

Ortodoksižen hristanuskondan koume jumalanpertid oma saudud lidnas: Sündun Voznesen'jan (om saudud vll 2014−2019), Mikulai-čudonsädajan (vll 1990−1997) i ph. Ksenija Piterilaižen (letihe vl 2015). Islaman «Nur»-pühäpert' (2015) oma olmas lidnas.

Sovetskijan politehnine kolledž om lidnan professionaližen opendusen aluzkundaks.

Edeline lidnan pämez' om Aleksandr Žukov (reduku 2016 — sügüz'ku 2020).

Galerei

• 
  Ezmäižed pertid (istorine fotokuva)
• 
  Benzintäutandstancii (2014)
• 
  Sovetskii-lendimportan sauvused vl 2012

Irdkosketused

• Sovetskii-lidnan administracijan oficialine sait (sovinet.ru). (ven.)