Megion

Megion (ven. i tot.: Мегион, ukr.: Мегіон) om Venäman lidn da lidnümbrik Hantin da Mansin avtonomižen ümbrikon päivnouzmas. Om ümbärtud Nižnevartovskan rajonan territorijal, Nižnevartovskan lodehline ezilidn.

Megion
Мегион

Lidnanznam	Flag
Valdkund	Venäma
Eläjiden lugu (2017)	48,283 ristitud
Pind	50,51 km²
Pämez'	Oleg Deineka (reduku 2015—)
Telefonkod	+7−34 643-xx-xxx
Avtokod	86, 186
Aigvö	UTC+5 (MSK+2)

Istorii

Eländpunkt mainitase ezmäižen kerdan Sibirin Aleksandr Dunin-Gorkavič-tedoidajan kirjutusiš vl 1910 kuti hantilaižiden Majon-žilo «venui ümbärdajan kontinentad hijaman sus». Vl 1912 mainitase Venäman imperijan oficialižiš andmusiš kuti Magajon (ven.: Магайон). Vspäi 1959 tedoitihe i vl 1961 avaitihe kivivoid läz Megionad (zavottihe kävutada nügüdläižen nimitusen), se oli Samotloran löudmižsijan ezmäine fontan. Vn 1964 semendkul kätihe Megionad radnikžiloks. Vn 1980 23. päiväl heinkud se sai lidnan statusad ümbrikon alištusenke.

Megion šingotase kivivoin tedištelendan da samižen kompanijoil, kivivoinveimiden sauvondan, holitusen da kohendusen edheotandoil, mugažo konditerine fabrik i meblin tehmižen ceh oma olmas, raudbetonan tegim radab.

Geografijan andmused

Lidn sijadase sokahas tahondas, Ob'-jogen da sen Meg-hijaman oiktal randal (ven.: Мега), 40 m keskmäižel korktusel valdmeren pindan päl. Segoitadud taigamec ümbärdab lidnad. Matkad Hanti-Mansiiskhasai om 382 km päivlaskmha orhal vai 479 km avtotedme. Lähembaižed lidnad oma Nižnevartovsk (lähembaine rahvahidenkeskeine lendimport) 20 km suvipäivnouzmha orhal vai 25 km «Surgut — Nižnevartovsk»-avtotedme, i Langepas 55 km lodeheze orhal vai 65 km avtotedme.

Lidnanvuitte Korged-žilo (ven.: Высокий, 6 968 rist. vl 2017) mülüb lidnümbrikho Megionan ližaks. Megion-raudtestancii om saudud siš «Surgut — Nižnevartovsk»-raudtel, 10 km lodeheze Megion-lidnaspäi. Raudte mäneb ühtes kilometras lidnan pohjoižröunan taga. Lidnümbrikon pind — 50,51 km².

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 49 449 ristitud (kaikiš suremb), lidnümbrikon — 56 382 ristitud. Kaikiš suremb lidnan ristitišt om 48..49 tuhad eläjid vspäi 2007. Vl 2017 kaik 55 251 ristitud elihe lidnümbrikos.

Rahvahad (enamba 0,8% vl 2010): venälaižed — 62,4%, ukrainalaižed — 7,4%, totarlaižed — 7,1%, baškiralaižed — 3,5%, azerbaidžanlaižed — 1,7%, lezgilaižed — 1,2%, kumikad — 1,0%, čečenalaižed — 0,9%, moldovalaižed — 0,8%, vaugedvenälaižed — 0,8%, čuvašalaižed — 0,8%, toižed rahvahad — 4,6%, rahvahuden ozutandata — 7,8%.

Megionan politehnine kolledž om professionaližen opendusen aluzkundaks.

Galerei

• 
  Monument edelmatkajile vl 2019
• 
  Pühän Jumalanmaman Katken jumalanpert', muštnik sadud kivivoin 500-millionižele tonnale i skver senno, vn 2020 nägu
• 
  Muštnik männuziden sodoiden vägimehile vl 2020
• 
  Megionan nägu vl 2008
• 
  Znam avtoterenghas lidnan röunal (om pandud vl 2019)

Irdkosketused

• Lidnan Duman oficialine sait (dumamegion.ru). (ven.)
• Lidnan Administracijan oficialine sait (admmegion.ru). (ven.) (angl.) (+ äikel'ne känduz)