Streževoi

Streževoi (ven.: Стрежево́й) om Venäman lidn da lidnümbrik (vspäi 2004) Tomskan agjan lodehes. Se om agjan koumanz' eländpunkt eläjiden lugun mödhe, om ümbärtud Aleksandrovskojen rajonal.

Streževoi
Стрежевой

Lidnanznam
Valdkund	Venäma
Eläjiden lugu (2021)	39,169 ristitud
Pind	31,48 km²
Pämez'	Valerii Deničenko (reduku 2021—)
Telefonkod	+7−38 259-xx-xxx
Avtokod	70
Aigvö	UTC+7 (MSK+4)

Istorii

Ende hantin küläd i kalanpüdajiden Streževoje-külä (vspäi 1932) oliba olmas necil sijal. Nügüdläižen eländpunktan aluz om pandud vl 1966 kuti kivivoin sadajiden žilo, nimitihe külän mödhe. 1960-nziden voziden lopus tedotihe žilod kaiken NSTÜ:n Komsomolan udarnikoiden sauvondaks. Radnikžilo sai lidnan statusad agjan alištusenke vn 1978 5. päiväl sulakud.

Streževoi šingotase kivivoin tedištelendal da samižel sen ümbrištos, kivivoinümbriradajal tegimel, kivivoin samižmašiništon tegimel, gazanveimiden i kivivoiveimiden sauvondan da holitusen (lendimport) edheotandoil.

Geografijan andmused

Lidnümbrikon sijaduz agjan kartal (2018)

Lidn sijadase Obinjogen oiktan Pasol-hijaman oiktal randal, 41 m ü.m.t. keskmäižel korktusel.

Matkad Hantin da Mansin avtonomižen ümbrikon röunhasai om kümne kilometrad pohjoižhe orhal, Tomskhasai om 635 km suvipäivnouzmha orhal, 2 416 km avtotedme (tal'vte om olmas) vai Obin ülezjogen. Lähembaine lidn da raudtestancii om Nižnevartovsk (Hantin da Mansin avtonomine ümbrik) 63 km lodeheze avtotedme. Jogiport sijadase kudes kilometras lidnaspäi, lendimport eläb bankrotnendan proceduras läbi vspäi 2016.

Klimat om terav kontinentaline, tal'v om hätkeline da vilu. Voden keskmäine lämuz om −2,5 C°, kezakun-elokun +14,0..+17,9 C°, tal'vkun-uhokun −20,8..−22,7 C°. Ekstremumad oma −62 C° i +40 C°. Paneb sadegid 510 mm vodes, enamba kezakus-elokus (71..77 mm kus), vähemba vilukus-keväz'kus (16..22 mm kus). Lumikatken keskmäine korktuz sase 60..80 santimetrhasai. Halatoi pord om 83..89 päiväd vodes.

Tobmuz

Streževoi om lidnümbrikon üks'jäižeks eländpunktaks. Lidnümbrikon pind — 212,97 km².

Lidnümbrikon tobmuden pämez' om sen mer (Administracijan pämez'). Edeline lidnümbrikon pämez' om Valerii Harahorin (keväz'ku 2009 — sügüz'ku 2021). Lidnan Duman ezimez' om Nina Griško vn 2020 redukuspäi. Edeline Duman ezimez' om Margarita Ševeleva, radoi vn 2020 redukuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 42 219 ristitud. Kaik 41 733 eläjad oli lidnas vl 2017. Kaikiš suremb lidnan ristitišt oli enamba 40 tuhad eläjid vll 1989−2020 (44 600 rist. vl 1998 i 44 693 rist. vl 2009).

Ortodoksižen hristanuskondan kaks' jumalanpertid oma saudud: ph. Mikulai-čudonsädajan (2006) i Sibirin Kaikiden Pühämehiden (letihe vll 1992−1993). Protestantizman «Elon vajeh»-keskuz i islaman «Al'-Hajat»-pühäpert' oma avaitud lidnas mugažo.

Lapsiden opendusen aluzkundad oma 11 päivkodid, seičeme keskškolad, ližaopendusen keskuz, ekologižen kazvatusen keskuz, čomamahtoiden škol, personaližen šingotesen privatine škol, sportškol, noriden turistoiden stancii. Professionaližen opendusen aluzkundad: «Tomskneft'»-kompanijan openduzkombinat, Žirnovskan kivivointehnikuman filial, Tomskan tegimištoliž-gumanitarižen kolledžan filial, üläopendusen aluzkundoiden koume filialad (Piter, Tümen').

Galerei

• 
  Lidnan administracijan sauvuz (2011)
• 
  Streževoin kivivoiümbriradai tegim («Tomskneft'») vl 2011
• 
  Čomamahtoiden «Sovremennik»-pert'kulu (2011, Aigalaine)
• 
  Sportivine «Neftänik»-tervehtamižkompleks (2011, Kivivoinik)
• 
  Streževoi-lendimportan sauvuz vl 2013

Irdkosketused

• Lidnan tobmuden aluzkundoiden oficialine sait (admstrj.ru). (ven.)
• Lidnan kul'turkompleksan sait (strezh-msk.ru). (ven.)