Belousovo (lidn)

Belousovo (ven.: Белоу́сово) om Venäman lidn da lidnankund Kalugan agjan pohjoižpäivnouzmas, Obninskan päivnouzmaine ezilidn. Mülüb Žukovan rajonha, sen kaikiš penemb lidn koumen kesken.

Belousovo
Белоусово

Lidnanznam	Flag
Valdkund	Venäma
Eläjiden lugu (2018)	9,585 ristitud
Pind	2,27 km²
Pämez'	Tat'jana Grigorjeva (reduku 2013—)
Telefonkod	+7−48 432-xx-xxx
Avtokod	40
Aigvö	UTC+3 (MSK+0)

Istorii

Belousovon kangazfabrik

Eländpunkt mainitase ezmäižen kerdan vl 1782 kuti Belousovo-külä. Nimitihe hibusheinän venäkel'žen nimen mödhe (белоус), se hein kazvoi äjüdes küläs ümbri. Saudud 19. voz'sadal kangazfabrik (vate, šuuk) andoi radod külän da ümbrišton eläjile. Toižen mail'man sodan aigan okkupacii oli heittud vn 1942 vilukus. Kätihe žilod lidnanvuiččeks vl 1962. Vs 2004 tal'vkun 28. päiväspäi om lidnan statusanke.

Belousovo šingotase kangazfabrikal, sömtegimištol (maidtegim, lindfabrik), tegesiden räzinaspäi i plastikaspäi pästandal, mecanümbriradmižen edheotandal. Magistraližiden gazanveimiden sol'm, kompressorstancii läz lidnad.

Geografijan andmused

Lidn sijadase rajonan lodehes, Diročnai-jogen randoil (ven.: Дырочная 15 km pitte, ende Derešn', ven. Дерешня, Okan hurapol'ne bassein), 170 m ü.m.t. keskmäižel korktusel. Jogi läbitab lidnan keskuzpalad, uit om saudud sil. Matkad Kalughasai om 69 km suvipäivlaskmha-suvhe orhal vai 78 km avtotel. Lähembaižed lidnad oma Žukov-rajonkeskuz 8 km suvipäivnouzmha orhal vai avtotedme, Obninsk 1 km päivlaskmha i lodeheze orhal vai avtotedme, i Balabanovo 10 km pohjoižhe vai 13 km avtotedme. «Moskv — Roslavl'»-avtote läbitab lidnad, «Moskv — Bränsk»-avtote (M3-trass) mäneb 1 km päivlaskmha lidnaspäi.

Belousovo om lidnankundan üks'jäine eländpunkt. Lidnankundan pind — 2,27 km².

Eläjad

Vl 1970 žilon ristitišt oli 5 990 eläjad. Vn 2010 Venäman rahvahanlugemižen mödhe lidnan eläjiden lugu oli 8 412 ristitud, rajonan videndez. Kaikiš suremb ristitišt oli 12 600 eläjid vl 2001. Ortodoksižen hristanuskondan ph. Jelisaveta-kunigaznaižen-moknikan pühäpert' om saudud lidnas vodele 2004.

Rahvahad (2010): venälaižed — 90,3%, armenijalaižed — 2,9%, ukrainalaižed — 1,9%, totarlaižed — 1,3%, toižed rahvahad — 3,6%.

Lähembaižed professionaližen opendusen aluzkundad sijadasoiš Obninskas.

Irdkosketused

• Lidnankundan tobmuden aluzkundoiden sait (adm-belousovo.ru). (ven.)