Borovsk

Borovsk (ven.: Бо́ровск) om Venäman lidn da lidnankund Kalugan agjan pohjoižpäivnouzmas. Se om Borovskan rajonan administrativine keskuz i kahtenz' surtte lidn koumespäi, Obninskan lodehline ezilidn.

Borovsk
Боровск

Lidnanznam	Flag
Valdkund	Venäma
Eläjiden lugu (2023)	12,686 ristitud
Pind	24,3 km²
Pämez'	Svetlana Galenkova (semendku 2018—)
Telefonkod	+7−48 438-xx-xxx
Avtokod	40
Aigvö	UTC+3 (MSK+0)

Istorii

Eländpunkt mainitase ezmäižen kerdan vn 1358 suren Ivan Krasnii-ruhtinasen kirjeižes lidnan statusanke, i sen löutud keramik datiruiše 11.-13. voz'sadoil. Vll 1378−1473 mülüi Serpuhovan-Borovskan ruhtinazkundha, sid' kändihe Venäman palaks. Vspäi 1444 Pafnutii Borovskijan mez'jumalankodi om olmas tähäsai. Borovsk sai makundan lidnan oficiališt statusad vl 1776. Edel Oktäbrin revolücijad šingotihe vanhuskolaižiden keskuseks. Toižen mail'man sodan aigan lidn oli okkupiruidud nacistoil voziden 1941−1942 tal'vel.

Borovsk šingotase Blu-ray-diskoiden («Sony»), avtoližavedamiden, laivankohendusen i metalližkonstrukcijoiden tegimil, plastiktegesiden kompanijal sauvondan täht, tekstiližil edheotandoil, sömtegimištol, söteližadusiden edheotandal, zell'abutusiden kompanijal. Venäman živatoiden filiologijan, biohimijan da sötmižen tedoinstitut radab lidnas.

Geografijan andmused

Lidn sijadase rajonan keskuzpalan päivnouzmas, Protv-jogen randoil (ven.: Протва́ 282 km pitte, Okan hura ližajogi), 160 m ü.m.t. keskmäižel korktusel.

Matkad Kalughasai om 79 km suvhe orhal vai 90 km avtotel. Lähembaižed lidnad oma Balabanovo ühesas kilometras päivnouzmha orhal vai 12 km avtotedme, Jermolino seičemes kilometras päivnouzmha orhal vai 11 km avtotedme, i Obninsk 15 km suvipäivnouzmha orhal vai 23 km avtotedme.

Tobmuz

Borovsk om lidnankundan üks'jäižeks eländpunktaks. Lidnankundan pind — 24,30 km², lidnan pertišton — 10,44 km².

Lidnankundan tobmuden pämez' om sen Duman ezimez'. Edeline Duman ezimez' om Nikolai Kuznecov, radoi vn 2018 semendkuhusai. Lidnankundan Administracijan pämez' om Anželika Bodrova vn 2019 kezakuspäi. Edeline Administracijan pämez' om Mihail Klimov (kül'mku 2015 — kezaku 2019).

Eläjad

Vl 1939 lidnan ristitišt oli 10 255 eläjad. Vn 2010 Venäman rahvahanlugemižen mödhe lidnan eläjiden lugu oli 12 283 ristitud, rajonan kudendez, vn 2021 — 12 598 ristitud. Kaik 10 966 eläjad oli lidnas vl 2017. Kaikiš suremb lidnan ristitišt oli 14 600 eläjad vll 1992−1996.

Rahvahad (2010): venälaižed — 90,0 %, uzbekad — 2,2 %, tadžikalaižed — 2,0 %, ukrainalaižed — 1,4 %, armenijalaižed — 1,2 %, toižed rahvahad — 3,2 %.

Ortodoksižen hristanuskondan mez'jumalankodi i kaks' pühäpertid oma kaičenus i saudud lidnas, mugažo vanhuskolaižiden Jumalanmaman Katken päjumalanpert'.

Lapsiden opendusen aluzkundad oma viž päivkodid, koume keskškolad (nomer 1, 2 i noosferine), čomamahtoiden škol, sportškol, sädamižšingotesen keskuz. Professionaližen opendusen aluzkundad ratas lähembaižiš lidnoiš.

Galerei

• 
  Pafnutii Borovskijan mez'jumalankodi, vn 2012 nägu
• 
  Enzne 19. voz'sadal Jožikovoiden fabrik vl 2011
• 
  Ciolkovskijan muzei (2011)
• 
  Jaugnikoiden sild lidnan keskuses vl 2011

Irdkosketused

• Lidnan tobmuden aluzkundoiden sait (borovsk-borovskij-r40.gosweb.gosuslugi.ru). (ven.)