Kremönki

Kremönki (ven.: Кремёнки) om Venäman lidn da lidnankund Kalugan agjan pohjoižpäivnouzmas. Mülüb Žukovan rajonha, sen kahtenz' lidn eläjiden lugun mödhe koumen kesken.

Kremönki
Кремёнки

Lidnanznam	Flag
Valdkund	Venäma
Eläjiden lugu (2023)	11,637 ristitud
Pind	1,48 km²
Pämez'	Dmitrii Plehanov (tal'vku 2020—)
Telefonkod	+7−48 432-xx-xxx
Avtokod	40
Aigvö	UTC+3 (MSK+0)

Istorii

Eländpunkt mainitase ezmäižen kerdan voziden 1721−1722 revizijas kuti Kremönki-külä. Kätihe žilod lidnanvuiččeks vl 1989. Vn 2004 tal'vkun 28. päiväspäi om lidnan statusanke.

Kremönki šingotase lämuzizoläcijan krepindoiden tegimel, kalan da meren produktoiden ümbriradmižen fabrikal, lebuturizmal, mugažo Serpuhovan i Protvinon «lidnaks-magaduzsijaks».

Geografijan andmused

Lidn sijadase rajonan suvipäivnouzmaižes čogas, Protv-jogen hural randal (ven.: Протва́ 282 km pitte, Okan hurapol'ne bassein), 130 m ü.m.t. keskmäižel korktusel. Borovn-jogi (ven.: Боровна 15 km pitte) lankteb Protvha lidnan päivnouzmaižen röunan taga.

Matkad Moskvan agjhasai om koume kilometrad päivnouzmha, Žukov-rajonkeskushesai om 29 km lodeheze orhal vai 34 km avtotedme. Matkad Kalughasai om 65 km suvipäivlaskmha orhal vai 105 km avtotel. Lähembaižed lidnad oma Protvino (Moskvan agj) kudes kilometras päivnouzmha orhal vai avtotedme, Serpuhov (raudtestancii, Moskvan agj) kaks'kümnes kilometras päivnouzmha orhal vai 22 km avtotedme, i Tarus 18 km suvhe orhal vai 26 km avtotedme.

Tobmuz

Kremönki om lidnankundan üks'jäižeks eländpunktaks. Lidnankundan pind — 1,48 nellikkilometrad.

Lidnankundan tobmuden pämez' om sen Duman ezimez'. Edeližed Duman ezimehed oma Kristina Karpenko (reduku 2015 — reduku 2020), Oksana Prokazova (radoi edel vn 2015 redukud). Lev Ščukin tegeb lidnan Administracijan pämehen velgusidme vn 2023 semendkuspäi. Edeližed lidnan Administracijan pämehed oma Sergei Gusev (kül'mku 2020 — semendku 2023), Tat'jana Kalinkina (kül'mku 2015 — reduku 2020).

Eläjad

Vl 1993 lidnanvuiččen žilon ristitišt oli 11 400 eläjad. Vn 2010 Venäman rahvahanlugemižen mödhe lidnan eläjiden lugu oli 11 582 ristitud, rajonan videndez, vn 2021 — 11 745 ristitud. Kaikiš suremb eländpunktan ristitišt oli 12..12,2 tuhad eläjid vll 2000−2008.

Rahvahad (2010): venälaižed — 90,2 %, ukrainalaižed — 3,3 %, totarlaižed — 1,7 %, mordvinalaižed — 1,0 %, toižed rahvahad — 3,8 %.

Ortodoksižen hristanuskondan üks'jäine pühäpert' om saudud i avaitud lidnas, se om kivine Carin rodun moknikoiden jumalanpert' kellčuhundusenke, letihe vll 2013−2017.

Lapsiden opendusen aluzkundad oma kaks' nimitadud päivkodid (Teremok «pert'kuluine» i Rodničok «ojaine»), kaks' keskškolad (E.R. Daškovan i I.G. Zaharkin-jenaralan nimed, ende nomer 1 i nomer 2), privatine Vätiči-škol, čomamahtoiden škol. Lähembaižed professionaližen opendusen aluzkundad sijadasoiš lähižiš lidnoiš.

Galerei

• 
  Sodaistorine Kremönki-muzei (2019)
• 
  Daškovan muštpacaz (2015)
• 
  Tulend avtotel Vätiči-sanatorijale vl 2021
• 
  Torg torguindkeskusenno vl 2021

Irdkosketused

• Lidnankundan tobmuden aluzkundoiden sait (mo-kremenki.ru). (ven.)