Malojaroslavec

Malojaroslavec (ven.: Малояросла́вец) om Venäman lidn, lidnankund da avtotesol'm Kalugan agjan pohjoižpäivnouzmas, Obninskan suvipäivlaskmaine ezilidn. Se om agjan videnz' lidn eläjiden lugun mödhe, Malojaroslavecan rajonan administrativine keskuz. Om «sodahoštusen lidn»-arvnimenke vspäi 2012.

Malojaroslavec
Малоярославец

Lidnanznam	Flag
Valdkund	Venäma
Eläjiden lugu (2023)	41,511 ristitud
Pind	18,08 km²
Pämez'	Irina Olefirenko (reduku 2020—)
Telefonkod	+7−48 431-xx-xxx
Avtokod	40
Aigvö	UTC+3 (MSK+0)

Istorii

Eländpunktan aluz om pandud kuti puine lidnuz Vladimir Serpuhovalaine (Rohked)-ruhtinasel 14. voz'sadan lopus, nimiti Jaroslavl:ikš ičeze nelländen Jaroslav-poigan oiktastuseks. Lidnuz mainitase ezmäižen kerdan vl 1402 kuti Jaroslavec Borovskii vai muite Jaroslavec (ven.: Ярославец), se om lidnan alusenpanendan oficialine voz'. Udesnimitihe nügüdläižikš ühtnendan jäl'ghe vl 1485 Moskvan ruhtinazkundanke erištamha Jaroslavlišpäi. Malojaroslavec sai makundan lidnan statusad vl 1776. Vn 1812 Tatanmaižen sodan aigan tora tegihe lidnanno, anastihe sidä severt-se kerdad i muretihe täuzin. Toižen mail'man sodan aigan lidn oli okkupiruidud nacistoil (18. reduku 1941 — 2. viluku 1942).

Malojaroslavec šingotase sauvondmaterialiden pästandal (mecanpilind, metalližiden profilän i konstrukcijoiden viž tegint), keitimpolen meblin fabrikal, leibänkombinatal.

Geografijan andmused

Lidn sijadase rajonan pohjoižpäivnouzmas, Luž-jogen alajoksmusen oiktal randal (ven.: Лужа 159 km pitte, Okan hurapol'ne bassein), 190 m ü.m.t. keskmäižel korktusel. Lužan pened Legoik-ližajogi (ven. Легойка) i Kariž-ližajogi (ven. Карижа) sebaitas lidnad.

Matkad Kalughasai om 56 km suvhe orhal, 63 km avtotel vai raudtel. Lähembaine lidn om Obninsk koumetoštkümnes kilometras pohjoižpäivnouzmha orhal vai 18 km teidme. Malojaroslavec-raudtestancii radab lidnan päivnouzmas «Moskv — Bränsk»-keskustal vspäi 1999. «Moskv — Bränsk»-avtotekeskust (M3 «Ukrain») mäneb koumes kilometras suvipäivnouzmha lidnaspäi. «Moskv — Roslavl'»-avtote läbitab lidnan pohjošt mugažo.

Tobmuz

Malojaroslavec om lidnankundan üks'jäižeks eländpunktaks. Lidnankundan pind — 18,08 km².

Lidnankundan tobmuden pämez' om sen Duman ezimez'. Edeline Duman ezimez' om Ol'ga Žukova (reduku 2015 — reduku 2020). Lidnan Administracijan pämez' om Mihail Krilov (Михаил Крылов) vn 2020 redukuspäi. Edeližed Administracijan pämehed oma Ruslan Sajidov (sügüz'ku 2017 — reduku 2020), Grigorii Harlampov (kül'mku 2015 — eloku 2017).

Eläjad

Vl 1939 lidnan ristitišt oli 11 729 eläjad. Vn 2010 Venäman rahvahanlugemižen mödhe lidnan eläjiden lugu oli 30 392 ristitud, rajonan viž ühesandest, vn 2021 — 41 836 ristitud. Kaikiš suremb lidnan ristitišt oli vl 2021 i om nügüd', oli 30..31 tuhad eläjid vll 2000−2011 (31 606 rist. vl 2002).

Ortodoksižen hristanuskondan koumetoštkümne pühäpertid oma kaičenus i saudud lidnas: ph. Mikulain Černoostrovkii-naižjumalankodi (vspäi 1610, ph. Mikulai-čudonsädajan päjumalanpert', kaks' jumalanpertid i kaks' časounäd), sen ližaks Jumalanmaman Kazanin jumalaižen päjumalanpert' (letihe vll 1700−1730, kellčuhunduz 1855), Pühän Jumalanmaman Emäganpäivän päjumalanpert' (saudihe vll 1903−1912), nell' jumalanpertid i kaks' časounäd. Niiden ližaks ph. Feodir Stratilatan puine jumalanpert' kaumžomal ei ole kaičenus (oli vspäi 1771, paloi lophu 1920- i 1930-nziden voziden röunal).

Lapsiden opendusen aluzkundad oma severz'-se päivkodid, keskškolad, Malojaroslavecan gimnazii, ortodoksižen hristanuskondan gimnazii, rajonan openduzkeskuz, čomamahtoiden škol, lapsiden da norišton sportškol. Privatižen Moskvan finansiž-juridižen akademijan i sen universitetan Kalugan filial i opendusen sferan ližaprofopendusen keskuz oma lidnan professionaližen opendusen aluzkundoikš.

Galerei

• 
  Lidnankundan administracijan pert' (2019)
• 
  Jumalanmaman Kazanin jumalaižen päjumalanpert', vn 2014 nägu
• 
  Raudtedepo vl 2008
• 
  Maklino-mikrorajon (2001)
• 
  Malojaroslavec-päraudtestancijan sauvuz vl 2008

Irdkosketused

• Malojaroslavecan tobmuden sait (maloyaroslavets-r40.gosuslugi.ru) (ven.) i sen Administracijan enzne sait (admmaloyaroslavec.ru, om täuttud edel vn 2023 elokud). (ven.) (+ äikel'ne känduz)