Zarinsk

Zarinsk (ven.: Зари́нск) om Venäman lidn da lidnümbrik Altajan randan pohjoižpäivnouzmas. Se om Zarinskan rajonan administrativižeks keskuseks mugažo, ei mülü sihe.

Zarinsk
Заринск

Lidnanznam
Valdkund	Venäma
Eläjiden lugu (2021)	41,272 ristitud
Pind	79,16 km²
Pämez'	Viktor Azgaldän (tal'vku 2019—)
Telefonkod	+7−38 595-xx-xxx
Avtokod	22
Aigvö	UTC+7 (MSK+4)

Istorii

Eländpunktan aluz om pandud vl 1979 lidnan statusanke kahtes eländpunktaspäi: stancijan Zarinskii-žilo (sen aluz oli pandud vl 1953) i Sorokino-žilo-rajonkeskuz (ven.: село Сорокино, oli tetab vspäi 1748).

Zarinsk šingotase järedal koksanhimižel tegimel (3,5 tuhazesai radnikoid), pumaterialiden pästandal (faneran kombinat, terraslaudan i pilindmaterialiden kompanijad), sömtegimištol (lihategim, leibän i maidon edheotand), nahkoiden ümbriradmižen tegimel, vagonoiden kezroiden paroiden kohenduzedheotandal.

Geografijan andmused

Lidn sijadase Čumiš-jogen (Obin oiged ližajogi) molembil randoil, 180 m ü.m.t. keskmäižel korktusel.

Matkad Barnaulhasai om sada kilometrad suvipäivlaskmha raudtedme vai avtotedme. Zarinskai-raudtestancii (ven.: Заринская) om Barnaul — Novokuzneck raudtel. Lähembaine lidn om Salair (Kemerovon agj) 82 km pohjoižpäivnouzmha orhal vai 150 km avtotedme.

Tobmuz

Zarinsk om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeline lidnan Administracijan pämez' om Ivan Teröškin (kül'mku 2017 — heinku 2019). Kaik rahvaz valičeb lidnan Deputatoiden suiman 25 ühtnijad nelläks vodeks, sen ezimez' om Tat'jana Caberäbaja vn 2020 heinkuspäi. Edeline Deputatoiden suiman ezimez' om Aleksandr Lagovskii (reduku 2017 — semendku 2020).

Eläjad

Vn 2002 Venäman rahvahanlugemižen mödhe lidnan eläjiden lugu oli 50 368 ristitud, vn 2010 — 48 461 ristitud, vn 2021 — 41 272 ristitud. Kaik 46 830 eläjad oli lidnas vl 2017. Kaikiš suremb lidnan ristitišt oli 52 300 eläjad vl 1996.

Rahvahad (enamba 0,4 % vl 2002): venälaižed — 93,0 %, saksalaižed — 2,4 %, ukrainalaižed — 1,5 %, totarlaižed — 0,5 %, mordvinalaižed — 0,5 %, vaugedvenälaižed — 0,4 %, toižed rahvahad i rahvahuden ozutandata — 1,7 %.

Ortodoksižen hristanuskondan koume jumalanpertid oma saudud lidnas vspäi 1991.

Lapsiden opendusen aluzkundad oma ühesa nimitadud da nomeruidud päivkodid (nomer 1..3, 5, 7, 10..12, 14), viž keskškolad (nomer 1..4, 15), Brigantina-licei, Zarinskan korrekcine škol-internat, lapsiden sädamižen keskuz, muzikškol nomer 2, Sport-sportškol. Zarinskan politehnine tehnikum om lidnan professionaližen opendusen aluzkundaks.

Galerei

• 
  Torguindkeskuz lidnan keskuzpalas vl 2010
• 
  Sündun Voznesenjan jumalanpert', vn 2010 nägu (saudihe vll 1991−2005)
• 
  «Altai-Koks» vl 2020, nägu 88. km-raudteplatformaspäi lidnas
• 
  «Metallurg»-kul'turkeskuz (2010)
• 
  Znam lidnan röunal (2018)

Irdkosketused

• Lidnan tobmuden aluzkundoiden oficialine sait (zarinsk.gosuslugi.ru). (ven.)