Jarovoje

Jarovoje (ven.: Ярово́е, ukr.: Ярове́) om Venäman lidn da lidnümbrik Altajan randan lodehes.

Jarovoje
Яровое

Lidnanznam	Flag
Valdkund	Venäma
Eläjiden lugu (2021)	16,424 ristitud
Pind	44,38 km²
Pämez'	Vladislav Šilov (semendku 2022—)
Telefonkod	+7−38 568-xx-xxx
Avtokod	22
Aigvö	UTC+7 (MSK+4)

Istorii

Vl 1942 sauvoškanzihe Slavgorodan himišt tegint. Eländpunktan aluz om pandud vl 1943 žilho evakuiruidud bromtegimenno Krimaspäi. Vl 1944 pästtihe töhö tegint, saudihe sidä da žilod täuzin vhesai 1980. Vn 1993 30. päiväl keväz'kud joudutihe žilod Slavgorod-lidnan alištusespäi i anttihe Jarovojele lidnan statusad.

Himine tegim eli bankrotnendan proceduras läbi vl 2011, se pästab levitadud himižid substancijoid, kodihimijan tavaroid, sauvondmujuid. Jarovoje šingotase mugažo kurortaks järven randal.

Geografijan andmused

Lidn sijadase Kulundan stepin zonas, solakahan Sur' Jarovoje-järven (ven.: Большое Яровое, 53..70 km²) pohjoižel randal, 95 m ü.m.t. keskmäižel korktusel.

Matkad Kazahstanan (Pavlodaran agj) röunhasai om 20 km päivlaskmha, Barnaulhasai — 460 km päivnouzmha avtotedme. Lähembaine lidn da raudtestancii om Slavgorod kümnes kilometras pohjoižpäivnouzmha avtotedme.

Tobmuz

Jarovoje om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez', edel vn 2017 kül'mkud Deputatoiden suiman ezimez' oli lidnan pämehen. Edeline lidnan Administracijan pämez' om Vitalii Samobočii (sulaku 2016 — viluku 2022). Deputatoiden suiman ezimez' om Galina Vasil'jeva vn 2015 elokuspäi.

Eläjad

Vn 2002 Venäman rahvahanlugemižen mödhe lidnan kaikenaigaižiden eläjiden lugu oli 21 363 ristitud, vn 2010 — 18 604 ristitud, vn 2021 — 16 424 ristitud. Kaik 18 159 eläjad oli lidnas vl 2017. Kaikiš suremb lidnan ristitišt oli 23 200 eläjad vl 1996. Kezaližen lebusezonan aigan lidnan ristitišt ližadab 80..100 tuhad ristituid.

Rahvahad (enamba 0,4 % vl 2002): venälaižed — 82,6 %, ukrainalaižed — 9,3 %, saksalaižed — 5,2 %, totarlaižed — 0,4 %, toižed rahvahad i rahvahuden ozutandata — 2,5 %.

Ortodoksižen hristanuskondan kaks' pühäpertid oma saudud lidnas: phh. Borisan da Gleban jumalanpert' (om letud vll 1997−1998) i ph. Ksenija Piteriläižen da Jumalanmaman Katken naižjumalankodi ühtennimiženke jumalanpertinke (saudihe vl 1992 vai sen aigemba).

Lapsiden opendusen aluzkundad oma severz'-se päivkodid, koume keskškolad (nomer 12, 14, 19), čomamahtoiden škol, tedoližtehnižen sädamižen keskuz, motokrossan i kartingan sekcijad senno, lapsiden da norišton sportškol. Jarovojen politehnine tehnikum om lidnan professionaližen opendusen aluzkundaks.

Galerei

• 
  Jarovoje-lidnan istorijan muzei (2015)
• 
  Kalaidajiden rahvahiden «Altajan jurtad»-muzei-lauk, vn 2015 nägu
• 
  «Altaihimprom»-tegim i lidnan kül'bendrand Jarovoje-järven randal vl 2008
• 
  «Jarovoje-järv»-reduläžundkodi (2015)
• 
  Lidnan kul'turkeskuz (2015)

Irdkosketused

• Lidnan tobmuden sait (yarovoe.gosuslugi.ru) i sen versii edel vn 2023 kül'mkud (yarovoe22.ru). (ven.)