Rubcovsk

Rubcovsk (ven.: Рубцо́вск) om Venäman lidn da lidnümbrik Sibirin suves, Altajan randan suvipäivlaskmas. Se om Rubcovskan rajonan administrativine keskuz mugažo (ei ole rajonan palaks).

Rubcovsk
Рубцовск

Lidnanznam	Flag
Valdkund	Venäma
Eläjiden lugu (2021)	139,565 ristitud
Pind	84 km²
Pämez'	Dmitrii Fel'dman (uhoku 2017—)
Telefonkod	+7−38 557-xx-xxx
Avtokod	22
Aigvö	UTC+7 (MSK+4)

Lidn ümbrištonke, vn 2018 kart

Istorii

Eländpunktan aluz om pandud vl 1886 kuti Rubcovo-žilo Mihail Rubcov-saldatal erindas, nimitihe alusenpanijan kanzannimen mödhe. Oficialižešti alusenpanend oli vl 1892, konz tobmuz andoi laskendad otta mad kävutamižhe. Žilo sai lidnan statusad vl 1927 nügüdläiženke nimenke.

Rubcovskan ižandusen päsarak om mašinoidensauvomine: likkuimed maižandusen täht manümbriradajanke mašiništonke, palad vagonoiden täht, mašiništ vilugoičemha maidod.

Geografijan andmused

Lidn sijadase Alei-jogen (Obin ližajogi) hural randal. Matkad Barnaulhasai om 290 km pohjoižpäivnouzmha. Lähembaižed järedad lidnad seištas Kazahstanas: Ust'-Kamenogorsk 200 km suvipäivnouzmha orhal i Semei 140 km suvipäivlaskmha orhal.

Klimat om ven kontinentaline kuivahk. Voden keskmäine lämuz om +3,2 C°, kezakun-elokun +18,5..+20,7 C°, tal'vkun-uhokun −12,3..−15,3 C°. Paneb sadegid 326 mm vodes, enamba heinkus (56 mm), vähemba vilukus-keväz'kus (14 mm kus).

Rubcovsk om lidnümbrikon üks'jäižeks eländpunktaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 147 002 ristitud. Kaikiš suremb lidnan ristitišt oli 170..173 tuhad eläjid vozil 1989−1996.

Rahvahad (enamba 0,4 % vl 2010): venälaižed — 95,8 %, saksalaižed — 1,1 %, ukrainalaižed — 0,8 %, toižed rahvahad — 2,3 %.

Professionaližen opendusen aluzkundad oma Rubcovskan agrariž-tegimištoline tehnikum, pedagogine, medicinine i muzikaline kolledžad, Rubcovskan industrialine institut i Rubcovskan institut — Altajan universitetoiden filialad (Barnaul).

Transport

Avtobusad, trolleibusad, maršruttaksid da taksid oma kundaližeks transportaks lidnas. Ühtennimine Rubcovsk-raudtestancii radab vspäi 1915, sijadase «Barnaul — Semei»-keskustal.

Galerei

• 
  Lidnan Ezitajiden nevondkundan i Administracijan sauvuz (2011)
• 
  Sodamemorial päraudtestancijanno (2011)
• 
  Ph. Mikoiarhangelan jumalanpert', vn 2013 nägu (om pühästadud eziauguižešti vl 1906)
• 
  Tegimištoline zon vl 2009
• 
  «Sberbank:an» sauvuz lidnas vl 2011
• 
  «Marija-Ra»-kompanijan torguindkeskuz vl 2011
• 
  Rubcovskan dramteatr (2020)
• 
  Ujundbassein (2011)
• 
  Raudtedepo vl 2011
• 
  Rubcovsk-päraudtestancijan sauvuz vl 2012

Irdkosketused

• Lidnan Ezitajiden nevondkundan oficialine sait (gorsovet.rubtsovsk.ru). (ven.)
• Lidnan administracijan oficialine sait (rubtsovsk.org). (ven.)