Vsevoložskan rajon

Vsevoložskan rajon (ven.: Всеволожский район) om municipaline ühtnik Leningradan agjan keskuzpalan päivlaskmas.

Vsevoložskan rajon
Всеволожский район

Znam	Flag
Valdkund	Venäma
Administrativine keskuz	Vsevoložsk
Eläjiden lugu (2019)	398,896 ristitud
Pind	2,945,00 km²

Administrativine keskuz om Vsevoložsk-lidn, mülüb rajonha vspäi 2006, sijadase Piterin röunanno.

Istorii

Vsevoložskan rajonan aluz om pandud vl 1936 elokun 19. päiväl Leningradan agjaha Vsevoložskii-žilon keskuseks.

Vl 1954 Pargolovon rajonan küläkundoid ühtištuihe Vsevoložskan rajonanke. Vl 1963 Vsevoložskii-radnikžilo tegihe lidnaks, sidä alištihe agjan tobmudele oikti, no lidnan ispolkomale alištuiba molembad lidn da rajon. Vozil 1998−2006 Sertolovo oli lidnaks agjan alištusenke. Rajon om olmas nügüdläižiš röunoiš vspäi 2006.

Geografijan andmused

Vsevoložskan rajon om Leningradan agjan keskuztaho. Pind — 2 945 nellikkilometrad. Mecad ottas territorijan koume videndest, ned oma kavag'mecad tobjimalaz. Om soid 3,6 % rajonan territorijal.

Om röunoid 3 Venäman rajonanke da Piterinke:

• suvipäivnouzmas Leningradan agjan Kirovskan rajonanke;
• suvipäivlaskmas da päivlaskmas Piterinke;
• lodehes Leningradan agjan Viipurin rajonanke;
• pohjoižes Leningradan agjan Priozerskan rajonanke.

Rajonan päivnouzmaižed randad lainištab Ladoganjärv. Znamasine jogi om Oht, lankteb Nevaha. Neva om rajonan suviröunaks. Znamasižed järved oma Lembolovonjärv, Kavgolovonjärv, Hepojärv da Volojärv. Joged da järved mülüdas Atlantižen valdmeren basseinha.

Londuseližed varad oma turbaz, sauvondmaterialad (letked, saved), mineraližed mujud, mec, kala, reskvezi.

Vspäi 2016 rajonan territorii alajagase 19 municipaližhe ühtnikha: 9 lidnkundha da 10 küläkundha.

Tobmuz

Käskusenandai tobmuz om Ezitajiden Nevondkund (ven. Совет депутатов) 38 ühtnijanke. Kaik rahvaz valičeb heid videks vodeks. Järgvaličendad sihe oliba vl 2014 sügüz'kun 14. päiväl. Ol'ga Koval'čuk radab sen ezimehen da rajonan pämehen vs 2014 sügüz'kun 23. päiväspäi. Ezitajiden Nevondkund valičeb rajonan administracijan pämest.

Vs 2014 redukun 23. päiväspäi Vladimir Dračov om valitud konkursan kal't i radab rajonan administracijan pämehen kontraktan mödhe. Edel sidä, vs 2013 tal'vkuspäi, hän oli rajonan administracijan pämehen velgusentäutajaks. Seičeme varapämest abutadas hänele. Koume komitetad, 4 ohjandust, 14 palakundad, 2 sektorad da 2 laudkundad alištudas rajonan administracijale.

Eläjad

Vn 2010 Venäman rahvahanlugemižen mödhe eläjiden lugu oli 260 478 ristitud (ühtenz' sija agjas), vl 2016 — 307 779 ristitud.

Kaik om 154 eländpunktad rajonas, sidä kesken 4 lidnad, 5 lidnanvuittušt žilod, 23 žilod, 11 raudtestancijan žilod, 109 küläd, 2 sijašt.

Toižed sured eländpunktad oma Sertolovo-lidn (51,1 tuh. rist. vl 2016), Murino-lidn (49,6 tuh. rist. vl 2019), Kudrovo-lidn (31,5 tuh. rist. vl 2019), Uz' Devätkino-külä (16,2 tuh. rist. vl 2016), lidnanvuiččed Morozovan nimel nimitadud žilo (10,6 tuh. rist. vl 2016), Kuz'molovskii-žilo (10,0 tuh. rist. vl 2016) i Sverdlovan nimel nimitadud žilo (9,8 tuh. rist. vl 2016).

Rahvahad (vn 2010 Venäman rahvahanlugemižen mödhe, enamba 0,4%): venälaižed — 90,3%, ukrainalaižed — 2,7%, vaugedvenälaižed — 1,0%, armenijalaižed — 0,7%, totarlaižed — 0,7%, uzbekalaižed — 0,5%, suomalaižed — 0,4%, toižed rahvahad — 2,7%, rahvahuden ozutandata — 1,0%.

Erased igähižed rahvahad: karjalaižed — 110 rist. (0,04%), estilaižed — 81 rist. (0,03%), vepsläižed — 30 rist. (0,01%).

Ižanduz

Rajonan ižandusen päsarakod oma kebnavtoiden pästand (vhesai 2019 Ford Motors), renghanpäližiden tehmine (Nokian Tyres), mecan ümbriradmine, sauvondmaterialiden sarak, cellülozbumagaine tegim, gazanveimtransport (Elizavetinskai KS), sömtegimišt, maižanduz (kazvatadas linduid, maploduid, marjoid), torguind da logistik.

Irdkosketused

• Vsevoložskan rajonan oficialine sait (vsevreg.ru). (ven.)