Furmanov (lidn)

Furmanov (ven.: Фу́рманов) om Venäman lidn da lidnankund Ivanovon agjan pohjoižes. Se om agjan nellänz'-videnz' lidn eläjiden lugun mödhe, Furmanovan rajonan administrativine keskuz.

Furmanov
Фурманов

Lidnanznam	Flag
Valdkund	Venäma
Eläjiden lugu (2021)	32,855 ristitud
Pind	15,59 km²
Pämez'	Tat'jana Smirnova (reduku 2020—)
Telefonkod	+7−49 341-xx-xxx
Avtokod	37
Aigvö	UTC+3 (MSK+0)

Istorii

Eländpunkt mainitaškanzihe vspäi 1624 kuti Terentjeva Sered-žilo (ven.: село Терентьева Середа), möhemba Sereda-Upino-žilo. Vn 1918 27. päiväl heinkud ühtenzoittihe lähižidenke radnikžiloidenke da külidenke (kaik oli 13 eländpunktad) i anttihe makundan lidnan statusad Sered-nimitusenke (ven.: Середа). Nimitihe lidnan i rajonad nügüdläižikš vn 1941 13. päiväl keväz'kud nevondkundaližen Dmitrii Furmanov-kirjutajan (1891−1926) kanzannimen mödhe, hän oli sündnu neche eländpunktha.

Furmanov šingotase bumagkanghiden fabrikal i trikokanghiden edheotandal, mašinansauvomižen tegimel, sömtegimištol (leibänkombinat, maidtegim), plastikpakuitesen tehmižel.

Geografijan andmused

Lidn sijadase rajonan keskuzpalan pohjoižpäivnouzmas, Šač-jogen randoil (ven.: Шача 58 km pitte, Volgan oiged ližajogi), 130 m ü.m.t. keskmäižel korktusel. Matkad Kostroman agjhasai om 12 km lodeheze orhal, Ivanovon röunhasai om 20 km suvhe orhal, 25 km avtotel vai raudtel, keskushesai — 29 km suvhe orhal vai 36 km avtotedme. Toine lähembaine lidn om Privolžsk 18 km pohjoižpäivnouzmha orhal, 20 km avtotedme vai raudtedme. Furmanov-raudtestancii radab lidnan suvipalas. «Ivanovo — Kostrom»-avtotekeskust ümbärdab lidnad päivnouzmaspäi.

Klimat om ven kontinentaline. Heinkun keskmäine lämuz om +18,6 C°, vilukun −11,1 C°. Paneb sadegid 620 mm vodes.

Tobmuz

Furmanov om lidnankundan üks'jäižeks eländpunktaks. Lidnankundan pind — 15,86 km².

Edeline lidnankundan pämez' (Nevondkundan ezimez') om Oleg Prohorov (sügüz'ku 2015 — reduku 2020).

Eläjad

Vl 1939 lidnan ristitišt oli 36 062 eläjad. Vn 2010 Venäman rahvahanlugemižen mödhe lidnan eläjiden lugu oli 36 144 ristitud, rajonan viž kudendest. Kaik 34 309 eläjad oli lidnas vl 2017. Kaikiš suremb ristitišt oli 44..46 tuhad eläjid vozil 1979−1992 (46 329 rist. vl 1989).

Rahvahad (2010): venälaižed — 95,0 %, toižed rahvahad — 5,0 %.

Ortodoksižen hristanuskondan viž pühäpertid oma saudud da avaitud lidnas: Jumalanmaman «Kaikiden gorähižiden ihastuz»-jumalaižen päjumalanpert', koume jumalanpertid i časoun'.

Furmanovan tehnine kolledž om lidnan professionaližen opendusen aluzkundaks.

Galerei

• 
  Furmanovan kuvagalerei (2014, ende Losevan erižpert')
• 
  Jumalanmaman «Kaikiden gorähižiden ihastuz»-jumalaižen päjumalanpert', vn 2014 nägu
• 
  Kezerduzfabrik nomer 2 vl 2005
• 
  Aluzškol nomer 8 (2007)
• 
  Jaugnikoiden sild Šač-joges päliči vl 2007

Irdkosketused

• Lidnan da rajonan tobmuden oficialine sait (furmanov.su). (ven.) (angl.) (saks.)